بسم الله الرحمن الرحيم
عودة جديدة لمنتدى -قلم الأعضاء- مع سلسلة مواضيع متجددة من (سهرة شبابية)
في الموضوع ده هنتكلم عن مشاكلنا -احنا الشباب- ونحاول ننقاشها ونلاقي أفضل الطرق
والحلول ليها ، وإن شاء الله إذا لقيت تفاعل منكم الموضوع يستمر وكل فترة نحط موضوع
نقاش جديد ..


شروط النقاش

زي ماقلت كلنا هنتكلم ونعبر عن نفسنا ونقول اللي جوانا في الموضوع ، لكن في حاجات
عايزة أنبه عليها قبل ما أبدأ في الموضوع علشان -زي مابنقول- نكون على نور من أولها

» لو حبيت تشارك معانا ياريت يكون الأسلوب حضاري ، لو حد مخالفك في الرأي مثلا ماتنزلش
فيه شتايم وتبهدله آخر حاجة ... خلينا دايما فاكر إن (الاختلاف في الرأي لا يفسد للود قضية)

» احنا عايزين نسمع رأيك إنت وبأسلوبك إنت ، يعني لو رأيك زي رأي عضو تاني ماتعملش إقتباس
وتكتب -ده رأيي- ، علشان كده أنا بنصح إنكوا تخلصوا الموضوع (وماتقروش الردود علشان مش
تتأثروا برأي حد)

» هنختار في كل موضوع نقاش أحسن رد وأحسن شخص عرف يتناقش حسب الأسلوب لكن
الرأي فده رأيه ومش هنجبره على حاجة تانية ..


طبعا دلوقتي الكل زهق من الكلام اللي فوق فهبدأ بأول موضوع نقاش على طول ::

ll- حبنا و النت -ll

أكيد مافيش شخص في النت إلا وقابل شخص عجبته شخصيته وكلامه وأسلوبه ، لكن ممكن مع الوقت

الإعجاب بالشخصية يتطور إلى إعجاب بالشخص و حب الإنسان نفسه والهوس بيه ...

ومع الوقت يبدأ الكلام الحلو بينهم وتتحول صداقتهم العادية إلى علاقة وربما كلام بالمايكروفون والتليفون

ويمكن تزيد للكاميرا !!

طبعا مش هنقول مافيش كاميرا أو كده ، لإني أعرف وحدة من بعيد جدا بتتكلم بالكاميرا وبتبعت صورها
لكل الشباب !

فياترى إيه رأيكوا في الحب عن طريق الإنترنت؟
وهل صادفتك مرة وحبيت حد على النت أو تعرف حد حب على النت؟ وكانت إيه النتيجة؟
وبتفضل إنك تحب حد على النت ولا حد قدامك؟
وتقول إيه لأي شخص بيحب على النت؟

طبعا مش لازم تجاوبوا على الأسئلة دي بس ، ممكن تضيفوا اللي إنتوا عايزينوا


عايزة رد كل واحد فيكوا صفحة لوحدها

وأنا بانتظاركوا ..