•.• ياااه ...آخرفرصة للأسف الشديد...تفريغ محاضرة (( أيام لا تعوض )) للدكتور/ حازم شومان•.• [الأرشيف]

*فرح*بالخير*

1-12-2008, 10:58 PM

السلام عليكم ورحمة الله وبركاته

الإخوة والأخوات بالمنتدى

وجدت موضوعا رائعا عن عشرة ذى الحجة فأحببت أن أنقله لكم ...نفعكم الله به

بسم الله الرحمن الرحيم

الدرس ...للمشاهدة أو الإستماع أو التحميل

http://www.way2allah.com/media/files/images/3shr-ze-alhega.gif (http://www.way2allah.com/modules.php?name=Khotab&op=Detailes&khid=8963)

- استمع الآن لأفضل الأشرطة فى فضل عشر ذي الحجة والأعمال الواردة فيها اضغط هنا (http://www.way2allah.com/modules.php?name=Khotab&op=Series&id=748)

(http://www.way2allah.com/modules.php?name=Khotab&op=Series&id=748)

- لتحميل ورقة صفحة جديدة مع الله لطبعاتها اضغط هناالشكل الاول (http://www.way2allah.com/media/files/images/asher_zoalhga.rar) , الشكل الثاني (http://www.way2allah.com/media/files/images/asher_zolhaga2.rar)

و

يسر فريق عمل التفريغ

بموقع :

الطريق إلى الله

www.way2allah.com (http://www.way2allah.com/)

أن يقدم تفريغ محاضرة (( أيــام لا تعوض )) عن فضل العشر الأوائل من ذى الحجة

للدكتور / حازم شومان - حفظه الله

الحمد لله وكفى وصلاة وسلاما على عباده الذين اصطفى

اللهم لك الحمد كله ولك الملك كله وبيدك الخير كله وإليك يرجع الأمر كله

اللهم صلى على عبدك ونبيك وحبيبك ووليك وصفيك محمد صلى الله عليه وسلم

الله أكبر الله أكبر الله أكبر لا إله إلا الله

الله أكبر الله أكبر ولله الحمد

الله أكبر

إخوانى فى الله

إحنا الوقتى ...درس النهاردة وبدون مقدمات ...درس النهاردة موضوع مهم جدا وخطير جدا ...وما فيش وقت إن أحنا ندخل فى مقدمات

ياجماعة ... درس النهاردة أعظم فرصة فى حياتك وحياتِك

درس النهاردة مش بس عن أعظم فرصة... عن آخر فرصة للأسف الشديد ...عشان نكلم بصراحة

أخطر مــرض !!!

قبل ما ندخل فى الموضوع يا جماعة... لو طبيب راح يكشف على مريض... فبيكشف على المريض لقى فيه دور برد ...بيكشف أكتر لقى قرحة فى المعدة ...بيكشف أكتر لقى فيه سرطان

الدكتور هيترعب من أنهى مرض أكتر ؟...وهينبه المريض وأهل المريض من أنهى مرض أكتر ؟...طبعا السرطان

يبقى إذا أخطر مرض لازم ننبه الأمة كلها منه دلوقتى...إيه أخطر مرض بقى فى حياتنا ؟

إيه أخطر مرض بقى فى قلوبنا ؟
...إن أحنا معدناش فاكرين الآخرة ...إن أحنا ماعدش عندنا تعظيم حقيقى للدار الآخرة

ليه مصر تمشى في الإتجـــاه المعاكس !!!

يا أخوانى لو أنت ماشى فى عربية فى ضمن طريق إتجاه واحد ... شارع إتجاه واحد ...والمرور ماشى والحركة ماشية ...والناس مبسوطة ...فجأة لقيت عربية ماشية فى الإتجاه المعاكس وسادة الشارع والناس وقفت ...والمرور وقف ...الناس كلها هتبقى مخنوقة أد إيه ؟
كل الناس هتبقى مخنوقة من الإتجاه المعاكس أد إيه ؟

أهوا إنت لما بتعصى ربنا بتكون فى الإتجاه المعاكس

الكون كله إتجاه واحد .. إنت لما بتعصى ربنا إنتا اللى بتمشى فى إتجاه معاكس ...الكون كله إتجاه العبادة ...إتجاه حب ربنا ...إتجاه الإقبال على ربنا ...إحنا اللى بمعصينا ياجماعة ، الكائن الوحيد فى الكون اللى ماشى فى الإتجاه المعاكس

وقفــة فى أحب أيام الله

طب وبعدين ؟...وبعدين ؟...محتاجين وقفة ...محتاجين صفحة جديدة مع ربنا ...لما يكون واحد عنده مشكلة بينه وبين مدير الشغل ... فيقوم واحد يقوله إنت عايز تصلحه يقوله آه ...يقوله أحب يوم إليه وأحسن يوم ممكن تزوره فيه بيبقى فاضى ...يوم الجمعة مثلا ...وأحب هدية بيحبها جدا الحلويات مثلا

هاتله أحب هديه وروحله فى أحب يوم ...تبدأ معاه صفحة جديدة على طول ..هوا ده اللى أحنا هنعمله النهاردة إن شاء الله

لا تعـــــوض !!!...منتش ضامن عمرك

إن أحنا هنيجى فى أحب أيام إلى الله فى الدنيا كلها ...عشر ذى الحجة ...أيام لا تعوض

ملقتش شعار يبقى شعار للدرس بتاع الليلة أحسن من أيام لا تعوض ...مش هتتعوض والله العظيم ...مش هتتعوض ...منتش ضامنة ...منتش ضامنة السنة الجاية هتجيلك الأيام دى ولا لأ ...منتاش ضامن كم سنة لسه فى عمرك هيجى عشر ذى الحجة فيها ولا لأ ...منتوش ضامنين يا جماعة

يتبع بإذن الله ....

*فرح*بالخير*

2-12-2008, 11:19 AM

الأيام اللى هنكلم النهادرة عن خطورتها الرهيبة ...عايزين نيجى لربنا فى أحب أيام بيحبها ...بأحب أعمال بيحبها ...ونقوله صفحــة جديدة يارب ...صفحـــة جديدة يارب معاك ...يارب ...هنكتب إيه فى الصفحة الجديدة ؟

إحنا مع بعض الليلة يا جماعة بإذن الله سبحانه وتعالى

هنتعامل بالدقيــقة ...بل بالثانية !!!

موضوع النهادرة أعظم فرصة فى حياتك وحياتِك...يا جماعة العشر الأوائل من ذى الحجة فيهم يوم عرفة ...النبى عليه الصلاة والسلام بيقول بيكفر ذنوب سنتين ...ذنوب سنتين يا رسول الله ؟

يعنى 12 ساعة صيام ...مش 12 ساعة عبادة يا جماعة ...مش عبادة يوم عرفة تكفر ذنوب سنتين ...صيام بس عمل صالح واحد بس فى يوم واحد بس ...يكفر ذنوب سنتين ...يعنى السنتين دول 24 شهر والصيام 12 ساعة ...12 ساعة يكفروا 24 شهر

يبقى الساعة تكفر أد إيه ؟... شهرين ...يبقى ال60 دقيقة اللى فى الساعة يكفروا 60 يوم فى شهرين

يبقى الدقيقة تكفر يوم ...يبقى الدقيقة بكام ؟...بيوم

يبقى إحنا داخلين على أيام... هنتعامل فيها بالدقيقة ...إحنا داخلين على أيام مش هنحسبها بالساعة ولا بالليلة ولا بالنهار ...هنحسبها بالدقيقة ...هنحسبها بالثانية ...أعظم فرصة فى حياتك ...آخر فرصة !!!..إزاى ؟

كــانت آخر فرصــه له !!!

أحد الشباب – الله يرحمه – كان ماشى بالعربية وماشى بسرعة ...وبيشد بقى مع زمايله ومشغل الكاسيت على الآخر ...بسرعة العربية اتقلبت بيه 5 لفات مات الشاب ...اليوم الى مات فيه ده كان آخر فرصة فى حياته

يعنى إيه ؟...يعنى العشرة دول آخر فرصة فى حياتنا فى السنة ...السنة يا جماعة ...السنة هتخلص ...ذو الحجة خلاص آخر السنة

يلا نعوض ...نلحق ...لسه الفرصة !!!!

يعنى إحنا دلوقتى فى لجنة الإمتحان ...والورقة لسه فى إيدينا ومش عارفين نجاوب ...المراقب راح منادى فى المكرفون ...خدوا بالكم لسه ربع ساعة ...والمهم الورقة هتتسحب ...ربع ساعة ...هوا ده النداء اللى جايلكم من ربنا خدوا بالكم ...خلاص لسه أيام والسنة هتخلص ...الربع ساعة الآخرانية اللى هيا ذى الحجة ...10 ذى الحجة

أحنا دلوقتى ياجماعة أيام الإمتحانات بالنسبة للطلبة ...الطالب اللى قاعد طول السنة غافل ...بيجى أيام يعوض ويلحق

ربنا جعلنا المواسم دى عشان نعوض ونلحق ..يلااااا..قدامك فرصة تلحق اللى سبقك ...يالاااا...يالااااا قدامِك فرصة تعوضى اللى فاتِك ...قدامك فرصة تجدد شحن قلبك ...قدامك فرصة إنك تنطلق وتصصح وجهتك

يتبع بإذن الله ....

*فرح*بالخير*

2-12-2008, 11:20 AM

لسة البــاب متقفلش

إخوانى ..يا جماعة لسه الباب متقفلش

اللى راح عليه رمضان ...لسه الباب متقفلش

اللى ما أعتقتش رقبته فى رمضان ...لسه قدامه فرصه أهو

اللى متغفرلوش كل ذنوبه فى رمضان ...لسه قدامه فرصة أهو

اللى مكسبش رمضان من أبواب الجنة الثمانية اللى كانت مفتوحة فى رمضان ...لسه الفرصة أهو

يا جماعة اللى مثبتش فى رمضان ...لسه الفرصة أهى

اللى وقع بعد رمضان ...طوق النجاة أهو

...العشرة الأوائل من ذى الحجة... طوق نجاة ...جاى بيه الليلة بإذن الله سبحانه وتعالى ...عشان يبقى فيه كهربة فى قلبنا ... كهربة إيمانية فى قلبنا ...تخلينا منمش العشر أيام دول ...أفضل أيام الله ...أفضل أيام الدنيا ...أعظم أيام الله فى الدنيا وفى التاريخ كلها

مش كــل الناس !!!

هيا اللى أنا جاى أكلمكم عنها دلوقتى يا جماعة ...وجاى أكلمكم عنها الليلة

خدوا بالكم دى أحب الأيام إلى الله زى ما هنقول الوقتى ...مش هيعبده فيها إلا أحب العباد إلى الله ...دى أحب الأيام إلى الله ...مش هيعبده فيها غير أكتر ناس بتحب الله ....أكتر ناس ربنا مختارهم ومصطفيهم ...مش كل الناس منتبهة للأيام دا هية

أخرتهـــا إيــه ؟؟؟

الدنيا أخرتها إيه ؟..لو معاك ميت مليار هتسكن فى كام شقة ...هيا شقة

ولو إنت بصيت لمليون واحدة هتجوز فى الآخر واحدة ...هيا واحدة ...ولو جيت تتجوز التانية ...يا تخلعك فى المحكمة ...يهتقطعك فى أكياس بلاستك... يا هيكون جاءك عشا ليلى من الجواز ...خلاص بعدها ماانتش شايف انتا هتختار بعدها مين اصلا

هيا إيه يا جماعة ؟...الراجل اللى كان عنده بلايين وراح فى غيبوبة وولاده حسبوه نام ولا راح فى غيبوبة ...مسكوا الآلة الحاسبة وبدأو يقسموا مين هياخد العمارة دى؟... مين هياخد الأرض دى ؟...مين هياخد الفلوس دى؟... مين هياخد الأرباح دى ؟ الراجل كان هيموت بقهرته ..هما دول ثمرة حياتى ؟..أخرة الدنيا كده يا جماعة

يتبع بإذن الله ....

*فرح*بالخير*

2-12-2008, 11:25 AM

وكذلك روحك لها احتياجات

إنت جسمك له إحتياجات كل يوم زى النوم ...له احتياجات كل ساعة أو كل كذا ساعة زى الأكل والشرب ...له إحتياجات كل ثانية زى النفس

كذلك روحك لها احتياجات كل يوم زى إنك تقرأ القرآن مرة ...ليها احتياجات كل كذا ساعة إنك تصلى فى المسجد جماعة ...ليها إحتياجات كل ثانية زى ذكر الله ...ذكـــر الله

أيام ذكر الله ...أعظم أيام ذكر الله جاية يا إخوانى ...هيا الأيام دى اللى أنا جاى أكلمكم عنها

إمتى بقى ... إمتى يا جماعة ؟

" أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ "الحديد : 16 ... لسه ماجاش الوقت ؟... إمتى ؟

إمتى هم الدنيا اللى مكبلك عن الإنطلاق فى العبادة هتحررى منه ؟
إمتى بقى هم الأخرة هيخليك تنطلق إلى ربنا ؟
إمتى بقى همة علو العبادة هيجى عندنا ؟

.إمتى بقى هنسدد الدين بتاع ربنا ؟...دين النعم اللى ربنا مغرقنا بيها ..إمتى بقى هنسدده أو هنسدد شئ منه بالأعمال الصالحة ؟

لا تعوض فى ..وفى ...

