الموضوع الثاني لعرض مشاكلكم الحياتية واستفساراتكم وأخذ المشورة..قال تعالى: (وأمرهم شورى بينهم)

[الريحانة]

كيااااا .. اهلا بك ريحانة_ تشان
أول مرة الاحظ أنك من مصر
أنا سعيدة للغاية و اتشرف بأن اكون صديقتك
واااو يبدو الحديث معكى ممتعا *.*

امممم بالنسبة لسؤالك للأسف لن اغير مدرستى رغم أنى كنت أريد ذلك

اريقاتو لاستماعك لثرثرتى و مساعدتى

ههههه لا عادي فأنا ثرثارة أيضا

المهم
كنت سأقول بان الامر سهل إن غيرت المدرسة !! لأن الناس في المدرسة الجديدة لن يكونوا يعرفونك
طيب هتكلم مصري بقي أوك؟
بصي يا ستي انتي لازم تصممي أنك تتغيري ومتهتميش لتحبيط غيرك ليكي لان هم أكيد مش عرفين اللي أنت حسه بيه إيه
إقتراح : لو والدتك من النوع المتفهم وممكن تسمع لك ... يبقي يا ريت تقوليلها اللي انتي حاسه بيه لأنها أكيد أول واحدة هتقدر تساعدك
بعدين نجي لموضوع الاصدقاء
بخصوص الموقف اللي حصل معاكي نصيحة مني ليكي متحطيش الموقف ده ف دماغك خالص لأن الاصحاب في الصغر دايما بيبقو مش فهمين هم بيعملو ايه بحكم السن الصغير بس بردو لازم تحذري لما تختاري الأصدقاء
انا هكيلك عن تجربتي

لما كنت صغيرة حوالي تانية ابتدائي كنت مصحبة بنت وكانت كويسة ومؤدبة ومامتها كانت ست كويسة وبقت هي وأمي أصحاب
المهم جت بنت تانية نقلت من مدرسة تانية لمدرستنا وبعدين صاحبتي الاولي وهسميها "م " والجديدة هسميها "أ" المهم "ا" بقت صحبت "م" وأنا كان عادي بالنسبالي لأن كان باقي الفصل كله اصحابي
لكن "أ" كانت دايما بتحب ترخم عليا مع أني كنت بحبها لدرجة انها مرة قالتلي آجي اقعد جنبها وفجأة قامت مخترعة مشكلة يعني جايباني جنبها عشان تتخانق معايا ههههه (طبعا أختك الرغاية "ثرثارة بالمصري أكيد فهماني ^^" مكدبتش خبر واشتكيت عليها للأبلة )
ماشي؟
نكمل
بعدين في سنة رابعة بنت تانية جت المدرسة وهسميها "ت" بقو "م" و"أ" و"ت" أصحاب وش فكره أوي المهم أنا كنت باخد درس حساب خصوصي في البيت أنا ووحده صحبتي من مدرسة تانية والمدرسة كانت تبقي صاحبة أم "ت" و الأبلة أستأذنت أمي أن "ت" تيجي تآخد معايا درس وطبعا أمي وافقت
بعد كده بقت شلتنا مكونة من أنا و "ت" و"م" و "أ" وكمان بنات تانية منهم "س" و"ج"
نروح ل "س" كانت بنت عسولة وحبيتها اوي وكنت قعده في الدسك جنب وحده طيبة هسميها "ح" انا بغبائي كنت عايزة اقعد جنب "س" وابقي صحبتها فزعلت "ح" مني وكنت براضيها بس بردو أرجع أزعلها تاني رغم ان انا بالنسبالها كنت أحسن إنسانة في العالم كانت بتحبني مووت
وف الآخر بقت "س" صحبتي المقربة
وبعدين الشلة اللي ذكرتها قبل كده أنا كنت بموت فيهم وواخده مقلب انهم كمان بموتو فيا
بس في كذا موقف صدمني فيهم جدا
في سنة خامسة أو سته مش فكرة
مرة كان الاستاذ زوجته جابت نونو واتفقنا اننا نجيب لبنته هدية وقلتلهم لما تيجو تجيبو الهدية ابقو قولولي عشان اشترك معاكم في المبلغ
بعدها بكام يوم لقيتهم ( "ت" و "م" و مش فكرة مين تاني )جايبين طقم (ملابس) للنونو
طبعا اتصدمت فين اللي اتفقنا اني هكون معاهم
ماشي وبعدها أمي جابتلي طقم تاني عشان اديه للاستاذ هدية لبنته

موقف آخر
كنت بحب "ت" جدا جدا وفي مرة حصل ظروف وباتت عندنا وكنا بنهزر وبنضحك وكده
وفي المدرسة تاني يوم لما رحنا لقتها بتقول لصحبتها المفضلة "ف" -كانت من الشلة بس نسيتها- المهم قالتلها مكنتش اتوقع اني أنام عند ...... (اسمي) انا طبعا زعلت بس مبينتش وعدتها

مرة تانية
كان عندنا مسابقة اوائل طلبة ف مدرسة تانية (ملحوظة ملهاش لزمة : مدرسة البنت التانية اللي كانت بتآخد معايا درس )
وامي وام "ت" كانو معانا هناك لاننا كنا من الاوائل اللي في المسابقة والمسابقة كان بعدها حفلة بسيطة
وبعدين المدرسة دي كانت قريبة من بيتي و أم "ت" كانت عايزة تمشي عشان كانت مشغولة ومش هتعرف ترجع عشان تروح "ت" فأمي قالتلها خليها تيجي تقعد عندي لحد اما تفضي وتيجي تاخديها
فراحت ام "ت" عشان تآخد رأيي "ت" وبعدين انا مكنتش أعرف بس أمي حكتلي أن لما ام ت" قالتلها انها تروح معايا انا وامي واخواتي قامت "ت" قلبت وشها (يعني وجهها تغير كأنها متقززة مني ) وقالت لها لا
معرفش ليه هو انا وحش هاكلها مثلا

