بسم الله الرحمن الرحيم

في البداية اعذروني الموضوع كان لازم يكون يوم السبت لكن حصلت ظروف
سفر وماقدرتش أحطه ..

في الموضوع السابق الامل المشرق وضعت رد لخص ردودنا كلنا ، و Battousai
كذلك رده من الردود اللي أعجبتني رغم إعتراضي على نقطة لكن النقطة دي وصلتني
للموضوع وحطيته علشان هوه تقريبا مرتبط بالموضوع السابق فقلت نكمله وبعدين أحط
موضوع آخر ..



[ حجاب ده؟؟ ولا احتراام؟ ]

كتير من البنات في الفترة الحالية بيلبسوا الحجاب ، وطبعا الحجاب بقى ليه أشكال مختلفة زي
الخمار والإيشارب والطرحة وغيرها ...

لكن الحجاب بقى موضة عند البعض ، وعند البعض بيلبسوه علشان أهلهم بيجبروهم على
الشيء ده ، وطبعا فيه فئة كبيرة بيلبسوه عن إقتناع وحب

أنا هتكلم عن نفسي .. في البداية لبست الحجاب لإني كنت مضطرة بصراحة مع إني كنت في
أول إبتدائي لكن ظروف المكان اللي كنت عايشة فيه كده ، لكن والدتي كانت دايما تكلمني عن
الحجاب ولذلك لما سافرنا وقالتلي إذا عايزة تشيلي الحجاب إنتي حرة لكن أول ماتكبري هتلبسيه
تاني ، بصراحة مقدرتش أشيله لإنه بقى جزء لا يتجزأ من حياتي ولإني وقتها كنت مقتنعة بيه
إقتناع تام ..

واحنا كل مانشوف بنت لابسة حجاب وماشية بنقول دي بنت ماشاء الله عليها محترمة ومتدينة
ومتربية صح ..

ياترى الحجاب بقى دليل على الاحترام والتدين والتربية الصح؟؟
وبرأيكوا إيه صفات البنت المحترمة؟ لازم الحجاب يكون أساسي فيها؟ ولازم تكون لابسة عباية
علشان نبصلها باحترام وإنها بنت ناس؟
ولا البنت المحترمة هيه بس اللي مش بتكلم شباب؟



شكلي طولت عليكوا بس أتمنى أسمع آراء البنات والشباب في الموضوع ..

وإذا عندكوا أي إقتراح أو موضوع شايفين إنه مهم ياريت تقولوا علشان نتناقش فيه ..