إمتى يا جماعة ؟...أحب الأيام إلى الله ..أنا عايز دلوقتى أقولكم إنها أيام لا تعوض

أيام لا تعوض فى كسب الحسنات

أيام لا تعوض فى التوبة وتكفير السيئات

أيام لا تعوض فى صفحة جديدة مع الله

أيام لا تعوض فى النفحات والكرمات والعطاءات

أيام لا تعوض فى حب الله

أيام لاتعوض فى نيل درجة المجاهدين

أيام لا تعوض فى مضاعفة الحسنات

مضاعفة الحسنات ؟..أيوة ..ربنا بيحب المسجد الحرام خلى الصلاة فيه بمائة ألف صلاة ...ربنا بيحب الأيام دى

أيــام القفز !!!

ابن عباس يبقول إن العمل فيها بيضاعف سبعمائة مرة ...سبعمائة مرة...يعنى حرف القرآن مش بعشر حسنات بسبعتلاف ؟...يعنى التسبيحة مش بعشر حسنات بسبعتلاف ...ايه ده يا جماعة ؟

ده الامام الاوزاعى بيقول ان عمل اليوم فيها كأنك غزيت غزوة فى سبيل الله

بعض السلف بيقول إن صوم يوم فيها بصيام سنة كاملة لله سبحانه وتعالى ...إزاى كده ؟

يا جماعة دى أيام القفز بقى ...إنت بتقفز فيها ...اللى بيجتهد فيها يحصل اللى بقالهم سنين التزموا من أهله ...عايزين نجتهد فى هذه الأيام

يتبع بإذن الله ....

*فرح*بالخير*

2-12-2008, 11:32 AM

العمل الصالح فيها أحب إلى الله

إسمع الحديث الخطير ده ...اسمعى بقلِبك الحديث الرهيب دا هو ..كل الأحاديث اللى هقولها لكم النهاردة صحيحة بإذن الله سبحانه وتعالى

قال رسول الله صلى الله عليه وسلم : " ما من أيام العمل الصالح فيها أحب إلى الله من هذه الأيام يعني أيام العشر قالوا يا رسول الله ولا الجهاد في سبيل الله قال ولا الجهاد في سبيل الله إلا رجل خرج بنفسه وماله فلم يرجع من ذلك بشيء " صحيح

"ما من أيام "...أه ...أيام عمل ...أيام جهد ..مش أيام كلام ...ولا أيام...لا لا لا ..شغل بحق وحقيقى

"العمل الصالح "...الصوم ...الصدقة ..الذكر ...أى عمل من الأعمال الصالحة

" أحب إلى الله "...الكلمة دى متعديش على اللى بيحب ربنا

بتحبهم يارب ...أنا هعبدك فيهم ليل نهار يارب

بتحب الصيام فيهم ...مش هفطر ولا يوم يارب

بتحب الذكرفيهم يارب ...مش هيبطل لسانى ذكر يارب

بتحب القرآن فيهم يارب ....أقراه باليل والنهار يارب

أنا بحبك يارب ... وهثبتلك أنا بحبك أد إيه فيهم يارب

ولا الجهــــاد إلا !!!!!

قال رسول الله صلى الله عليه وسلم : "ما من أيام العمل الصالح فيها أحب إلى الله من هذه الأيام "صحيح

الصحابة قالوا له : "يا رسول الله ولا الجهاد في سبيل الله ؟ " ...يارسول الله ....مش معقولة ...الجهاد !!!!... "ولا الجهاد في سبيل الله " صحيح ... يارسول الله مش قولت لنا :"لا اجد " صحيح ...لا أجد عمل يعدل الجهاد ...لما راجل جاى يقول :

" يا رسول الله دلني على عمل يعدل الجهاد ؟"...قال "لا اجد " صحيح ...ثم قال " هل تستطيع إذا خرج المجاهد أن تدخل مسجدك فتقوم ولا تفتر وتصوم ولا تفطر ؟ " صحيح ... قال "ومن يستطيع ؟ "

قاله "لا اجد " صحيح...ما فيش ...يارسول الله جاى تقول لنا إن ده اعظم من الجهاد ...يارسول الله ...قولت لنا " إن في الجنة مائة درجة أعدها الله للمجاهدين في سبيل الله" صحيح ...يتقلبوا فى النعيم ...ده أعظم ...المجاهد يا رسول الله

يا رسول الله ده حارثة اخذ الفردوس الاعلى بسبب الجهاد

يا رسول الله ده جعفر ابن ابى طالب خد الفردوس ... طاير مع الملائكة بيوم جهاد فى مؤته

الشهيد ... واحد ما فيش ألم الموت عليه

يا رسول الله ...ده أعظم من الجهاد ...إزاى ؟

"ولا الجهاد فى سبيل الله " كرروها فى رواية ثانية لا الجهاد ...ولا الجهاد مرة ثالثة ولا الجهاد ...إزاى يا رسول الله ؟... يعنى ده أعظم من واحد استشهد فى سبيل الله ؟...أو زيه....هو الشهيد دا ...واحد ما فيش ألم الموت عليه ...الشهيد ده واحد بيدخل قبره الأرض ما بتكلش من قبره

عارف لما تكون انتا نايم ؟...وأمك تيجى تصحيك معاها طبق كبدة وطبق لحمة وطبق فراخ رومى وطبق ... انت تبص كده ...ايه ده ؟

اهو ده بالضبط احساس الدود لما انت هتدخل قبرك ...بالظبط ...وليمة... الدود هيهجم على الكبد و الكلية

ولو انت مت وانتا شاب هتبقى لسه بتلو ...الدود هيبقى فى سعادة لا تستطيع ان تصفها ...ولا تستطيع ان تتخيلها ... الشهيد مالوش دعوة بالكلام ده

جثث الكافرين وجثث الشهداء

لما كان الروس بيبادلوا جثث القتلى مع المجاهدين الشيشان ...فبعد اربع ايام فى المفاوضات ...جايبين بالكميرا التصوير

الجثث بتاعة الروس اتعفنت وهيا بتتسلم ... وجثث مجاهدين الشيشان زى ما هيا وهيا بتتسلم... سبحان الله العظيم

بعد 46 سنة ...جابر بن عبد الله شال جثة ابوه عبد الله بن حرام ..اللى استشهد فى احد عشان ينقلها لقاه زى ما هوا ...دمه زى ماهوا ...جسمه زى ما هوا ...الشهيد يا جماعة ...زائد إن الشهيد مالوش دعوة بفتن الموت

يتبع بإذن الله ...

*فرح*بالخير*

2-12-2008, 11:33 AM

ساعة المـــوت

ساعة الموت بيجى الماليكة تتزل ... رحمة او عذاب

ملك الموت بينزل... الشيطان بيجى ...عشان يفتنك فى آخر لحظة فى حياتك ...الملكين اللى كانوا على يمينك وشمالك بيسلموا بقى ...ويقولوا جزاك الله خيرا عن كل مجلس خير أجلستنا فيه ...أو يقولوا جزاك الله شرا عن كل مجلس سوء اجلستنا فيه ...ازاى ؟

ما هو الشاب اللى دخلهم القهوة ...ملكين دخلوا قهوة ...هما مكلفين بيه فى أى مكان

الشاب اللى وداهم نادى ...الشاب اللى وداهم غيبة

الشاب اللى دخل ملكين فى كل مكان معصية ...فى رحلة مختلطة

كل دول معاهم ملايكة حفظة ...بتكتب عليهم ...بيجوا فى الآخر خلاص ...مهماش طايقينه من كتر الأماكن اللى دخلهم فيها

الشهيد مالوش دعوة بالكلام ده خالص ...الشهيد لا عنده دعوة بفتنة الموت ...ولا ألم الموت ...ولا تحلل الجسد فى القبر

دى أيام الجهاد

يعنى الصحابة مذهولين ..."ولا الجهاد ؟" ...ولا الجهاد ...إلا حالة واحدة بس ...إيه هيا يا رسول الله ؟... "إلا رجل خرج بنفسه وماله فلم يرجع من ذلك بشيء " صحيح ...ضحى بكل حاجة عشان ربنا ...وفى روايه إلا أن يعقر جواده ويهريق دمه ...ضحى بكل حاجة ...وفى رواية لا إلا ألا يرجع ...خلاص ما هوش راجع تانى عشان ربنا

يعنى الأيام دى أيام جهاد ...يا جماعة الجهاد اللى الرسول قال عليه " ذروة سنام الإسلام " صحيح ...يعنى أعلى حاجة ...يعنى العبادة فى الأيام دى هتخليك فى ذروة سنام الإسلام ...هتخليك أعلى حاجة فى الدنيا كلها

العبادة ...العبـــادة ...عايزين نشجع ونسخن بقى للعبادة ...اسمعى معايا بقلبِك الحديث الرهيب دا هو ...اسمع معايا بقلبك الحديث المذهل دا هو ...وبقولك الأحاديث دى كلها صحيحة بإذن الله سبحانه وتعالى

فضل أيام الدنيا العشر

أفضل أيام الدنيا يا رسول الله ؟...أفضل أيام الدنيا ؟...ايوه ...افضل من رمضان ؟...افضل من رمضان اللى قولت لنا عليه : " من صام رمضان إيمانا واحتسابا غفر له ما تقدم من ذنبه" صحيح...مش عليه ذنوب

أفضل من رمضان اللى قولتلنا عليه :" من قام رمضان إيمانا واحتسابا غفر له ما تقدم من ذنبه" صحيح

أفضل من رمضان اللى بتفتح فيه أبواب الجنة الثمانية... فلا يغلق منها باب ...تغلق أبواب النار... فلا يفتح منها باب ...اللى فيه كل ليلة عتقاء من النار ...أفضل أيام الدنيا

أفضل من العشر الآواخر من رمضان

يا شباب جمهور أهل العلم إن العشر الأوائل من ذى الحجة أفضل من العشر الأواخر من رمضان ليل ونهار ...ليلهم أفضل ونهارهم أفضل

إزاى ؟...هوا ربنا سبحانه وتعالى اللى علمنا كده سبحانه وتعالى ...أفضل

يتبع بإذن الله ...

*فرح*بالخير*

2-12-2008, 11:36 AM

أكـــتـــر يا جماعة

يعنى شوفوا المجهود اللى بذلناه فى العشر الآواخر من رمضان ...اعتكاف ...وصيام وصدقات وزكاة ...وتراويح وتهجد وختمات ...وذكر ودعوة

يارب العشر أيام دول ...المجهود يبقى أكبر ..أكبر ؟...لانهم عند ربنا افضل من العشر الأواخر من رمضان... ولو مخرجتيش معايا الليلة غير بالكلمة دى كفاية عليا

ولو مخرجتش معايا الليلة غير بالكلمة دى... إنت خرجت بأخطر حاجة فى الموضوعان العشرة الأوائل من ذى الحجة أخطر من العشرة الأواخر من رمضان

شوفوا عملنا إيه فى دول يبقى هنعمل إيه فى دول ...أكـــتـــر يا جماعة

أفضل من ..ومن ...

أفضل من عاشورا اللى صيامه يوم (بتكفير) سنة ذنوب ...أفضل من عاشورا اللى ربنا شق فيه البحر لموسى ؟...أفضل أيام الدنيا أيام العشر

عارفين عشر ذى الحجة بالنسبة لباقى الأيام عاملين زى إيه ؟...زى مكة والمدينة بالنسبة لسان فرانسسكو ووسط أفريقيا كده بالضبط ...بالظبط

زى شرف باقى الأماكن على باقى بقاع الأرض بالظبط يا جماعة ...دى أعظم أيام الدنيا

أمال إيه أعظم أيام الآخرة ...أعظم أيام الآخرة آه ...ما هوا ما دام أعظم أيام الدنيا يبقى لازم نفتكر أعظم أيام الآخرة ...ليه ؟...هقولوكوا الوقتى ليه

أعظم أيــام الآخرة

أعظم أيام الآخرة ...يوم المزيد ...لما أنت فى الخيمة بتاعتك ...وأنتِ فى الخيمة بتاعتِك...لؤلؤة مجوفة 60 ميل طول و60 ميل عرض ...60 ميل يعنى كام ؟...90 كيلومتر...طوله 90 كم عرض ...إزاى ده ؟

ده الشقة اللى اتباعت خمسين مليون جنيه فى القاهرة كان مساحتها ألف متر ...الف متر... تخيل كل متر فيه نعيم أد إيه ؟

أمال داهيت كل متر فى ال90 كيلو طول وعرض النعيم فيه أد إيه؟

الملايكة تيجى تخبط عليك وتخبط عليكِ ...الله يستزيدكم ..تروح ...كثبان مسك ومنابر نور ...وكراسى من لؤلؤ وزبرجد ...كل واحد يجلس فى مكانه ...ويكشف الحجاب وننظر إلى وجه الله سبحانه وتعالى وننظر إلى نور وجه الله سبحانه وتعالى ...فما نعطى شئ أحب إلينا من النظر إلى وجه الله ...يعنى ده يوم المزيد ده أعظم أيام الآخرة ...آه ...يعنى عايز تقول إيه ؟

عايز أقول اجتهد فى أعظم أيام الدنيا عشان تفوز بأعظم أيام الآخرة ...اجتهدى فى أعظم أيام الدنيا عشان تفوزى بأعظم أيام الآخرة

يتبع بإذن الله ...

