سلمى... يا سلمى...

[أ. عمر]

سلمى بنت (شَلُّوفة)!
سلمى غليظة كتير
القرود ما بتتحملها
ولأن سلمى مغنجة حالها افتكرت حالها (شي مهم كتير)
رفعت أنفها بالسما ومشيت تغني أنا والنجوم واحد، أنا والغيوم اتنين...
ويا ما بعض أساتذة سلمى حكيوا معها لأجل مصلحتها وما كانت تفهم!
كانوا دايمًا يقولوا لها يا سلمى أنتِ شطورة وذكية وفيكِ تطلعي الأولى إذا بدك
وتتطلع سلمى يمين شمال لتشوف مين هيدي الشطورة الذكية يللي عم يحكوا عنها وما تلاقيها!
وبثقل دم وسماجة تقول لهم من طرف تمها: بعرف بعرف وما بدي كون الأولى، شو يعني كون الأولى؟ رح تعطوني شي ألف دولار وما معي خبر؟
وسقطت سلمى واحتار أبوها شو يعمل لحتى التقى صدفة بأستاذ بمدرسة تانية وفضفض له أبو سلمى بِهَبَل بنته، فنصحه يسجلها بمدرستهم...
بأول يوم دخلت سلمى المدرسة عم تروح يمين شمال متل السكرانة، بس لتبين لهم مين هي سلمى، وشو ناطرهم معها
ورنت العصا على ضهرها كأنها معتقلة عند معسكر الحلفاء مثلًا!
صرخت سلمى بس العصا من إيد الناظرة ما كانت توقف بالهين
طلعت سلمى لصفها، وأول ما دخلت -هي ورفقاتها- ناولتها المعلمة الواقفة باستقبالهم بالصف كف متل النيران
جَنِّتْ سلمى ونزلت ركض للإدارة لتشتكي، قامت المديرة قالت لها معك حق وعملت لها فلق على إجريها!
صارت سلمى تتمنى ترجع لصفها وهي واقفة بزاوية الملعب وإجريها عم تلهب من الأتلة
تاني يوم سلمى عملت حالها مريضة وغابت، تالت يوم أول ما دخلت مدرستها رن كف على وجهها!
هلأ بصراحة من وقتها سلمى صارت تدرس بكل قوتها لأجل ما تتعرض للضرب لأنها فهمت أنه ما في بقى دلال نهائيًا
بس العقوبات كانت قاسية وعلى أتفه شغلة بتلاقي سلمى – ورفيقاتها كمان – العصا عم ترن وما في رحمة أبدًا
سلمى استرجعت طبيعتها المشاغبة وقررت تتحدى الإدارة وتوقفها عند حدها بس مش وحدها أكيد!
جمعت سلمى حولها (عصابة) من البنات والصبيان، وانقضوا متل الوحوش الجيعانة على مكتب الإدارة ببداية الفرصة...
مرة من المرات تفاجأت المديرة بالمفتش التربوي جاية بزيارة، ووجهه عابس كأنه جاية يقاتل...
وصحيح هو كان جاية يقاتل، رغم نتائج المدرسة 100% بالشهادات، بس الضرب ممنوع، فكيف الحال بالتوحش بالضرب؟
وعلق المفتش مع المديرة، هي بدها تقنعه أنه الكلام عن (إبداعات) الأطفال وأنه (حرام ينضربوا) حكي فاضي، وضرر على مستقبلهم، وقالت له الدليل سلمى، سلمى كانت (متيسة) بمدرستها وهلأ ما في منها اتنين!
سلمى لو بدنا نقول لها يا حبيبي ويا عيني كانت بدها تسقط وتخسر سنين كمان بينما هلأ أبوها عم يقول العمى أدا بنتي ذكية وأنا كنت فاكرها هبولة!
المفتش تضايق منيح، شو متيسة وهبولة ومن هالحكي (غير التربوي) هيدا؟
قرر المفتش يعاقب المديرة وبقسوة شديدة وكان بدو يخبرها هالشي
بس بهاللحظة دخلت سلمى ويا قاتل يا مقتول!
خبطت سلمى على الطاولة وهي عم تجعـ... تصرخ: هااااااااااااااااااااااااااععععع!!!
المديرة صابتها الصاعقة والمفتش كان راح فيها بالسكتة القلبية
وسلمى بشماتة كبيرة قالت للمديرة: شوفي (ولة) إن مفكرة ما في حدا يوقفك عند حدك، روحي اسألي مين هي سلمى وبتعرفي! ولك أنا سلمى العفريتة يللي كلمتها ما بتصير اتنين، وجاية أنا ورفقاتي كرمال...
دارت سلمى وجهها هون لتشوف الجماهير الشعبية يللي إجت معها بس ما لقيت ولا واحد فيهم...
كانت وحدها بالمواجهة القاتلة!
وما تفاجأت المديرة أبدًا بالمفتش لما خطف العصا عن طاولتها وركض ورا سلمى وهو عم يصرخ عليها بألفاظ غريبة ما حدا سامع فيها...
نسي المفتش كل التربية الحديثة والقديمة وقرر أنه واحدة متل سلمى لازم تنفعص لحتى تكون (مفعوصة) عن حق وحقيق!
سلمى طلعت برا المدرسة والمفتش ما وقف عند حدو، ضل لاحق وراها وهو عم يخبطها بالعصا وقت بيطولها، والمديرة وراهم عم تحاول تقنع المفتش يترك سلمى...
بس ما في فايدة...
سلمى تأثرت بموقف المديرة وندمت على تصرفها وقررت تكون تلميذة شطورة وذكية عن جد، بس...
بعد ما طلع قرار فصلها النهائي من المدرسة!
مع هيك سلمى ما بطلت تروح للمدرسة أبدًا، مش لأنها مجتهدة لا سمح الله، بس لحتى تعمل حركات بإيديها لرفقاتها وتقول لهم عندكم مدرسة حندقة حندقة، لازم يدقوكم بالمدقة...
أبو سلمى حاول كل جهده (يفهم) الوضع، هل بنته جنت رسمي أو هو مجنون من البداية؟
وبالنهاية جن عن جد وانتحر ليرتاح!
وسلمى...
ما بطلت عاداتها...
ولا وقفت غلاظتها!
(قصة مرمزة لا تحمل شيئًا من معانيها الظاهرة)
عمر قزيحه – فكرة القصة في الـ 2003م، والتعديل في 27-5-2020م الساعة: 8:31 دقيقة مساء

[Jomoon]

السلامـ عليكمـ ورحمة الله وبركاته~

ربي يعافيك على القصة الماتعة،
استمتعت بقراءتها
ربي يزيدك من فضله

في حفظ المولى،،
~

[أ. عمر]

السلامـ عليكمـ ورحمة الله وبركاته~

ربي يعافيك على القصة الماتعة،
استمتعت بقراءتها
ربي يزيدك من فضله

في حفظ المولى،،
~

وعليكم السلام ورحمة الله وبركاته
بارك الله بكم وحفظكم من كل سوء