مرحباً بالأعضاء المسومسيين



أتمنى تكونوا كلكم بصحة جيدة ونفسية سعيدة



ندخل في الموضوع ..



اليوم أنا وأخواتي نسولف عن ماضينا الطفولي البريء .. منها المضحك ومنها المفرح



فـ ( نطّت ) في بالي إني أحط موضوع عن ذكريات الطفولة



كلنا نملك ذكريات طفولية ,, مشاكسة ,, وبريئة ,, وفضايح ( مخبينها ) عن الأهل عشان ما نحصل تهزيئة محترمة



هنا .. في هالموضوع .. بتطلع الفضايح



وبنعترف بالجرايم اللي سويناها ..



ونتكلم بصراحة عن أحلى المواقف اللي عشناها بطفولتنا



خلونا ( ننبش ) في ذاكرتنا شوي ،، ونعيش ذيك اللحظات مع بعض



ببدأ أنا :






مرة من المرات كانوا الوالد والوالدة طالعين ،، والدنيا صيف وحر ،، فقررنا أنا واختي المصون نسوي فيها حريم يعرفون الأصول ( كنا في الابتدائي ، بس ما أذكر أي مرحلة بالضبط ) ،،


طبعاً اتفقنا نسوي عصير ليمون طازج يبرد على القلب


ونقوم احنا السنعات ونعصر لنا ثلاث أربع ليمونات ،، ما عجبنا الوضع ،، حتى كاس واحد ما عبينا ,,


فقمنا طلعنا كل الليمون اللي بالثلاجة وعصرناه


والحمد الله قدرنا نعبي كاسين ,, وزيناها بشريحة ليمون ومزاز ( مصاص ) – ما ادري شتسمونه – وثلج ,, ولا مطعم


وما نسينا السكر طبعاً


ولمّا وصلوا الوالدين الحبايب قدمنالهم عصير ليمون من اللي يحبه قلبهم


وطبعاً من أول رشفة العصير كله بره


وكح كح على كيفك


( وش ذا ؟؟ حااااااااامض ! )


واكتشفنا بعدها إننا لازم نحط مويه مو نعبي الكاس كله ليمون


وأكيد حصلنا تهزيئة سنعة من الوالدة


واضطر الوالد يشتري كرتون ليمون ثاني .. بدل اللي عصرناه .. وكان مصيره في الزبالة


بعدها توبة نتفلسف ونسوي شي قبل لا نسأل






طبعاً المواقف والذكريات كثيرة



لي عودة إن شاء بعد ما أقرى مواقفكم



أتمنى المشاركة من الجميع



لكم خالص التحايا