أمة اللـه

2-12-2008, 01:35 PM

جزاك الله خيرا وجعله فى ميزان حسناتك
وبارك الله فى الأخ حازم شومان وأكثر من أمثاله

*فرح*بالخير*

3-12-2008, 12:20 AM

بارك الله فيكى اختى يوكيكو على مرورك الرائع وتشرفت بمتابعتك

*فرح*بالخير*

3-12-2008, 12:38 AM

ولا أعظم أجرا من....

أفضــل أيام الدنــيا أيام العـــشر

اسمع الحديث الخطير دا هو ...اسمعى الحديث العظيم دا هو

قال رسول الله صلى الله عليه وسلم : "ما من عمل أزكى عند الله ولا أعظم أجرا من خير يعمله في عشر الأضحى" صحيح

"أزكى عند الله "...يعنى إيه ؟...يعنى لما صحيفتِك تطلع تتعرض على ربنا كده مثلا يوم أثنين أو خميس او أى يوم ...أكتر عمل الله يفرح بيكِ بسببه ...و يحبك بسببه هو ..الحاجات اللى عملتها فى عشرة ذى الحجة

"ولا اعظم أجرا "..يعنى إيه ؟...يعنى يوم القيامة لما تيجى تقف على الميزان بتاعك ...أكتر أعمال تلاقيها ثقيلة فى الميزان ...وتثقل ميزانك...هيا اللى عملتها فى عشرة ذى الحجة ...إيه ده ؟

أحـــــب إلى الله

واسمع الحديث الخطير ده كمان ...اسمعى الحديث الرهيب بس بقلبِك و بقلبك ...النهاردة عايزين نعيش بقلوبنا ...لأن النهاردة يوم إثبات حب الله .. النهاردة يوم البرهنة على حب الله ..النهاردة أكبر دافع... أكتر ناس اللى تتحرك قلوبها اللى بتحب الله سبحانه وتعالى

قال صلى الله عليه وسلم "ما من أيام أعظم عند الله ولا أحب إلى الله العمل فيهن من أيام العشر فأكثروا فيهن من التسبيح والتحميد والتهليل والتكبير " صحيح...سبحان الله والحمد لله ولا إله إلا الله

"أحب إلى الله "..أحب إلى الله دى ...مبتشعللكش ؟

"أعظم عند الله" ...دى مبتقومكيش ؟

"فأكثروا فيهن "..يارب ...أنا مش هبطل يارب

سبحان الله والحمد لله قولوها معايا الوقتى ...ولا إله إلا الله والله أكبر ..سبحانك يارب ...بتحبهم يارب ...مش هبطلهم ليل ولا نهار يارب ...مش هبطلهم يارب

اتذكروا فى القرآن أكثر من مــرة

يا إخوانى فى الله ...عايزين نعرف فضل الأيام دى ...رمضان اتذكر مرة فى القرآن فى سورة البقرة ...دول اتذكروا أربع مرات ...4 مرات عشرة ذى الحجة

قال تعالى : "وَالْفَجْرِ * وَلَيَالٍ عَشْرٍ " الفجر 1: 2

أقسم ربنا بعشر ذى الحجة ...والعظيم لا يقسم إلا بعظيم

طب ليه الفجر وليال عشر ؟... الفجر ده أعظم عبادة فى اليوم ..والليالى العشر أعظم عبادة فى السنة

الفجر ده أكتر عبادة مشهودة من الملايكة فى اليوم ...والليال العشر ده أكتر عبادة مشهودة من الملايكة فى السنة

يتبع بإذن الله ...

*فرح*بالخير*

3-12-2008, 12:45 AM

هوا فيه عقل يضيع المواسم دى ؟

الليالى العشر ...والشفع والوتر ...ربنا بيقول بعدها ...هل فى ذلك قسم لذى حجر ..لذى عقل ؟

هوا فيه عقل يضيع المواسم دى ؟...هو فيه عقل يبفرط فى المواسم دى ؟..طب وااللى بيفرط يارب؟...طب اللى ضيعها يارب ؟...طب اللى يستهتر بيها يارب ؟...يقول الكلمة اللى فى آخر السورة !!!!

قال تعالى : " كَلَّا إِذَا دُكَّتِ الْأَرْضُ دَكّاً دَكّاً " الفجر : 21 ...الأرض بتدك فجأة ...فجأة وأحنا ماشين على الأرض ...الأرض بتدك دك ورا بعضه

"وَجَاء رَبُّكَ وَالْمَلَكُ صَفّاً صَفّاً " الفجر : 22...والملايكة ... "وَجِيءَ يَوْمَئِذٍ بِجَهَنَّمَ يَوْمَئِذٍ يَتَذَكَّرُ الْإِنسَانُ وَأَنَّى لَهُ الذِّكْرَى " الفجر: 23

أحنا فين دلوقتى يا جماعة ؟..إحنا منتظرين العرض على الله ...إحنا فى اللحظة اللى رسول الله صلى الله عليه وسلم قال عليها : "يجمع الله الأولين والآخرين لميقات يوم معلوم قياما أربعين سنة شاخصة أبصارهم ينتظرون فصل القضاء" صحيح... 40 سنة واقفين على رجليهم ...شاخصة أبصارهم من اللى شايفينه ...مش قادرين يغمضوا عنيهم...ثم بعد هذا منتظرين فصل القضاء من الله سبحانه وتعالى ...40 سنة نفضل مستنين العرض ؟

طب ما رمضان 30 يوم ...وعشر ذى الحجة 10 أيام ..40 يوم ...نعبد ربنا فى 40 يوم ...ربنا يهون علينا الأربعين سنة بإذن الله ... طب الى مش هيعبد هيعمل إيه ؟..." يَقُولُ يَا لَيْتَنِي قَدَّمْتُ لِحَيَاتِي " الفجر : 24

"كَلَّا إِذَا دُكَّتِ الْأَرْضُ دَكّاً دَكّاً *وَجَاء رَبُّكَ وَالْمَلَكُ صَفّاً صَفّاً * وَجِيءَ يَوْمَئِذٍ بِجَهَنَّمَ يَوْمَئِذٍ يَتَذَكَّرُ الْإِنسَانُ وَأَنَّى لَهُ الذِّكْرَى " الفجر21: 23

يَا لَيْتَنِي قَدَّمْتُ لِحَيَاتِي

يارتنى ما ضيعتش المواسم دى ...يارتنى ما ضيعت عشرة ذى الحجة ...يارتنى ما ضيعت الفضل ده ...يا رتنى ما استهترت يا رتنى ...يارتنى ...بعد إيه ؟...بعد إيــــــه ؟

المرة التانية اللى ربنا ذكرهم فى القرآن

"وَوَاعَدْنَا مُوسَى ثَلاَثِينَ لَيْلَةً وَأَتْمَمْنَاهَا بِعَشْرٍ فَتَمَّ مِيقَاتُ رَبِّهِ أَرْبَعِينَ لَيْلَةً وَقَالَ مُوسَى لأَخِيهِ هَارُونَ اخْلُفْنِي فِي قَوْمِي وَأَصْلِحْ وَلاَ تَتَّبِعْ سَبِيلَ الْمُفْسِدِينَ " الأعراف: 142

" وَأَتْمَمْنَاهَا "...أهل التفسير بيقولوا العشر دى عشر ذى الحجة ...ملقتش ولا تفسير قال غير كده

"وَأَتْمَمْنَاهَا"...عشر ذى الحجة ..فتم ميقات...يا جماعة ربنا أعطى لموسى الميقات أربعين يوم ...وإحنا هنا الميقات 40 يوم ...30 فى رمضان وعشرة ذى الحجة ...مش هيتم الميقات بغير عشرة ذى الحجة

إحنا بنا وبين ربنا ميقات ...لما تممنا الجزء الأول ال30 يوم ..ربنا أعطانا العيد الصغير ..لما نتمم الجزء التانى ال10 أيام . يببقى 40 يوم ...ربنا .يدينا العيد الكبير ...إدانا العيد إنما العيد لمن أطاع الله ..العيد هو الفرحة الحقيقية بالطاعة يا إخوانى

"وَوَاعَدْنَا مُوسَى "...يا موسى إنت كلمتنى مرة من سنين طويلة ...لما كلمتك عند جبل الطور ياموسى ...وقولتلك روح لفرعون وهات بنى إسرائيل يا موسى ...إنت السنين كلها كان الواسطة بينى وبينك جبريل ...مكلمتكش تانى

السنين دى إنتا نفذت المهمة وخدتهم ...وفى شهر محرم فى 10 محرم فى السنة اللى إحنا فيها دلوقتى ...ختهم وعديت بيهم البحر الأحمر يا موسى ...أنا مكافأة لك هكلمك تانى..بس على شرط 40 يوم تقعد على جبل الطور تعبدنى ليل نهار ...متكلش متشربش متنمش ...تعبدنى بكل قوتك ...

آخر الاربعين يوم اللى هما عشرة ذو الحجة ...هكلمك يا موسى ...يااه....ياااااااااه ...يارب دى أيام رهيبة ..دى أيام خطيرة

يتبع بإذن الله ...

*فرح*بالخير*

3-12-2008, 12:49 AM

وثالث ورابع مرة فى القرآن...

يا جماعة دى أيام كلها روحانيات رهيبة يا جماعة ... ربنا بيقول : " وَيَذْكُرُوا اسْمَ اللَّهِ فِي أَيَّامٍ مَّعْلُومَاتٍ " الحج: 28...عشر ذى الحجة

"وَشَاهِدٍ وَمَشْهُودٍ " البروج : 3 ...المشهود اللى هوا يوم عرفة ...اللى الملايكة كلها بتشهده ...وربنا بيشهد الملايكة على عبادة المؤمنين فيه ...يا سلام ...يارب .. يعنى الموضوع كبير كده ؟.. آه

بس قبل ما أقول لك إنها أيام لاتعوض فى كسب الحسنات زى ما قولنا ..أيام لا تعوض فى حب الله زى ما قولنا ...فى تحصيل أجر المجاهدين...أنا عايز أفكركم تانى إنها أفضل من العشرة الأواخر من رمضان

هتعمل فيهم إيه ؟

ِشوفى فى العشرة الأواخر ...اليوم اللى قريتى فيه عشرة أجزاء ... وصمتى فيه وصليتى التراويح والتهجد ..وفضلتى طول اليوم ماتناميش ...تخيلى دول بقى ...هتعملى فيهم إيه ؟...تخيل دول ...هتعمل فيهم إيه ؟

أيام لا تعوض فى الكرامات فى النفحات والعطاءات

تخيلوا الأيام دى شكلها إيه ؟...وصفها إيه ؟

يا جماعة أنا عايز أقولكم حاجة خطيرة جدا ..الأيام دى هيا اللى ربنا نزل فيها الفداء على سيدنا إبراهيم وسيدنا إسماعيل ...يا سلام...آه ...الأيام دى هيا اللى ربنا كلم سيدنا موسى فى سورة الأعراف

الأيام دى هيا اللى ربنا تجلى للجبل فى سورة الأعراف ..كان يوم عرفة زى قول قتادة ..الأيام دى اللى ربنا كتب فيها الألواح لسيدنا موسى ..التوراة

الأيام دى هيا اللى ربنا قال لسيدنا محمد صلى الله عليه وسلم : "الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي " المائدة : 3 ...اللى ربنا كمل لنا الدين فيه...الأيام دى اللى فيها يوم الحج الأكبر

الأيام دى يا جماعة ...حتى روى إن سيدنا داود توبة الله عليه..."فَغَفَرْنَا لَهُ ذَلِكَ " ص : 25 ....روى ...بس الباقى ده ثابت إن شاء الله ..إنما دى رويت لا أعلم لها سند..يعنى تخيلوا الأيام دى شكلها إيه ؟...وصفها إيه ؟...الأيام دى عظمتها عند ربنا إيه ؟

ربنــا أغلى

ربنا وصف لنا عظمة الأيام دى فى القرآن ...وخلد الأحداث اللى حصلت فيها ..من ضمن الأحداث الرهيبة ...لما سيدنا إبراهيم قال :

"رَبِّ هَبْ لِي مِنَ الصَّالِحِينَ * فَبَشَّرْنَاهُ بِغُلَامٍ حَلِيمٍ " الصافات100 : 101

"فَلَمَّا بَلَغَ مَعَهُ السَّعْيَ " الصافات: 102...خلاص ..ابنه كبر ...ابنه بقى معاه... ابنه قدامه ...رايح جاى معاه فى الدعوة وفى نصرة الدين ...رايح معاه جاى معاه

"قَالَ يَا بُنَيَّ إِنِّي أَرَى فِي الْمَنَامِ أَنِّي أَذْبَحُكَ" الصافات : 102...كل ما انام يا بنى باشوف بذبحك...طب يارب ادتهولى ليه يارب ؟...مقلش كده انت ادتهولى ليه ...طب مكنتش تدهولى مكنتش اتعلق بيه ...لا ..تشوفه وتحبه وبعد كده انا اغلى عندك منه ..بعد ما تحبه... "إِنِّي أَرَى فِي الْمَنَامِ أَنِّي أَذْبَحُكَ" الصافات :102

يار ب ..يارب ...ابنى ولا ربنا ؟...نفسى ولا ربنا ... روحى ولا ربنا ؟...ربنــا...ربنــا أغلى

يتبع بإذن الله ...

