السلام عليكم
سبحان الله الناس من جد غريبة
نقول الكفار بله واغبيا لانهم ما يسلمون
وسبحان الله ما نشوف وش بيسوي الي المفروض انهم مسلمين مع العمالة
اليوم وقبل اربع ساعات كنت عند مدرسة جنب البيت
سمعت صوت رجال وواضح انه كبير
يقول: انت يالكلب يالحيوان غصب عنك تسمع كلامي
انا طبعا كالعادة حبيت اتلقف ورحت عند مصدر الصوت (البقالة)
ولقيت شايب اقدر عمره بـ 42 او 43 سنه و شفته كذا مره ومعاه ولده
(المفترض ان هذا هو السن الي الانسان عنده يعقل وينضج ويحلم)
ولقيت بنغالي مسكين شكله جديد لاني اول مره اشوفه بالبقاله وشكله منقهر من الشايب
طبعا كان واضح من المنظر ان الشايب بيصرخ عالبنغالي المستجد
قعد الشايب يسبسب ويلعن والبنغالي يتحامل عليه
قعدت انا وواحد نهدي الشايب
وواحد قاعد يقول للشايب: ايه يبو خالد علم هالحمار وشلون يتأدب
ملاحظة: مع ان الموجودين كانو فوق العشرة اشخاص الا ان واحد منهم الي فزع معاي
والبقية مثل الشياطين ما ينشاف مع انه راس المشاكل
الشايب العنيد مو راضي يسكت ويكف شره وكل ما حاولنا نهديه يزيد
(الظاهر مو عارف اننا بنهديه خلايا الاحساس عنده خربانه)
ولما لقا خويي ان الشايب عصب خاف وتركه وما كان من الشايب الا ان دفني بكل ما عنده من قوه وطيحني عالارض
وقام ضرب البنغالي
البنغالي المسكين ما لقى يدافع عن نفسه الا بـ : يا هيوان ودف الشايب دفه خفيفه
وعاد شايبنا ما صدق حجة وحاجة
وقال وهو معصب: ايش انا حيوان يالملعون لا وبعد تضرب
وسبحان الله فجأة الناس ظهرت قوتهم وعزمهم
وقاعدين يسبون البنقالي وبعضهم يضربونه
قام البنقاله الي في المحل قامو يفزعو لخويهم وخرجو وصارت معركة ما اننتهت الا بالشرطة
لما جات الشرطة نصف الناس اختفت شجاعتهم وحطو رجلهم
وما بقي الا ان وكم واحد بالاضافة لاصحاب المشكله
وعاد شرطتنا ما عندهم تحقيق في مكان الحدث لا كله في القسم
طبعا قدرت اخلص من الشرطة بالبركة لان واحد منهم يعرفني
وانا رايح سمعت واحد يشرح للشرطة المشكلة وكانت كالتالي
الشايب المعفن دخل البقاله واشترا اغراض كثير وكان حسابه غالي
وما كان معاه المبلغ الكافي فكان وده يخليه فاتورة
لكن البقالة ما كان عندهم هالنظام لان واحد اول ما دفع فاتورة غالية
ورفض البنقالي يفوتر المشتريات
لكن الشايب مصر والبنغالي خايف على شغله
ومن هناك المشكله بدأت
بعد ما سمعت هالكلام اتعجبت جدا
خصوصا ان امس الإمام حق المسجد سوا خطبة بعد صلاة العصر عن الاخلاق وحسن المعامله وهذا الشايب انا متأكد انه كان معاي في المسجد وكان متابع الخطبة
يعني كانت اذنه خربانه في الخطبة ولا ايش؟
وبعدين يالمتعفن على الاقل احترم ان في اطفال واولهم ولدك
رفعت راسي وبصوت عالي: لاااااااااا وبعد كل هذا تسمو انفسكم مسلمين لا وبعد عندكم وجه تدعوهم للاسلام وتقولو لهم اغبياء والله انتم الاغبياء
ومشيت
والناس الي يقول وش يبغى هالاهبل والي قاعد يسبسب في السر
وما حسيت ان واحد منهم اتأثر ولو قدر امله

يامن يقرأ الموضوع رجااااااااااااااااااااااااااااااااء خااااااااااااااص
لا تشوهو ديننا نحن امة محمد افضل الامم
نحن امة خير البرية
لنبتعد عما يهلكنا ويشوه صورة ديننا
فان تصرفاتنا هذه بعيــــــــــــــــــــــــــــــدة عن ديننا
وبعيــــــــــــــــــــــدة عن اخلاقنا
الآن هذا الشايب اقترب من مستوى ابو جهل وابو لهب
وكذلك كثير من الناس
قرأت كتابا اسمه (السباق الى الجنات)
لكن يبدو ان هناك اناسا يتسابقون الى جهنم
لا تستغربو غدا عندما يكرهنا الناس ونصبح اخر الاديان انتشارا
الاخلاق تتوارثها الاجيال وتغيرها اما للاسوأ او الافضل
على حالنا سوف تنحدر الامة وسيضيع الاسلام
رجاء اخوتي لا اريد لسم كهذا ان ينتشر فساعدوني وساعدو انفسكم
والسلام عليكم ورحمة الله