من زمان أوي وأنا بفكر في الموضوع دة ... نفسي الاقي حل وجواب مقنع
رغم إنها حاجة مألوفة جدا عند الناس ... بس لازالت غامضة
قلت لنفسي اناقش الموضوع دة معاكو ... عسى ولعل ربنا يكرم ونوصل لحل

كلمة من اربع حروف ... بس ممكن تعبر عن عدد لا نهائي من الأشياء المختلفة
حاجة تحير الحقيقة ... بس واقع




عنوان الموضوع يمكن يوحي لكم بالفكرة ...( إيه البتاع دة )
يا ترى أول ما قراتو الموضوع ... إيه أول حاجة فكرتوا فيها؟
العنوان مبهم اكيد لان في كلمة غريبة ... كلنا عارفينها طبعا بس مبهمة
(بتاع)

رغم ان ال التعريف داخلة عليها .. تبقى نكرة.. استحالة نفهم المقصود منها لو لم
تكن هناك بعض الاشارات
طيب السؤال هنا ... ايه اللي جعل للكلمة دي اهمية واستخدام متداول
ايه الحكمة من استخدامها بكثرة في الوقت الراهن؟؟؟





والله انا لما بتكلم مع غير المصريين واستخدمها قصدا
علشان حد يعلق عليها او يسالني عن معناها
بالعكس تماما ... بلاقي تجاوب واندماج عااااااااادي جدا... كأن لها اصل في اللغة

والعجيب .. انكم ممكن تستخدموها كإسم ...
مثال .. ممكن تديني لو سمحت البتاع دة ؟
وممكن نستخدمها كضمير ملكية ...
مثال .. القلم دة بتاعي

والخوف ان تستخدم كفعل في المستقبل .. اظن هتكون صعبة جدا
تعالو نتخيل مثال كدة ...( انت هتبتع امتى لاميركا )
تفرض ان في الاصل ..( انت هتسافر امتى لاميركا )
والله ممكن تحصل ,, مش غريبة على الجيل دة






اتخيل معايا لو انت واقف في الشارع او قاعد مستني حد.. وفجاة سمعت اتنين
وراك بيتكلمو .. انت مديهم ضهرك ... شوف الحوار دة وقولي اذا فهمت حاجة

الاول : ايه يا عم البتاع اللي انت شايلو دة
التاني : ههههه عجبك
الاول : دة روعة بصراحة .. من فين جبتو
التاني : من البتاع اللي في اخر الشارع
الاول : طيب تعالى معايا اجيب زيو
التاني : استنى ....... معاك البتاع بتاعتك
الاول : اه .. انا دايما شايلها في المحفظة
التاني : اه اصل مش هيدخلونا الا بيها


طبعا لا انت عارف ايه اللي شايلو .. ولا جابو منين .. ولا عارف ايه البتاعة اللي
صاحبه بيشلها في المحفظة.. يعني تقريبا فاهم 20 % من الحوار

ان واحد فيهم اشترى حاجة جديدة وصاحبه اعجب بيها وعايز يشتري زيها.. بس
لكن اكيد اللي بيتكلمو مع بعض فاهمين بعض اكتر .. بسبب الاشارات





والله حاجة تجن .. مش كفايه بنحرف اللغة العربية ونكسِر اللي عايزين نكسِره
ونفتح اللي الضمةمش لايقة عليه !!!
كمااااااااان .. بنضيف للغة كلمات غريبة ملهاش اصل ولا ملامح
وكأن الكلمات العربية خلصت ومش لاقين كلام نتكلموا
وياريتها جت على كلمة ( بتاع ) .. لاااا .. دة كان اقرب مثال
لكن في مئات والاف الكلمات الدخيلة على اللغة .. لحد ما شوهوها

وبلا فخر .. اعتر ف ان اللهجة المصرية تحتوي على كم كبير
من تلك الكلمات .... بس هنعمل ايه


واحزن اكتر على حال اللغة في المغرب والجزائر ...
بتعب جدا في استيعابهم




لا ... اللغة العصرية دلوقتي هي لغة ( العربيزي)
يعني نص عربي ونص انجليزي .... والله حرام اللي بنعملو في اللغة العربية
.. يعني لو حد عايز يتمنظر .. يتكلم كلو انجليزي او فرنساوي او الماني او او
لكن ميجيش على حساب اللغة العربية

وياريت لما تكون وسط عرب .. افتخر ان انت عربي .. واتكلم بعلو الصوت
و في اماكن تانية بالمقابل تقدر تستعرض فيها ثقافتك الجامدة

[center]


ارجع للسوال اللي سالتو في البدايه
طيب السؤال هنا ... ايه اللي جعل للكلمة دي اهمية واستخدام متداول
ايه الحكمة من استخدامها بكثرة في الوقت الراهن؟؟؟



واعمم في النهاية .. على كل الكلمات السخيفة اللي بنستخدمها
في حياتنا اليومية ... مش بس بتاع
الجواب


ان احنا حسينا فجاة ان اللغة العربية اصبحت ضعيفة وقديمة
وملهاش مكان الزمن دة

والحقيقة طبعا مش كدة .. اللغة العربية اجمل لغة
والباقية والمحفوظة الى قيام الساعة بين صفحات القران الكريم
واحنا .. احنا .. بلهجاتنا المتعددة والمتلخبطة
اديناها الوضع دة

انا متضايقة جدا ان اصبح في عدة لهجات وكلها بتنتسب للغة العربية
لو كلنا كنا بنتكلم لغة عربية فصحى ..
اكيد كنا هنبقى اكتر ترابط واكتر وحدة .. مش كدة

لكن نحاول برضو قد ما نقدر .. ان احنا نفتخر بلغتنا الجميلة
ويكون كلامنا .... مش هقول فصيح .... لكن يكون مفهوم على الاقل
وبلاش من ( بتاع واخواتها )

اسفة اني استخدمت المصرية .. لكن لمناسبة المقام
مع اني والله مقصدتش بكلامي المصريين بس ....
انما معظم الناس دلوقتي تتبرا منهم العربية
فلو انت / انتِ منهم ... راجعو نفسكو .... قصدي كلامكو

اسفة ايضا للاطالة .... ويارب ما تكونو مليتو
[/CENTER]