*فرح*بالخير*

3-12-2008, 01:06 AM

عشـــان ربنا

اللى مش قادرة تسيب شهوة عشان ربنا ...اللى مش قادر يسيب شهوة عشان ربنا ... "فَانظُرْ مَاذَا تَرَى " الصافات :102...قمة الرحمة ... "قَالَ يَا أَبَتِ افْعَلْ مَا تُؤْمَرُ " الصافات :102...قمة الرحمة من الأبن بالأب ومن الأب بالإبن

هتصبر على إيه ؟

"يَا أَبَتِ افْعَلْ مَا تُؤْمَرُ"...هتعمل إيه يا إسماعيل ؟... "سَتَجِدُنِي إِن شَاء اللَّهُ مِنَ الصَّابِرِينَ " الصافات102...هتصبر على إيه ؟

هتصبر على علاقة مع بنت هتسبها ؟

هتصبر على نمرتين فى محمولك هتمسحهم ؟

هتصبر على ساعتين وقوف فى قيام ليل ؟

هتصبر على توبة ؟

..هصبــــر على الدبـــح ..هتصبر على الدبـــح عشان ربنا ؟... "إِنِّي أَرَى"..."فَانظُرْ مَاذَا تَرَى" ... "قال يَا أَبَتِ افْعَلْ مَا تُؤْمَرُ سَتَجِدُنِي إِن شَاء اللَّهُ مِنَ الصَّابِرِينَ " الصافات : 102

فورا لبيك اللهم ما لبيك

وفى اللحظة المرتقبة ياخد إبراهيم إسماعيل ويخرج بيه ...وأمه بتنظر مش عارفة هيوديه فين ...ويخرج ...وفى اللحظة المرتقبة ينيم إسماعيل ..."فَلَمَّا أَسْلَمَا" ...فورا لبيك اللهم ما لبيك

لبيك اللهم ما لبيك ...أنا حاطط السكينة على رقبة إبنى ...يارب لبيك اللهم لبيك لو هسيب ابنى وعنده سنتين فى الصحرا ...يارب ..."وَتَلَّهُ لِلْجَبِينِ " الصافات : 103.. لبيك اللهم لبيك....لو هضحى بكل شيئ فى حياتى عشانك يارب ..لبيـــك

"فَلَمَّا أَسْلَمَا وَتَلَّهُ لِلْجَبِينِ " الصافات: 103...نيم اسماعيل على وشه عشان ميشفهوش والدم بينزل من رقبنه ...وبدأ يذبح بالسكينة يوجها ويجبها ...ما فيش دم بينزل ...يوجها ويجبها السكينة مبتغرزش...يوديها ويجبها ابنه مابيموتش ... يوديها ويجبها...عشان يخلص ... "فَلَمَّا أَسْلَمَا وَتَلَّهُ لِلْجَبِينِ " الصافات : 103

الله أرحم بيكم من نفسكم

"وَنَادَيْنَاهُ أَنْ يَا إِبْرَاهِيمُ * قَدْ صَدَّقْتَ الرُّؤْيَا "الصافات : 104... خلاص يا إبراهيم ... "وَفَدَيْنَاهُ بِذِبْحٍ عَظِيمٍ " الصافات: 107 ...إننا أرحم بيكم من نفسكم ...أنا ممبتليكوش عشان أعذبكم ...أنا ببتيلكم عشان أرحمكم ...عشان أختبر صدق الإيمان اللى فى قلوبكم ...ده كان فى العشر الاوائل من ذى الحجة يا جماعة

كلمة يارب فيها ...إن شاء الله مجابة

أحداث عظيمة ...كرمات عظيمة ...يا إخوانى العشر الأواخر من رمضان ...ورمضان كله كان أبواب الجنة الثمانية مفتوحة على مصرعيها

إنما فى العشرة دول فيهم يوم عرفة ...4 مليون واحد كل واحد بيدعى ربنا ...عشرات الدعوات مئات الملايين من الدعوات ...الدعوات بتصعد لربنا فى نفس اليوم...وكلها بتجاب من عند الله بإذن الله و برحمة الله إلا أن يشاء الله سبحانه وتعالى

يعنى زى ما رمضان أبواب الجنة كلها مفتوحة على مصرعيها ... أيام عشر ذى الحجة أبواب الخزاين كلها مفتوحة على مصرعيها

كلمة يارب فيها ...إن شاء الله مجابة ...كلمة يارب تصعد إلى السماء ...تفريغ الكربات فيها إن شاء الله عظيم ..بس إحنا نعبد ربنا سبحانه وتعالى

يتبع بإذن الله ...

*فرح*بالخير*

3-12-2008, 01:11 AM

أيام لا تعوض فى مضاعفة الحسنات

ابن عباس لما قال سبعمائة ضعف على الحسنة ...والأمام الأوزاعى والآثار اللى قولتهالكوا يعنى إيه ؟... يعنى يا جماعة نخرج منها أغنى من بلجتس يا جماعة ...يعنى يا جماعة ناكل بقلاوة يوم القيامة ...نشتغل بقى ...نجتهد بقى ...نقفز بقى ..نتقدم نتطور ...نتقدم فى علاقتنا مع الله سبحانه وتعالى

الأيام دى الناس منمتش فيه .. سيدنا موسى فضل العشر أيام صايم بيعبد ربنا ...سيدنا إبراهيمبنى فيهم الكعبة وعمل فيهم المناسك ...وكان هيذبح ابنه اسماعيل عليه الصلاة والسلام

سعيد بن جبير كان بيقول : "إذا جاءت ليالى العشر من ذى الحجة فلا تطفئوا السرج " ...ما فيش نوم ...ما عدتش فيه نوم ...خلاص دى أيام عبادة وشغل ...يعنى اللى محجش أدامه فرصة أهو ..اللى محجش ربنا عوضه أهو ...يعنى أعمل إيه ؟

زى اللى بيحج

يعنى زى اللى بيحج هنعمل هنا يا جماعة ..اللى بيحجوا هيقولوا لبيك اللهم لبيك ...جاين لك يارب وأحنا هنا هنقول لبيك ..شعارنا هنا وهناك لبيك ..جاين لك يارب هنفذ أمرك ...يارب

اللى بيحجوا هيسعوا بين الصفا والمروة ... وأحنا هنا هنسعى بكل وقتنا فى العبادة والصلاة والصوم والذكر

اللى بيحجوا يا جماعة هيطوفوا حوالين الكعبة ...إحنا قلوبنا هطوف حوالين العرش ...شكر الله

اللى بيحجوا يا جماعة هيروحوا لمنى يرموا الجمرات ...يرجموا الشياطين وإحنا هنا يا جماعة هنرجم شياطين الإنس والجن ...نقول ما فيش فى حياتنا غير ربنا

اللى بيحجوا هيقفوا فى مزدلفة ...من الزلفى يعنى القربى إلى الله ...وإحنا هنتذلل ونتقرب إلى الله هنا فى كل طاعة

اللى بيحجوا هيقفوا فى عرفة ..وإحنا هنا هنعرف يعنى إيه ؟...يعنى ننزل المساجد نعتكف ...زى ما الفقهاء قالوا وزى كبار التابعين والسلف قالوا ...هننزل فى المساجد نعتكف يوم عرفة ...يوم عرفة نعرف ...يعنى ننزل إحنا كمان نعبدك يارب فى يوم عرفة ليل نهار يارب ...طول اليوم يارب

يتبع بإذن الله ...

*فرح*بالخير*

3-12-2008, 01:14 AM

تجديد الشحن

.يعنى إحنا هنجتهد أشد الإجتهاد ...أيام لا تعوض ...لا تعوض ياجماعة فى تجديد الشحن

تجديد الشحن ...ياللى خرجت فى رمضان ووقعت

ياللى لسه فى نمرتين على محمولك ...مش عايز تمسحهم

يا اللى لسه فيه شريطين فى عربيتك ...مش عارف تشيلهم

ياللى لسه فيه إختلاط فى حياتِك ...مش قادرة إنك تتخلصى منهم

ياللى لسة فيه معاصى ...مش قادرين تسبوها

ياللى لسه متردد متذبذب

ياللى عايز كمان زقة ...الإيام دى جاية تجدد الشحن ...زى بالظبط كده سلك الكهربا ...كل شوية يدخل فى عمود نور ليه ؟...يجدد الشحن بتاعه ...فيه عمود فى رمضان وبعد كده فى عشر ذى الحجة

تثبــيت و تطهيـــر

أحد إخوانى من الدعاة ... ربنا يبارك في الدعاة جميعا ...يقول أنا التزمت فى رمضان ...كنت هاقع بعد رمضان ...خلاص جاى أقع ...قامت جاية عشرة زى الحجة ..اتسندت لغاية دلوقتى ما شاء الله ...لا يزال على الطريق ربنا يثبتنا جميعا

الأيام دى التثبيت رهيب على الطريق...تثبيت عظيم على الطريق إلى الله سبحانه وتعالى

يا جماعة ده فيه ناس مستحمتش من رمضان ...شهرين قلبها متغسلش من أيام رمضان ...نغسل بقى ...نطهر بقى ...ننضف بقى ...الأيام دى لا تعوض فى التوبة إلى الله ...بعد عرفة ...بعد تكفير سنتين بيوم صيام ..لسه بقى فى النار 999 من كل 1000 ...هيا ذنوبنا دى إيه ؟

لبيك ثم ماذا ؟

ياجماعة الأمة بتروح هناك ويهتفوا لبيك اللهم لبيك ...لبيك ثم ماذا ؟

المرابى بيروح هناك يهتف لبيك ...ويرجع يرابى !!!

الموظف المرتشى بيروح هناك يهتف لبيك ...ثم يرجع يرتشى !!!

الراقصة بتروح وترجع ترقص تانى !!!

لبيك ثم ماذا ؟

الأمة بتروح تقول لبيك ...وهنا بنقول لبيك ...ثم ماذا ؟

بنرجع زى ماكنا ...لأ ...عايزين نتغير بقى ...عايزين الأيام دى تأثر فى قلوبنا بحق وحقيقى بقى

افتكـــر الهدف ...واحــذر الذنوب

أول حاجة ربنا بيخلينا نستلمها فى الحج ...الحجر الأسود ...أول ما ندخل الكعبة ونبدأ الحجر الأسود بنستلمه ...ليه ؟

ربنا بيقولك شوف ده من الجنة ...افتكر الهدف اللى إنت بتشتغل عشانه ...افتكر الهدف قبل ما تشتغل ... افتكر الهدف عشان تشتغل بكل طاقتك ...وشوف اسود إزاى اسود بذنوبك وذنوبكِ ...اسود بإذنوبنا ...شوف الذنوب بتعمل إيه ؟

اهوا انت اسودت حياتك واضلمت بسبب الذنوب ...عايز تنور تانى؟...عايز تفتح تانى ؟...عايز تزهزه تانى ؟

تـــــوب لربنا سبحانه وتعالى ...عايزين نتوب بقى فرصة إن أحنا نفتح صفحة جديدة مع ربنا ...فرصة فرصة يا جماعة

يتبع بإذن الله ...

*فرح*بالخير*

3-12-2008, 06:27 PM

هوا مش خايف ؟!؟!!!!!!!!!!!!!

هوا مش مرعوب إزاى !!!!!!!؟

كنت سمعت خبر من يومين ...أحد المغنين جاى العيد عندنا عشان يغنى ..يعمل حفلة قلت يارب ...يارب ...هوا مش خايف منك يارب ؟

هوا مش خايف إنه يموت قبل الحفلة دى؟... ويتحاسب على ال9 شهور حفلات اللى حاجزهم فى ال9 شهور الجايين دول ؟

ده المتبرجة اللى كاشفة شعرها ...اللى بتقف قدامه فى الحفلة من 10 الآف واحدة متبرجة ...ملعونة طرودة من رحمة ربنا ...زى ما أخبر النبى صلى الله عليه وسلم ...مطرودة من رحمة ربنا زى إبليس

إمال اللى واقف ومخلى كل الالوف دول يرقصوا بقى ...واقف على الإستاند ...على خشبة المسرح بيغنى ...ده عقابه عند ربنا إيه ؟

إنتا مش خايف تحشر يوم القيامة؟...تحشر يوم القيامة مع شارون ؟

انت قاعد تضرب دينك بالمدافع والقذائف ...فى كل مكان تحارب الإسلام...تحارب الدين ... يا جرأتك على ربنا يا قلبك ...إنت مش مرعوب إزاى ؟...إنت مش خايف من انتقام ربنا إزاى ؟

ده انتا لو شتمت لوا مش هتعرف تنام فى بيتك ...هتخاف من انتقامه منك ...طب انتا حاربت ربنا... مش خايف من ربنا ؟...مش خااايف منه إزاى ؟

مش خايف وإنت واقف فى الهواء الطلق ...ماسك المايك كده ...وقاعد تغنى والناس قاعدة ترقص ... مش خايف نظرة غضب من ربنا تقصمك وإنت واقف تغنى...وربنا يخليك عبرة قدام الناس دى فى الدنيا ؟

ومنتاش خايف يوم القيامة ...مش خايف ربنا يجيبك قدام كل اللى حضروا لك ...قدام كل اللى رقصوا قدامك ...يجيبك قدامهم ينكل بيك قدامهم...يخليك عبرة قدامهم قبل ما يحاسبهم إنهم حضروا لك ...إنت مش خايف إزاى ؟

انت بتحارب ربنا !!!!