وطبعا "س " حصل معايا مواقف كتييييير بينت انها مش بتحبني زي ما كنت فاكرة
المهم ف أولي اعدادي جم بنات كتيير من المدرسة التانية السابق ذكرها ( اللي عملنا فيها أوائل الطلبة واللي كانت فيها البنت الأولي اللي كانت بتآخد معايا درس وهسميها "ف")
وعلي فكرة المدرسة دي انا كنت فيها كي جي ون وتو (رياض أطفال ) واولي ابتدائي
فالبنات اللي جم كنت اعرف شويه منهم
وبعدين عملنا شلة جميلة مكونة من أنا و حوالي 15 بنت
وبقيت بموت فيهم وكلنا حبايب وزي الاخوات
والحمد لله لسه اصحاب وهنفضل أصحاب
وعلي فكرة العضوة الأميرة لين منهم ^^

أخيرا خلصت تجربتي الباآكا ^^"

المهم العبرة ان مش شرط الصداقة الاولي تكون حقيقية !! يعني ممكن تكون مجرد تجربة تخليكي تتعلمي منها وبعد كده تنجحي في الصداقات الجديدة

السنة الجايه ان شاء الله ما تصاحبيش حد ولو في دسك منفرد ( يكفي لشخص واحد) اقعدي عليه لوحدك
المهم متربطيش نفسك بصديقة وأبدأي بالمراقبة
اتفرجي ع البنات وشوفي سلوكياتهم مع الاصحاب ومع المدرسين وكده
وبعدين اختاري اللي ترتاحي لسلوكها
حاولي تدوري علي وحده مؤدبة وخلوقة وياريت تكون متفوقة عشان تشجعوا بعض ع المذاكرة
وبعدين حاولي تعرفي عنها أي حاجة بس من غير ما تصاحبيها وبعد ما ترتاحلها ابدأي تقربي منها وحاولي تخليها تحبك بس تصرفي بطريقة طبيعية مش متكلفة وقولي لها أنك تبقي سعيدة لو بقيتو اصحاب لو لقتيها فرحت يبقي أكيد لقيتي صديقة مناسبة واوعي تفرطي فيها ومش شرط تكون بتحب أنمي لان ده من الهوايات
انا مثلا عندي في الشلة بنات ملهاش علاقة بالانمي بس بيسمعولنا -اللي بنحب الانمي_لما بنتكلم

وبعدين حاولي تصاحبي بنات كتير
ومتخافيش ومتتردديش ومتحطيضش ف دماغك انك انطوائية او مش بتحبي الكلام لان لما حد بيحط فكرة ف دماغه عن نفسه بيبقي فعلا الصفة دي فيه حتي لو هو اصلا مش كده
اقنعي نفسك انك مش اقل من اصحابك اللي بتكلمو ويمكن انتي مش عارفه تتواصلي معاهم لانك المواضيع اللي بتحبيها (زي الانمي ) مختلفة مع اللي بيحبوه (زي المسلسلات ) المهم انك تختاري بنت خلوقة مش بتتفرج عل المسلسلات والافلام وبتصلي ومحجبة وكده

اما عن مشكلتك في البيت لو عندك حد صغير او طفل تدربي عل الكلام معاه افتحي مواضيع بيحبها زي مثلا "نفسك لما تكبر تبقي ايه؟" "ايه اكتر حاجة بتحبها ؟" وكده
ملحوظة : الكلام مع الاطفال هوايتي لما اشوف طفل او طفلة افضل ارغي معاهم لحد ما اخليهم يقولو كل اللي نفسهم فيه .. يمكن ده سبب اني كأني واخده الدكتوراه في الرغي ههههه

ولما تلاقي أخوك غضبان ابعدي تماما عنه ومتخليهوش يشوفك ولو كان مينفعش خليكي بارده وكلميه بالراحة و حاولي تخففي عنه عشان يحس انك طيبة وما تستهليش اللي بعمله فيك
ولو ضايقك عيطي قدامه عشان يلين ويصالحك ولو مصالحكيش ابقي سيبيه وتاني يوم قوليلوه بهدوء انك ضايقك التصرف بتاعه و اطلبي انكو تبقوا اصحاب مش بس اخوات وتحكو لبعض علي اللي يضايقكو وطبعا كلميه بهدوء وبطيبة عشان يرضي يسمع كلامك وقوليلو انه أحلي أخ وكده يعني

وحاولي تبدأي حوارات مع افراد اسرتك ولو بسيطة وشاركي في حواراتهم ومتسكتيش حتي لو قلتي كلمتين تلاتة المهم تبدأي

ونصيحة( بلاش أصدقاء الفيس بوك والتويتر والماسنجر لان ممكن يكون ولد وعامل نفسه بنت وفي الآخر يضحك عليك >_<)

يارب أكون أفدتك وبردو استني ردود من الاعضاء الباقيين أكيد عندهم حلول أحلي من حلي ^^


وابقي قوليلي المستجدات وهسمعك دايما
صديقتكِ وأختك الريحانة ^^