بسم الله الرحمن الرحيم
عودة أخرى لمنتدى مسومس بعد انقطاع سنتين تقريبا بسبب الجامعة
ودراستها اللامنتهية! [رغم إنه كل دراستي على اللاب والنت -.-"]

احم .. عنوان الموضوع ورموزه أكيد غريبة على بعض الناس >> متأثرة بالدراسة
*ترجمة __ تجمع ولد وبنت لابد أن يعني علاقة محرمة أو قصة حب كما يقال !

عموما الموضوع اللي حابة أتكلم عنه النهاردة هيفهمه أكتر اللي في مجتمع مختلط سواء دراسة أو عمل
وهو عن علاقة الزمالة بين الولد والبنت .. هبدا أتكلم عن نفسي والمجتمع اللي عايشة فيه [جامعتي أو كليتي]


في كليتي (على سبيل المثال) أي شخص بشوف ولد وبنت بتكلموا ، إذا بينهم قصة الحب الأفلاطوني :|
حتى لو كان كل اللي حصل هو إنه طلب مثلا دفتر المحاضرات وأخدوا ومشي بكل احترام وكان في مسافة
كبيرة بينهم وكل شخص كان بتكلم باحترام وجدية تامة!

أو كمثال آخر عندنا في الكلية اتجمع مجموعة من الطلبة (ولاد وبنات) قرروا نعمل مجتمع صغير داخل الجامعة
مهتم بعلوم الحاسب وأحدث أخبار التكنولوجيا وكنا بنساعد بعض ونعلم بعض .. حتى إنه في ناس من
اللي كانوا منضمين للمجتمع دا جالهم شغل في أحسن شركات ومنهم اللي اتعرض عليه شغل في جووجل
واللي حاليا بيتشغل في ياهوو وغيرها وكلهم بدؤوا من المجتمع الصغير دا!
الفكرة من الكلام دا .. إنه كتير لما بنكلم الناس إنها تنضم لينا وتذاكر وتتعلم معانا بكون أوقات
كتير ردود فعلهم (دول مش بتعلموا ، واللي بنضم للمجتمع دا ببقى عاوز بتعرف على بنات ويتكلم معاهم)
ببساطة لإنهم بشوفوا إنه إزاي ولد مثلا ممكن يعلم بنات ؟!!! :|:|


أكيد في ناس هنا فهمت إني مع الاختلاط والتعامل بحرية تامة بين البنت والولد!! بالعكس طبعا
لابد من وضع قيود وحدود على التعامل دا لو حصل .. وهو أكيد هيحصل في أي مكان
لأنه الاختلاط في كل مكان ، جامعة وعمل وبعض المدارس

المختصر المفيد للموضوع .. ليه دايما بنشوف أي علاقة حتى لو كانت مجرد زمالة حصلت لظرف ما
بين أي ولد وبنت عبارة عن قصة حب؟؟ ونقول على البنت دي إنها بنت مش محترمة لأنها كلمت فلان؟!
ولا المجتمع اللي احنا فيه والقيود المفروضة علينا تخلينا نحكم على الناس من برا؟!
وأكيييد .. إيه رأيكوا في علاقة الزمالة أو التعامل عموما بين الولد والبنت؟؟ هل إنت معاه وبرأيك إيه القواعد
اللي المفروض نحطها على العلاقة دي؟!