انت فاكر انك بتعصى ربنا ...اللى بيعصى ربنا اللى بيبص نظرة حرام ...اللى بتبص بصة حرام ...انتا بتحارب ربنا...انت انت بتكره ربنا ...ايوه انتا بتكره ربنا .. لان مافيش واحد بيحب ربنا هيدفع تذكرة حفلتك ...ما فيش واحدة بتحب ربنا هتحضر لك ابدا

عارف مين هيحضر لك ؟

انتا مش هيحضر لك غير اللى بيكرهوا ربنا زيك ...انتا مش هيحضر لك غير اللى متمردين على ربنا زيك ...انتا مش هيحضر لك غير اللى مدى ضهره لربنا ...اللى معاندين ربنا ...اللى جاحدين نعم ربنا

فى حرب لربنا بعد كده ؟

يعنى إنت شهرتك كلها مبينية على إن اللى بيكرهوا ربنا يكتروا ...إنت شهرتك كلها وثروتك كلها مبينية على إن المعاندين ربنا يكتروا

لو دول قالو إنت هتقفل ...مش هتكسب حاجة ...مش هيبقى عندك أى شهرة ولا أى ذكر ...إنت كل ارتفاعك على إن الناس تكره ربنا أكتر ...وتعرض عن ربنا أكتر ...فى حرب لربنا بعد كده ؟...فى تمرد على ربنا بعد كده؟

إنتا بقيت سد بين الناس وبين ربنا

إنت تعرف ..فيه شباب كتير مردوش يحضرولك ...عارف ليه ؟...بس هما نفسهم يحضروا لك جدا ...عارف ليه ؟
لإنهم أعدوا يفكروا جدا فيه صراع جواهم هوا ولا ربنا ؟...هوا ولا ربنا ؟...فى الآخر قالوا لا ربنا ...انت عارف يعنى إيه ؟

انت بقيت يا انتا يا ربنا ...إنتا بقيت سد بين الناس وبين ربنا ...انت تعرف ممكن ربنا يعمل فيك إليه ؟

فوق ..فوووق ..بطــل تمرد على ربنا ...متخليش حد يضحك عليك ...انت متمرد ...متمرد على اللى خلقك ...محارب للى خلقك !!!

يتبع بإذن الله ...

*فرح*بالخير*

3-12-2008, 06:29 PM

بقى منتشــر !!!

يا جماعة العشرة الأوائل من ذى الحجة فرصة ...إن إحنا نتوب ...إن إحنا ننضف ...إن الامة كلها تنضف ...إن الأمة كلها تفوق ...إن الأمة كلها ترجع لربنا

يا جماعة ما فيش سبب من أسباب إهلاك الأمم ...إلا بقى موجود عندنا

يا جماعة أمة شعيب ربنا أهلكهم بسبب الغش ...والغش بقى عندنا منتشر

ثمود ربنا أهلكهم بسبب الخمور والفجور... حتى اللى دبح الناقة بتاعة سيدنا صالح كان شارب الخمرا قبلها ...والفجور بقى منتشر

عاد ربنا اهلكهم بسبب الكبر على النصيحة...أنا كده كويس ...محدش يكلمنى !!! ..والكبر على النصيحة بقى عندنا منتشر ... إحنا فينا إيه من من أسباب إهلاك الأمم ما عدتش موجود عندنا ؟

اللى حاطا برفان !!!

عايزين نفوق ...نفووق يا أختى ...ياللى ماشية فى الشارع حطا بارفان

إنتى حطا بارفان وفرحانة ليه ؟...فرحانة وماشية وده يبصلها ...وهيا فرحانة جدا ...يا بنتى هوا انتى هتغيرى إسم عريسك اكتب من 500 ألف سنة ؟...إن كان اكتب عريس يعنى ...فرضا إن اكتب عريس يعنى اسمه من خمسين ألف سنة ...مش هيفرق معاه بقى إنك هتحطى ونمنشورو ولا أفترشيف ولا هتحطى ثلاث خمسات بالليمون ...ما هش فارقة يا بنتى فى اسم العريس

فرصة يا جماعة ...فــــرصـــة

لصفحة جديدة مع ربنا ...أيام لاتعوض فى التوبة إلى الله ...يعنى أنا عايز أقول إيه ؟

عايز أدخل معاكم فى الكلام الجد بقى ...عاوز أدخل معاكم فى الشغل الخطير بقى

أنا عايز أقولكم قبل ما أدخل معاكم ...إحنا البرنامج بتاعنا فى العشر الأوائل ذى الحجة إن شاء الله ...اللى هيبدأو إن شاء الله فلكيا يوم السبت الجاى ( 29 - 11 - 2008 ) ... يعنى مغرب الجمعة الجاى إن شاء الله

يبقى إذا يا إخوانى لما ربنا بيسأل الملايكة لما بيطلعوا لربنا ...كيف وجدتم عبادى ؟...بيقولوا له إيه ؟...إنتا لما ربنا هيسأل عنك فى الاعشر الأوائل من ذى الحجة ...كيف وجدتم عبادى؟

يتبع بإذن الله ...

*فرح*بالخير*

3-12-2008, 06:30 PM

لو بيحبِك ...هيخليكى تعبديه

الراجل اللى صحى ...لقى الجارية بتاعته بتصلى قيام ليل ...وبتقول "يارب بحبك لى اغفر لى" ...فبيقلها قولى "بحبى لك "...قالت له "لا ...لولا حبه لى لما أقامنى وأنامك" ...لو بيحبك... هيقومك

لو بيحبِك ...هيخليكى تعبديه

لو بيحبك ...هيستعمل لسانك فى ذكره العشر أيام دول

هيستعمل جوارحك فى طاعته العشر أيام دول

هيستعمل عينيكى فى قراءة القرآن العشر أيام دول

لو بيحبك ...مش هيخذلك ...مش هيخذلك

اهجم ...خليك هجوم

طب خايف إن أنا أفتر ...لا متخفش اهجم ...احسن وسيلة اللى بيهجم ما بيدفعش ...اهجم ...خليك هجوم

يا جماعة الملتزمين ...عاملين زى فريق الكرة ...فريق الكرة فى ناس مهاجمين بيهجموا ...وفى ناس مدافعين قاعدين ورا ...وفى خط وسط فى النصف...لا كده ولا كده ...وفى راس حربة بيفتح السكك المقفولة ...وربنا بيجيب عليه الفتوحات للصف كله ...وفيه متفرجين قاعدين ...إنت إيه ؟

عايزين نجيب آخرنا

آيام لا تعوض ...لا تعوض فى الحسنات...لا تعوض فى صفحة جديدة مع الله ...لا تعوض فى ثواب الجهاد...لا تعوض فى النفحات والعطاءات ...لا تعوض فى مضاعفة الأعمال ...لا تعوض...يبقى إزاى نضيع الأيام دى ؟

يا إخوانى رمضان من تانى ...صيام من تانى ...قيام من تانى ...ختمات قرآن من تانى ...ذكر من تانى

بس رمضان كان الشياطين مصفدة ...فكانت العبادة سهلة ...هنا الشياطين مش مصفدة ...يعنى العبادة أصعب ؟..آه ..بس الثواب أعلى ...يبقى العبادة أصعب عشان مش أى حد ممكن ينال كل الموضوع ده ..مش أى حد يقدر ...لكن الثواب أعلى

فهوا ده اللى يحفزنا بإذن الله سبحانه وتعالى ...عايزين ندخل على المشاريع يا جماعة ...المشاريع بتاعتنا إيه ؟...عايزين كل واحد ياجماعة يبقى مالتى مليونير

واحد صاحب مالتى جروب ...مجموعة مشاريع ...بس مشاريع أخراوية مش دنيوية ...أنا معايا ليكوا مجموعة من المشاريع ...أنا عايز تركز معايا بقلبك ...أنا عايز تركزى معايا بقلبِك ...مجموعة من المشاريع ...وبإذن الله سبحانه وتعالى عايزك تركزى معايا كويس جدا جدا جدا ...عشان ده برنامج العمل بتاعنا...دى مشارعينا

شعارنا فى الإيام دى ..."يَا لَيْتَنِي قَدَّمْتُ لِحَيَاتِي" الفجر : 24...الحقى قبل ما تقوليها ...شعارنا فى الأيام دى لبيك اللهم لبيك ...صفحة جديدة مع الله فى أفضل أيام الله

عنوان الورقة صفحة جديدة معاك يارب ...شعارنا فى الأيام دى رمضان من تانى ...مرة تانية ...هنعمل إيه فى الآيام دى ؟ ...عايزين تخطيط بقى مش كلام هرجلة بقى وخلاص

يتبع بإذن الله ...

*فرح*بالخير*

3-12-2008, 06:32 PM

مشروع ختم القرآن

أول مشروع بقى يا جماعة ...مشروع ختم القرآن ...ختم القرآن؟...آه...الحرف بعشر حسنات ...عايزة تختمى القرآن ؟...تقرأى فى اليوم 3 أجزاء ...يعنى تاخدى فى اليوم نص مليون حسنة ...نص مليون حسنة ؟

استنى ...لا ...دا الموضوع بيضاعف لسبعمائة ضعف فى هذه الأيام ...لو جيتى تحسبيها ...هتلاقى الصفحة الواحدة ب 4 مليون و200 ألف حسنة

كل الثواب ده ممكن الواحد ياخده ؟...آه ...تخيلوا بقى !!

طب هنعمل إيه ؟...3 أجزاء فى اليوم؟..آه

كل آية فيه دوا

طب الثواب إيه ؟...الثواب ؟....يا جماعة القرآن عامل زى الصيدلية ...صيدلية ...كل آية فيه دوا لمرض عندنا ..انتى لما بتعدى أى آية متقريهاش أو متفهاميهاش ... انتى اتحرمتى من دوا هيعالج مرض عندك

إحنا نعامل القرآن كده !!!

ابن مسعود بيقول : " لا تهزوا القرآن هز الشعر ولا تنثروه نثر الدقل "

الدقل ده : التمر اللى ما لوش قيمة ..اللى مالوش ثمن

البياع بتاع التمر تلاقيه عامل تمر غالى حطه فى علب ...وتمر حطه فى سيلوفان ...الدقل ده تلاقيه راميه كده...مالوش ثمن لإنه أقل حاجة بيربح منها

إحنا نعامل القرآن كده !!!...إنه أقل حاجة بنربح منها !!!...إنه أقل ربح فى حياتنا ؟..لا يا جماعة ...ده أعظم ربح فى حياتنا يا جماعة ..ده أكبر ربح فى حياتنا ...أوعى تعاملوا القرآن زى معاملة تاجر التمر للدقل ياجماعة

ده فيه تمر ..التمراية بتتلف فى سلوفاناية ..هو دا اللى إحنا عايزينه ...كل آية تبقى فى قلبك ...فى سويداء قلبك

يتبع بإذن الله ...

*فرح*بالخير*

3-12-2008, 06:32 PM

القرآن ..الرفيق المخلص

القرآن مش هيسيبك فى الدنيا ...زى أسيد بن حضير وهوا بيقرأ القرآن ...نزلت السحابة ..الملايكة نزلت ...يبقى الكرامات فى الدنيا

مش هيسيبك وإنت نازل القبر...الرسول عليه الصلاة والسلام لما كان اثنين يستشهدوا فى غزوة ...ينزل الأول للقبر اللى أحفظ للقرآن

مش هيسيبك لحظة البعث ...يوم القيامة وإنت طالع يقول لك أنا صاحبك

القرآن مش هيسيبك عند الجنة ...قال رسول الله صلى الله عليه وسلم : "

يقال لصاحب القرآن اقرأ وارق ورتل كما كنت ترتل في دار الدنيا فإن منزلتك عند آخر آية كنت تقرؤها " صحيح

مش هيسيبك القرآن فى الحر الرهيب ...تيجى البقرة وآل عمران ...سحابتين من فوقك...قال رسول الله صلى الله عليه وسلم : " يأتي القرآن وأهله الذين كانوا يعملون به في الدنيا تقدمه سورة البقرة وآل عمران يأتيان كأنهما غيابتان وبينهما شرق أو كأنهما غمامتان سوداوان أو كأنهما ظلتان من طير صواف يجادلان عن صاحبهما" صحيح

حتى لو قرأت القرآن وبكيت ...فى ظل عرش الله.. ." ورجل ذكر الله خاليا ففاضت عيناه" صحيح

القرآن مش هايسيبك ساعة العرض على الله ...يبقى حجاب ليك وستر ليك من النار يشفع ليك عند ربنا..."يقول القرآن رب منعته النوم بالليل فشفعني فيه"صحيح

صاحب مخلص بس متسبهوش

هجر القرآن!!!

عشان ميسبكش متسبوش ...وإلا هتلاقى الرسول صلى الله عليه وسلم جاى يوم القيامة ...هتلاقى شكوة متقدمة لمين ؟...لله ...امتى ؟...يوم القيامة ...فى مين ؟...فيكِ..بيقول إيه ؟...قال تعالى : "وَقَالَ الرَّسُولُ يَا رَبِّ إِنَّ قَوْمِي اتَّخَذُوا هَذَا الْقُرْآنَ مَهْجُوراً "
الفرقان: 30

اللى إحنا بنعمله مع القرآن مش هجر ...إمال إيه الهجر ؟...لو إحنا اللى بنعمله مع القرآن مش هجر ...إمال الهجر إيه ؟...حد يعرفلى الهجر؟...غير اللى إحنا بنعمله مع القرآن يا جماعة

المشروع الأولانى مشروع ختم القرآن ..مشروع حسناته مهولة

يتبع بإذن الله ...

*فرح*بالخير*

3-12-2008, 06:33 PM

المشروع التانى مشروع الذكر

مشروع الذكر ده ...الأيام الأولى من ذى الحجة ...دورة تربوية مكثفة فى الذكر ...الذكر يا جماعة

قال رسول الله صلى الله عليه وسلم : " ألا أنبئكم بخير أعمالكم وأزكاها عند مليككم وأرفعها في درجاتكم وخير لكم من إنفاق الذهب والورق وخير لكم من أن تلقوا عدوكم فتضربوا أعناقهم ويضربوا أعناقكم ذكر الله"صحيح الجامع

‌

الرسول بيقول للصحابة ..."خير أعمالكم"...يعنى إيه ؟...يعنى أما تدخلى الجنة فيه سؤال بخمسة سؤال بثلاثة سؤال باثنين ...سؤال بعشرين ...ده السؤال أبو عشرين

"خير أعمالكم" ..."وأزكاها عند مليككم " ....لما صحيفتك تطلع لربنا... أكتر حاجة هو يحبها هيا العمل ده

"أرفعها فى درجاتكم " ...يعنى لما يقولك يا عم عايزين نطلع على وش الدنيا ...دى تطلعك على وش الجنا بقى

" ألا أنبئكم بخير أعمالكم وأزكاها عند مليككم"صحيح

"وخير لكم من إنفاق الذهب والورق"........لو كل الستات اللى قدامنا طلعوا كل ذهبهم الليلة ...ووزعوه على الفقرا الليلة ...لا ده أحسن ...إيه ده ؟

"وخير لكم من أن تلقوا عدوكم فتضربوا أعناقهم ويضربوا أعناقكم"...يعنى إن إحنا نخرج نجاهد الليلة ؟...هو إيه يارسول الله ؟...ذكر الله

أوعى الدنيا تخليك تنسانى

يارب انت تحب الذكر كل ده ليه يارب ؟...اصل كلمة ذكر دى يعنى... يعنى خليك فاكرنى ...متنسانيش...خليك فاكرنى ...أوعى الدنيا تخليك تنسانى

قبل ما تاكل اذكرنى ...بعد ما تاكل اذكرنى ...فيه ذكر ...وإنت داخل الخلاء فيه ذكر وإنت خارج من الخلاء فيه ذكر

وإنتا جاى تركب عربيتك خليك فاكرنى ...وإنت بتنزل منها خليك فاكرنى ...داخل بيتك على مراتك خليك فاكرنى ...خارج من بيتك لشغلك ومصالحك خليك فاكرنى

صاحى من النوم أذكار الصباح خليك فاكرنى ...جاى باليل أذكار المساء خليك فاكرنى ...خليك فاكرنى قبل ما تشرب ...وبعد ما تشرب خليك فاكرنى ...كل ما تاكل وبعد ما تاكل ...وقبل ما تنام ...وبعد ما تصحى ...خليك فاكرنى فى كل لحظة فى حياتك

يارب اجعلنى لا أنساك ...هوا ده الذكر إنك ما تنسهوش ... تقولى لربنا لا أنســـــــاك...لا أنساك أبدا يارب

" وأنا معه حين يذكرنى " صحيح

يا إخوانى جلسة الضحى ...ربنا خلى ثوابها زى الحج لإن ده ذكر وده ذكر ...شوف ربنا بيحب الذكر لدرجه إيه

فى الحديث القدسى "وأنا معه حين يذكرنى" صحيح ...معه ؟...سيدنا موسى لما قال "إِنَّ مَعِيَ رَبِّي سَيَهْدِينِ " الشعراء : 62...شق له البحر...أنا معه ...رئيس الجمهورية يتفرغ يوم ليك... ماشى معاك

أما لو لم يوفقـــك

عديت حملة مرور ...الظابط يوقفك ...دخلت مصلحة حكومية ...موظف يغلس عليه ...دخلت لجنة شفوى ...الدكتور يثقل عليك فى الأسئلة

الملك الجليل بيذكرك !!!

قال الله تعالى :"وإن ذكرني في ملأ ذكرته في ملأ خير منهم" صحيح

تخيل... ده اللى ببيذكر اسمه فى صفحة الوفيات بيبروزوه... واللى بيذكر اسمه فى صفحة الحوادث ياسلام سلم بقى ...ده دخل التاريخ ...ما بالك لو الملك الجليل بيذكرك للملأ الأعلى ...تبقى مشهور فى السبع سماوات

يتبع بإذن الله ...

*فرح*بالخير*

4-12-2008, 08:21 PM

فأكثـــروا ..

الذكر ياجماعة ...ذكر الله ...قال رسول الله صلى الله عليه وسلم :"فأكثروا فيهن من التسبيح والتحميد والتهليل والتكبير " صحيح...قولوا معايا سبحان الله والحمد لله والله أكبر ولا إله إلا الله

يعنى ده ثوابهم إيه يا رسول الله ؟

صح عن رسول الله صلى الله عليه وسلم إن كل كلمة منهم بشجرة فى الجنة ... أن رسول الله صلى الله عليه وسلم مر به وهو يغرس غرسا فقال " يا أبا هريرة ما الذي تغرس ؟ " قلت " غراسا لي " قال " ألا أدلك على غراس خير لك من هذا ؟ " قال " بلى يا رسول الله " قال "قل سبحان الله والحمد لله ولا إله إلا الله والله أكبر يغرس لك بكل واحدة شجرة في الجنة " صحيح

كل يوم بتعمل حديقة !!!

إيه ده ؟...يعنى الأربع كلمات بأربع شجرات فى الجنة ؟..آه ...يعنى لو قلتهم 100 مرة كل يوم ب 400 شجرة ...آه ...لو قلتهم 1000 مرة كل يوم ...4 الآف شجرة ...آه ...وإقطاعى زى إقطاعين الدنيا كده ...يبقى فى الجنة عندك الآف الفدادين

ولو صليت صلاة التسابيح كل يوم فيهم ...بتقول 300 مرة فيهم سبحان الله والحمد لله ولا إله إلا الله والله أكبر ... اسأل أى حد عن طريقتها عشان الوقت بتاعنا ...300 مرة يعنى ألف و200 شجرة فى الجنة

تخيل إنك كل يوم بتعمل حديقة ... 1200شجرة فى الجنة ...مشروع خطير جدا يا جماعة ...مشروع الذكر ده مشروع فى غاية الخطورة ...العشر أيام دول أيام الذكر يا إخوانى ...أعظم عمل صالح نعمله فيهم هوا الذكر

ثابت البنانى بيقول "هذه أيام الذكر "...بس اقعد اذكر ربنا ليل نهار

يبقى المشروع الثانى... مشروع الذكر ..والذاكرين الله

يتبع بإذن الله ...

*فرح*بالخير*

4-12-2008, 08:24 PM

المشروع الثالث لبيك اللهم لبيك

إيه ده؟...مشروع التربية الفورية ...مش هما هناك أول ما ربنا بيناديهم بيقولوا لبيك اللهم لبيك...إحنا هنا أول ما ربنا هينادينا هنقول لبيك... يعنى إيه ؟

أول ما الآذان يقول الله أكبر ...تقول لبيك اللهم لبيك ...تجرى على الجامع... تقطع الدنيا ..جرب بقى إنك تلبى ..جرب إنك تطبق عملى ...يا جماعة إحنا أمة كلام ؟...إحنا بتوع كلام ...جربوا بقى ...نجرب عملى يا جماعة

اول ما نسمع الله اكبر بنقطع

والله العظيم لما الواحد يجرب فى حياته ...مسألة إن أول ما الآذان يقول الله أكبريسيب اللى فى ايده ويروح الجامع ...والله يا جماعة الواحد مبيبقاش عارف فيه إيه ؟...فى قلبه

بتصلى السنة تلاقى عايز تبكى ...تيجى تدعى ربنا تلاقى ...انت مش عارف بتبكى ليه ؟

إنتا حاسس مجرد انك قطعت الدنيا ...او قطعت المذاكرة ...او قطعت مصالحك ...او قطعت واقفتك مع مراتك ...قطعت كل حاجة عشان كلمة الله أكبر ...ربنا بيملى قلبك كمية نور وكمية حب ليه سبحانك يارب

مشروع التلبية الفورية ...مشروع اول ما نسمع الله اكبر بنقطع

مشروع وليمة كل صلاة

ده يترتب عليه المشروع اللى بعده ...وهوا مشروع وليمة كل صلاة ...وليمة ؟...آه يعنى تخيل كده لو قالك كل ماتنزل الجامع فيه وليمة كده ...خروف مشوى هتاخده ...مين اللى مش هينزل الجامع ؟

محدش... اهوا ربنا سبحانه وتعالى يعد لك نُزل... قال رسول الله صلى الله عليه وسلم: " من غدا إلى المسجد أو راح أعد الله له نزله من الجنة كلما غدا أو راح" صحيح

كل ماتروح المسجد وتيجى ...نزل ...زى وليمة ...زى مكان عظيم بيعد ليك فى الجنة ...وليمة عظيمة بتتعد ... يعنى إيه يا جماعة وليمة ؟

يا إخوانى لو انتوا عملتوا مشروع التلبية الفورية دى... ونزلتوا الجامع هتلحقك الثواب ... أول حاجة عد معايا الثواب اللى إحنا غافلين عنه

1.ثواب الوضوء

الوضــوء ...لما المية بتنزل إنتا مش بتنشف مية ...إنتا بتنشف ذنوب ...عشان كده اسمه الوضوء من الضياء ...بتنور...بتنور لإن ذنوبك نزلت

2.ثواب ترديد الآذان

3.ثواب إنك تدعى للنبى وتصلى عليه بعد الآذان وده بتنال شفاعته

4.ثواب إنك أنتا بتبكر للمسجد

5.ثواب إنك بتمشى للمسجد وكل خطوة بترفع درجة وتحط خطيئة

6.ثواب إنك بتلحقك تدعى بين الآذان والإقامة ...دعاء لا يرد

7.ثواب إنك بتصلى السنة القبلية ...12 ركعة نفل فى اليوم ببيت فى الجنة

8.ثواب إنك بتلحق الصف الأول

9.ثواب إنك بتلحق تكبيرة الإحرام

10.ثواب إنك أنتا بتبقى خاشع فى الصلاة

11.ثواب إنك بتلاقى نفسك قادر تصلى السنة البعدية

...ثواب...ثـــواب ...ثواب رهيب بنضيعه ليه ؟...بتضيع كل ده ليه ؟

يتبع بإذن الله ...

*فرح*بالخير*

4-12-2008, 08:25 PM

كفرات الخطايا

الرؤيا اللى الرسول صلى الله عليه وسلم رأها ...ربنا سأله فيها ...فى الرؤيا ...قال الله تعالى : " فيم يختصم الملأ الأعلى ؟"... قلت "في الكفارات والدرجات" ...قال "وما الكفارات؟" ...فقلت "إسباغ الوضوء في السبرات ونقل الأقدام إلى الجماعات وانتظار الصلاة بعد الصلاة" صحيح

"وإسباغ الوضوء في السبرات "...اسباغ الوضوء فى الشتا ...فى المياة الباردة

"انتظار الصلاة بعد الصلاة "...يعنى إيه ؟...الملايكة مبهورة من الثواب اللى ربنا بيديه للى بيروح المسجد ويجى منه

طب أنا واحدة ست ...فى بيتك ...الثواب ده كله إنك أول ما تسمعى الآذان تعملى ده فى بيتك

بتثتثقلوا الوضوء ؟!؟!

طيب الملايكة مبهورة من اللى بيروح ينتظر الصلاة فى الجامع ...الملايكة مبهورة من الثواب بتاع الوضوء

ياللى بيثتثقلوا الوضوء فى الصلاة ...ياللى بتكسلوا فى الصلاة عشان الوضوء ...الملايكة فوق مبهورة من ثواب الوضوء ...ثواب رهيب

الثواب زاد

وياسلام بقى لو دخلت الجامع جزمتك اتسرقت ...يبقى الثواب زاد بقى ...رهيب بقى ...ثواب زاد ؟...آه

أحد إخوانا داخل الجامع... لقى واحد حرامى ماسك فى شوال جزم الناس أدام الناس ...وخارج ماشى ...فقاله إيه ده ؟...إنت بتعمل إيه ؟...قاله أنا؟...قاله آه ...قاله أنا... ده أنا أخدها ألمعها ...قاله كده ؟...قاله كده طب خد جزمتى لمعها معاهم بقى ...سلاموا عليكوا ...راح داخل يصلى

يبقى قلنا لغاية دلوقتى ...مشروع الذكر ...مشروع التلبية الفورية ...مشروع وليمة كل صلاة..مشروع ختم القرآن

مشروع إحياء سنة التكبير

المشروع اللى بعد كده...مشروع التكبير ...مشروع إحياء سنة التكبير

ابن عمر وأبو راية كانوا يخرجوا فى الأسواق يكبروا ...والناس تكبر ...مش شرط إن كله فى صوت واحد ...صوت واحد مش صوت واحد ...الدنيا كلها تكبير

إحياء سنة التكبير..كبر وإنت نايم على السرير ...كبر وإنت ماشى فى الشارع ...مش شرط تمشى فى الشارع الله أكبر الله أكبر ...مش شرط ...الدنيا كلها تكبير...إحياء سنة التكبير ...كبر يا أخى ...كبر بصوت يسمعك ...كبر متتكسفش يا أخى ..كبر

كبر وإنت فى المواصلات ...كبر فى الوقت الفاضى كبر وإنت رايح مشاوير...كبر وإنت صاحى من النوم ...روح المسجد قبل الصلاة بدرى وكبر...إحياء سنة التكبير ...إحيــاء ...اللى عايزين ربنا يحيى السنن على إيديهم ...يعملوا الكلام دا هو ...وأولى الناس بالكلام ده ...ربنا يجعلنا منهم ..الدعـــاة ...إنهم يحيوا هذه السنن ...وهما فى الشوارع

يتبع بإذن الله ...

*فرح*بالخير*

4-12-2008, 08:26 PM

مشروع قنــاطير الفـــردوس

بعد كده مشروع كيف تصبح مليونير أو مالتى مليونير... أو مشروع قنــاطير الفـــردوس ...يعنى إيه قناطير الفردوس؟ ...قال رسول الله صلى الله عليه وسلم "ومن قام بألف آية كتب من المقنطرين"صحيح

إيه القنطار ده ؟... القنطار ده 70 ألف دينار ذهب ...يعنى الدينار الدهب ده كم دينار ؟...4 وربع جرام دهب

‌

4وربع جرام دهب دول بكام ؟...ب430 جنيه ...يعنى 430 جنيه فى سبعين ألف 35 مليون جنيه ...35 مليون جنيه !!!!!

يعنى المقنطرين فى الدنيا اللى عندهم 35 مليون جنيه ...اللى بيسموهم المالتى مليونير ...ده المالتى مليونير اللى عنده 35 مليون جنيه على الأقل ...يبقى ده المقنطر

إنتا لو قمت الليل بألف آية ...تاخد 35 مليون حسنة بإذن الله سبحانه وتعالى ...تخيل ألف آية ..دول يتجابوا إزاى دول ؟...الجزء 29 وال30 والفاتحة ...جزئين بس ...الجزء 29 وال30 والفاتحة ... يبقى كده إنتا عديت كمان ألف آية

من القانتين ...لست من الغافلين

افضل التسع ليالى وللا العشر ليالى أعمل كده ؟...والله تقدر تقدر ...عايز تجيب من الأول ...مانتش قادر هات مائة آية ...تكتب من القانتين ...كما صح عن رسول الله صلى الله عليه وسلم ..."ومن قام بمائة آية كتب من القانتين" صحيح

ما إنتش قادر خالص 10 آيات عشان لا تكتب من الغافلين..." من قام بعشر آيات لم يكتب من الغافلين " صحيح

عبادة المتميزين

مشروع قناطير الفردوس ...عبادة قيام الليل عبادة المتميزين ...مش أى حد بيقدر يقوم...المتميزين

قيام الليل عبادة الأخيار المصطفين من الله ...مش أى حد بيقوم ..مش بمزاجك...ده ربنا الذى يقومك ...قيام الليل عبادة المالتى مليونير ...عبادة الناس الأغنياء جدا فى الحسنات

قيام الليل الناس اللى عندها شرف ...قيام الليل شرف المؤمن...شرفك يوم القيامه كله إنك إنتا من القوامين وشرفك عند الله...

اللى خايف على شرفه يقوم الليل ...مشروع قناطير الفردوس

يتبع بإذن الله ...

*فرح*بالخير*

4-12-2008, 08:27 PM

حجة فى بلدك

المشروع اللى بعد كده حجة فى بلدك ...احج فى بلدى ؟...هيجيبوا الكعبة فى بلدى ولا إيه ؟...لا حجة فى بلدك

الأعمال اللى تعدل الحج ...إيه هيا ؟

قال رسول الله صلى الله عليه وسلم : " من صلى الفجر في جماعة ثم قعد يذكر الله حتى تطلع الشمس ثم صلى ركعتين كانت له كأجر حجة وعمرة تامة تامة تامة " صحيح

ووفر خمسين ألف جنيه وخد خمسين ألف حسنة... يبقى مشروع حج فى بلدك ...والمرأة طبعا فى بيتها... أو جوزها ينزل معاها ...أو أخوها ينزل معاها المسجد

مشروع ال630 سنة حجاب عن النار

المشرةع اللى بعد كده مشروع الصيام ...إيه مشروع الصيام؟...هنسميه مشروع ال630 سنة حجاب عن النار

قال رسول الله صلى الله عليه وسلم : " من صام يوما في سبيل الله بعد الله وجهه عن النار سبعين خريفا " صحيح...ياااه .. 70 سنة؟
تخيل انت في وش الشمس بينك وبينها 100 ميل ... مش 93 مليون ميل...إنت عايز تبعد ..طب صوم يوم بقى ...وإبعد كمان سبعين سنة ...طب كمان يوم ...مش هتبطل صيام ...طب صوم بقى دلوقتى

قال رسول الله صلى الله عليه وسلم : " من ختم له من ختم له بصيام يوم دخل الجنة" صحيح...ياااااه ...اللى يموت وهوا صايم يدخل الجنة

سأل رسول الله صلى الله عليه وسلم أي العمل أفضل ؟ قال " عليك بالصوم فإنه لا عدل له" صحيح...كل دى أحاديث صحيحة عن الرسول صلى الله عليه وسلم

قال رسول الله صلى الله عليه وسلم : "كل عمل ابن آدم يضاعف الحسنة بعشر أمثالها إلى سبعمائة ضعف "قال الله تعالى : " إلا الصوم فإنه لي وأنا أجزي به " متفق عليه
أكثر من 700 ...الصوم كل ده؟؟؟؟...يبقى 9 أيام صيام إلا يوم العيد حرام ...فيه 70 سنة بعد عن النار ...يبقى 630 سنة

يتبع بإذن الله ...

*فرح*بالخير*

4-12-2008, 08:30 PM

مشروع يوم عرفة

بعض الناس بتقول ان اعتكاف يوم عرفة بدعة .. لا... يا جماعة في الشرح الكبير لابن قدامه ...كتب الفقه الحنبلى

يا جماعة الامام أحمد بن حنبل لما سئل عن حاجة اسمها التعريف بالامصار ...التعريف أن الناس تقلد عرفة ...اللى مرحوش يحجوا يقلدوا عرفة
بالأمصار يعنى فى البلاد ... يعنى إيه؟

يعنى الناس يوم عرفة تنزل تعد فى الجامع طول اليوم للمغرب ... تدعي ربنا زي بتوع عرفة بالضبط

فلما الإمام أحمد ابن حنبل إمام أهل السنة لما سئل عن هذا قال "لا أرى به بئسا "...أول واحد عمل ده ...اعتكف كان ابن عباس...بعد كده عمله سعيد بن جبير وكبار التابعين وكبار السلف

يبقى اللى ينكروا على الناس اللى بيعتكفوا دول ...ينكروا ليه ؟..يبقى مشروع يوم عرفة

مشروع الإخوة وتفطيـــر الصائمين

هنفتكر هنا مشروع الإخوة يا جماعة ...اللى هيعمل فطار لصحابه أو للناس يوم عرفة ...بكل واحد هيفطره ثواب سنتين ...زى بالضبط صيام يوم عرفة

المغرب انزل معاك كيس تمر ...إدى لده ولده ولده ...الناس تقول ده بيعمل إيه ؟؟...ده بيفطر الناس ...ليه؟...لإن ده أيام صيام ...ننشر العبادة يا جماعة ...فطر كل صحابك فى ال9 أيام دول ...فطروا يا جماعة ...مشروع الإخوة

يتبع بإذن الله ...

*فرح*بالخير*

4-12-2008, 08:31 PM

مشروع بر الوالدين

إيه مشروع بر الوالدين ده ؟...اوعى تنسى بر الوالدين ...اوعى

كان أحد السلف له جار... بيقول كانت إذا نادت له أمه ...قال إنهقى نهيقك... بيقولها نهقى...أعوذ بالله إيه ده !!!!!!...إيه العقوق ده !!!...كإنه بيسب أمه بإيه ؟...بالحمار...إيه ده !!!...إيه العقوق ده!!!

فلما مات كنا كلما مررنا على قبره سمعنا صوت نهيق !!
...كإن ربنا مسخه ************ فى قبره والعياذ بالله

الشباب اللى بيعقوا أمهم وأبوهم...البنات اللى مقطعين قلب أمهم وأبوهم ...عقوق...ما ينفعش ...ما تأمنيش المسخ بسبب العقوق ده فى القبر ...والعياذ بالله...يبقى مشروع بر الوالدين

يوم إجابـــة الدعاء

بعد كده مشروع يوم عرفه ...مننساهوش أبدا
يوم إن ربنا يباهى أهل السماء كلهم بينا
يوم أكتر يوم ربنا بيعتق الرقاب ...يوم عتق الرقاب
يوم الدحر ...الشيطان بيكون أدحر ما يكون وأصغر ما يكون
يوم التجلى ...إن ربنا بينزل نزولا يليق بجلالته إلى السماء الدنيا
يوم إجابـــة الدعاء

يوم عرفة يا جماعه ...التعريف بالأمصار...يعنى الأمة كلها تعتكف فى اليوم ده ...يوم عرفة ..يا إلهى ...يبقى يوم اعتكاف للأمة كلها

يتبع بإذن الله ...

*فرح*بالخير*

4-12-2008, 08:33 PM

مشروع يوم العيد

أفضل يوم فى العشر أيام هو يوم العيد ...يعنى يوم العيد نعبد؟
يوم العيد ده يوم صلة الرحم ...يوم الأضحية

أنا عايز أنبهكم لحاجة قبل ما أسيبكوا يا جماعة ...حديث صح عن الرسول صلى الله عليه وسلم حسنه الألبانى :"من كان له سعة ولم يضح فلا يقربن مصلانا"
مدبحش خروف أو يشارك فى دبح بقرة ...ميجيش يصلى معانا ...حسنه الألبانى...عشان كده ابن تيمية قال "الأضحية على القدر واجبة "

إنك إنتا تدفع ألف جنيه فى خروف...ما دام معاك فلوس واجبة ...مادام معاك عشر الآف جنيه واجبة عليك ...يعنى يا جماعة الأضحية خطيرة دى

وفى الحديث " ما عمل ابن آدم من عمل يوم النحر أحب إلى الله من إهراق الدم وإنه ليؤتى يوم القيامة بقرونها وأشعارها وأظلافها وإن الدم ليقع من الله بمكان قبل أن يقع بالأرض فيطيبوا بها نفسا " اختلف فى تصحيحه وتضعيفه

إهراق الدم :إن الدم يراق ..إنه يدبح لله سبحانه وتعالى...اخترت لربنا حاجة هتلاقيها يوم القيامة مستنياك عشان تبقى فى ثوابك وميزانك

تخيلوا يا جماعة الثواب بتاع الأضحية منضيعهوش ...كل ده تبع يوم العيد ...فيه منضيعش ابدا ده...طبعا فيه فرص لا تعوض ابدا ...مشروع فرص ذهبية

10 بيوت و10 قصور

إحنا عايزين نخرج من العشر أيام دول بعشر بيوت وعشر قصور فى الجنة ؟

إزاى ال10 بيوت دول ؟...إنك تصلى 12 ركعة سنة راتبة 2... قبل الفجر ...6 مع الظهر ...ال2 اللى بعد المغرب وال2 اللى بعد العشاء

قال رسول الله صلى الله عليه وسلم : " ما من عبد مسلم توضأ فأسبغ الوضوء ثم صلى لله في كل يوم ثنتي عشرة ركعة تطوعا غير فريضة إلا بنى الله له بيتا في الجنة " صحيح ‌

وكل يوم تقرأ "قل هو الله أحد " عشر مرات بقصر فى الجنة...قال رسول الله صلى الله عليه وسلم : " من قرأ " قل هو الله أحد " عشر مرات بنى الله له بيتا في الجنة " صحيح الجامع ‌

يتبع بإذن الله ...

*فرح*بالخير*

5-12-2008, 01:20 PM

طيب احنا عملنا ايه ؟؟؟

علمنا ورقة اسمها (( صفحة جديدة مع الله )) في أفضل أيام الله ..لها تصميم ظريف جدا في غاية الجمال ..وليها كمان تصميم تانى لنفس الورقة... بألوان تانية ...يعني عرض مميز جدا زي ما بيقولوا ...وفي تصميم تالت ان شاء الله ..باذن الله

المقصد منها يا جماعة ...إن صفحة جديدة مع الله ...ده إحنا بفضل الله ربنا من عليناوكتبناها بفضل الله ...بفضل الملك الجليل سبحانه وتعالى وحده تعالى

ربنا يبارك في اخوانى اللى كان ليهم دور ...ووديناها للشيخ محمد حسين يعقوب ربنا يبارك فيه ...استاذنا وشيخنا وراجعها ...ربنا يبارك فيه ...وعملنا ورقة صفحة جديدة مع الله اللى فيها كل المشاريع اللى قولتهالكوا دي ..ورقة مشجعة جدااا ..وربنا كتب لها قبول جميل جدااا بفضل الله سبحانه وتعالى

الورقة دلوقتي اللى عاوز يجيبها يعمل ايه؟

يا اما على الموقع www.way2allah.com (http://www.way2allah.com/)
موقع الطريق إلى الله ... تقدر تسحبها ببرينتر ...واللى في السعودية اللى فى الخليج اللى فى المغرب... ياخدها يوديها عند واحد بتاع مطبعة يطبعها له ألف ألفين ويوزع ..كل واحد هينفذ الكلام ده في ميزانك إزاى ؟

مش دي احب الأيام إلى الله.. يبقى الدعوة فيها احب دعوة الى الله وكل واحد هينفذ حاجة من الكلام ده في ميزانك ...يا جماعة فرصة رهيييبة .. اشتغلوا يا جماعة

الوثن والأكل حواليه !!!!...وإحنا عايشين !!!!

احد اخوانى جاي من ماليزيا من أيام ..بيقول مش ممكن كمية الفساد اللى بين المسلمين هناك... مش ممكن الوثنيين اللى هناك ...ورانى صورة وثن في شارع وحوله أكل ..لسة الناس بتقدم ..بتوع الكترونيات وعباقرة بيقدموا أكل للوثن ...زي المناظر اللى بنشوفها في أفلام الهجرة!!

ورانى الوثن والأكل حوليه ...!! وإحنا عايشين !!

ربنا سبحانه وتعالى بيتعمل في وحدانيته !! ايه يا جماعة ده ؟ازاى؟؟ ازاى؟؟

يتبع بإذن الله ...

*فرح*بالخير*

5-12-2008, 01:23 PM

بس نشتغل .. بس نجتهد

في حين بقى الأخبار الجميلة في الدعوة ...ان كل سنة في المانيا بيسلم 10.000 ألمانى جديد ..يعني في أمل ...يا جماعة بس نشتغل ... بس نجتهد يا جماعة ...نوصل ليل نهار في الدعوة

تحس يعني ايه 10 ذي الحجة

طيب اللى مش هيعرف يدخل على الموقع ..عملنا رقم خيري تتصل بيه لو انت عاوز منها 500 نسخة 1000 نسخة ...عشان ننشر يا جماعة ...عشان الناس كلها تستيقظ .. في الموسم الخطير ده الناس تحس بخطورته

يا جماعة عاوزين الامة كلها تحس يعني ايه 10 ذي الحجة ؟

والله ربنا يعلم ..انا مش عارف الكلام اثر ولا مأثرش ؟

انما ربنا يعلم والله ...انا دمى اتحرق ...وقلبي اتحرق ...عشان اقدر اوصلكم بأقصى ما استطيع ...يعني ايه 10 ذي الحجة يعني ايه الموسم ده؟

يعني المفروض الايام دي تبقى اشد من رمضان ازاى؟
ازاى؟ الامة يا جماعة لازم كلها تستيقظ في الايام دي
عملنا رقم خيري علشان اللى عاوز كمية منه 0109001583

زي الشريط اللى اديناه الليلة ..يعنى الإخوة اللى ماسكين الرقم ده بإذن الله سبحانه وتعالى تبع شركة من الشركات ...هيطبعوا الشريط بتاع الليلة على شريط وسيديهات ...اللى عايز يوزع منها خيرى لله ... يتصل على نفس الرقم ...يساعد إن حد يعرف عن الموضوع الخطير ده ...عن الأيام الرهيبة دى

عن الربع ساعة اللى فاضلة

عن الربع ساعة اللى فاضلة في نهاية الامتحان دي ..عن اعظم فرصة في حياتنا دي ...ويبقى داعى الى الله ...ويبقى موقظ للأمة في هذه الفترة العصيبة ...نفس الرقم بردو

ويعلم الله ..ابغض شئ الى قلبي انى انشر شئ ليا... أو إنى أقول على شريط ليا ومحبش اعمل حاجة من الكلام ده خالص.. والله لو ما فيها خير ربنا ما ينشرها لكن اعمل ايه انا في حكم المضطر !

ايام خطيرة و موسم خطير

الواحد هيموت علشان الأمة تعرف الثواب ده ...ولازم ننشر الخير ...لاااازم نشتغل في الدعوة ..طيب في شريط اسمه احياء سنة التكبير... الناس قاعدة تكبر فيه ...ده ممكن تشغله ...تلاقي صوت التكبير طالع ...بتاع الميكروباص يشغله تلاقي صوت التكبير ...بحيث ان احنا نحيي سنة التكبير في كل مكان ...بردو موجود تبع نفس الرقم للى عايز منه بثمن مخفض جدااا للغاية

يتبع بإذن الله ...

*فرح*بالخير*

5-12-2008, 02:28 PM

هنعمل ايه قبل ال10 ايام باسبوع؟؟

طيب ياجماعة اللى عايز يسخن فى الإسبوع ده ...قبل ما ال10 أيام يبدأوا
... يدخل على موقع way2allah.com

عملنا ملف لأحسن شرايط عن 10 ذي الحجة ...لمشايخنا الكبار الشيخ يعقوب والشيخ مسعد والشيخ محمود المصري ...ومشايخنا الكبار ربنا يبارك فيهم والشيخ محمد بن اسماعيل والشيخ المنجد ...عملنا ملف لأجمد شرايط ل10 ذى الحجة

اللى هيدخل ان شاء الله هيلاقي الملف ..يسمع كل يوم شريط يشحن .. علشان اول ما ييجو (ال10) ينطلق انطلاق رهيب

هنعمل بروفا ؟؟؟

هنعمل إيه الإسبوع ده هنعمل بروفا...يعنى إيه بروفا ؟

هنكلم كل الناس عن الكلام اللى سمعناه النهاردة ...هنكلم كل الناس ...هنتكلم عن احب الاعمال الى الله واحب الايام الى الله ..عشان ربنا يحبنا ..

وهنبدأ إن شاء الله المشاريع دى... نطبق ...نبدأ نصوم ...نبدأ نقرأ قرآن نبدأ نسخن كدة يا جماعة ...آه بس الكلام ده بعد إسبوع ...اسبوع إيه يا بنى ؟ ...ده اليوم بيعدي في دقيقة !!

مين ناووووى؟

خلاص نجتهد بقى ان شاء الله ...ونجيب آخرنا باذن الله سبحانه وتعالى ...مين ناووووى؟؟

ياترى في 10 ذي الحجة هيبقى حجابك شكله ايه؟
هيبقى غضك للبصر شكله ايه؟

مين ناوى يا جماعة يطلع من الشغل بتاعه على الجامع ...يفضل لغاية المغرب يروح يفطر في البيت ...يعبد ربنا

مين ناوى لو معندهوش شغل في اليوم ده ينزل الجامع من الصبح يفضل يعبد لغاية المغرب؟
يرجع يفطر ويعبد ربنا؟ وينام بعد العشا علشان يصحى يقوم الليل ؟

مين ناوية انها تلبس حجاب امهات المؤمنين ؟
نقاب لله في هذه الايام اللى بيضاعف فيها الحسنات... يبقى بثواب 700 نقاب .. يا إلاهي !!
مين ناوى انه يتغير في الايام دي؟
مين ناوى ان هو ينشر في كل مكان فضل الايام دي ؟... احفظ الكلام اللى قولته وانشره في كل مكان

مين ناوى يا جماعة ان هو يعرف الدنيا كلها ..يجي واحد يقولك : اسكت مش حصـــل .... قوله اسكت انت ...انت مانتاش عارف الايام دي فيه ايه؟ ده فيها وفيها وفيها

مين ناوى يا جماعة يبقى جند من جنود ربنا ... في ايقاظ امة محمد بهذا الموسم الخطير ؟ أعظم هذه الأيام

ومين ناوى يقول يا رب دي احب الايام اليك ...انا يارب من حبي ليك هعبدك ليل نهار في هذه الايام
يتبع بإذن الله ...

*فرح*بالخير*

5-12-2008, 02:29 PM

انا خايف افتر ..!

لا ... اهجم ...اللى بيهجم مابييدافعش ...اهجم انطلق اجتهد ...ربنا معاكو ..ربنا معاكى .. ربنا معانا كلنا يا جماعة

ربنا بيحب العبادة فى الأيام دى فسيعيننا... وفتحلنا الباب ده رحمة لينا ...حب لينا...وحب إن إحنا نرتقى ...علشان كدة مش بيسبنا بإذن الله ...ومش هيخذلنا ان شاء الله ...وهيفتح لنا ابواب طاعته ...وهيستعملنا وهينصر الدين على ايدينا باذن الله سبحانه وتعالى

اللهم بلغنا عشر ذي الحجة
اللهم اعنا فيها على ذكرك وشكرك وحسن عبادتك
اللهم استعملنا فيها في طاعتك في كل ساعة وفي كل دقيقة من ليلها ونهارها
اللهم احيي ليلها ونهارها بطاعتك
اللهم ايقظ امة محمد فيها ...يا رب
اللهم ايقظ شباب الأمة وفتيات الامة ورجال الأمة ونساء الأمة وأطفال الأمة فيها ...يا رب
اللهم اجعلها ايام ذكر ليلا ونهارا... يا رب
يارب يارب استعملنا ولا تستبدلنا
يارب اهدنا واهد بنا
يارب استعملنا في طاعتك ليلا ونهارا... يارب
نسألك من فضلك الواسع العظيم
لا تخذلنا لا تتولى عنا لا تتركنا ... تب علينا ..اغفر لنا

انتهى الدرس ولله الحمد والمنة

*فرح*بالخير*

5-12-2008, 02:31 PM

ها هو ملف الword والpdf ...للدرس المفرغ مدرج به :

1.رابط الحلقة (( أيام لا تعوض )) الرائعة جدا ...للسماع أو المشاهدة أو التحميل

2. رابط "أفضل الأشرطة "...فى فضل العشر الأوائل من ذى الحجة

3. ورقة ((صفحة جديدة مع الله))... بتصميماتها الثلاثة الرائعة

4. ورقة ((كنوز الذكر)) بتصميميها الأثنين الممتازين

5. تفريغ الدرس مقسم إلى "مقاطع " لسهولة النشر

للتحميـــل :

word

http://img221.imageshack.us/img221/8179/12399999999999999999999fo9.jpg (http://www.islamup.com/view.php?file=53f156a423)
(http://www.islamup.com/view.php?file=670e3e94dd)

pdf

http://img227.imageshack.us/img227/1276/ppppppppppppppppppco5.jpg (http://www.islamup.com/view.php?file=3619ec2aa0)

(http://www.islamup.com/view.php?file=5148800f83)

http://img132.imageshack.us/img132/1738/1124hf9.gif

وماذا الآن ؟؟

نريد همــ،،،،ــة عاليــ،،،،،،،ــة تنــ،،،،،،ــاطح السحــ،،،،،ــاب فى الـعــمل به و نشـــره وإيصاله لأكبرعدد ممكن ...أقل القليل ملف الورد والبى دى إف (كوبى بست)

http://img132.imageshack.us/img132/1738/1124hf9.gif

ربما تسألون الآن :

لم يتبق إلا حوالى بضعة أيام على نهاية العشر ...أفأنشر الآن !!!!! ...وخلااااااص الناس عرفت ...؟؟؟؟

لا ... للأسف ليس كل الناس تعلم هذا ...بدليل الغفلة والتفريط الرهيب ...فى الشوارع مازلت الأغانى ...والتبرج ...و ضياع الصلوات ... وإنا لله وإنا إليه راجعون

http://img132.imageshack.us/img132/1738/1124hf9.gif

فمن يحمل هم هذا الدين ؟ من يوقظ الناس فى هذه الفترة العصيبة ؟

من يساعد الناس إنها تعرف وتحــــس بالأيام الرهيبة هذه ... الأيام العظيمة هذه ...عن أفضل الفرص فى حياتنا ؟

http://img132.imageshack.us/img132/1738/1124hf9.gif

وأتذكر جملة للدكتور حازم شومان - حفظه الله - بما معناها :

إن فى ناس محتاجة أن تصل لهم هذه الورقات حتى لو آخر يوم ...لعل وعسى ينفذون هذه المشاريع حتى ولو " يوم عرفة " ليكون لك الأجر والثواب من الله الكريم الجليل

وجزى الله كل خير الدكتور حازم شومان على المجهود الكبير الذى بذله ليوصل لنا فضل هذه الأيام ...فقد شجعنا كثيرا ...جعله الله فى ميزان حسناته

http://img132.imageshack.us/img132/1738/1124hf9.gif

واقتبس من تفريغ كلام د.حازم شومان فى آخر الدرس :

انما ربنا يعلم والله ...انا دمى اتحرق ...وقلبي اتحرق ...عشان اقدر اوصلكم بأقصى ما استطيع ...يعني ايه 10 ذي الحجة ...يعني ايه الموسم ده؟

http://img132.imageshack.us/img132/1738/1124hf9.gif

وتذكروا المأساة :

الوثن والأكل حواليه !!!!...وإحنا عايشين!!!!!

http://img132.imageshack.us/img132/1738/1124hf9.gif

وفى النهاية :

جعل الله كل ما تبذلونه فى ميزان حسناتكم ... ويسر الله للدعوة أن تنتشر فى سائر الأماكن ...آميـــن

منقول من منتدى الطريق الى الله