الـسـلام عـلـيكم ورحـمـة الـله وبركـاته
مرحبا ميناا
كيفكم مع العطلة والشمس الجميلة
مبارك عليكم الشهر مقدما والله يجعلنا من صوامه وقوامه ويتقبل منا عملنا
اللهم آمين
ولا أنسى أشكر الإدارة على القرار الحكيم في إغلاق المنتدى فترة رمضان
جزاكم الله كل خير على هالقرار
وقبل ما ندخل بالموضوع ترا الموضوع صور X صور عشان كذا مثل ما تعودنا أنا ونونو ومعشر المصورين نحطه بقسم الجرافيكس لأننا للأسف مظلومين مافتح لنا قسم خاص بالتصوير
فالعذر والسموحة
أبها البهية ومن لا يعرفها
خلوا الخضار والشهابه على جنب عند الجو
جو هالمدينة عجيب
جو صحي يخليك تقوم الفجر منتعش
يخليك بدل ماكنت بالرياض تنام 8 ساعات هناك يكفيك 6 ساعات
جو يخليك تطامر الجبال وتاكل آيسكريم بدون ماتوجعك ركبك ولا لوزك << أشوى أني شايلة لوزي XD
بعد هذه المقدمة التمديحية بندخل على الصور اللي التقطتها لأبها في سفرتي القصيرة لها
لكن من الآن تحذير ترا الموضوع مليان صور وبربرة مع أني منقية بعض الصور بس والا هي فوق الميتين
فيبي لكم صبر شوي على بال ما تفتح كلها
بسم الله
بداية بطريق الرحلة لازم الكاميرا مرافقتني
هنا وقفنا بمحطة ومن الفضاوة عجبتني رغوة الصابون اللي يغسلون بها السيارة
فما فوتها وصورت البنقالي وهو يرشها طبعا بعدها عطاني نظرة مرعبة الله يخسه
ببدأ بأجمل منطقة بأبها
وهي السودة
اللي بيروح لأبها فيه مكان استراتيجي لا يفوته
وهو الغابات اللي خلف فندق الانتركونتيننتال
طبعا أول الغابات مخيمات ومعسكرات شبابية تهبل
لكن كل ماتعمقتو بالغابة جوا يفضى المكان لنا يا العوائل ^_^
هناك كل يوم ضباب ومطر
هنا ما أمدانا جلسنا ساعتين إلا ابرقت وارعدت ونزل علينا مو مطر لا بَرَد ( ثلج صغير ^_^ )
وماعاد قمنا نشوف سياراتنا من الضباب ^_^
شوفوا الضباب يامحلاه << فيس يقول وش قرادتي يوم أني أرجع للرياض
هنا الجبل الأخضر من بلكونة شقتنا
الجبل الأخضر ودكم تشوفونه بس بالليل وبالنهار تغمضون من الشهابه
وهنا شروق الشمس ويا محلى الفجر والشمس بأبها
شمس باردة وهواء يفتح النفس ويبعد الهموم وينسيك حتى أسمك XD
وأحلى فطور صباحي مع اللاب والشاهي
قرد ^_^
نبتة وثمرة مدري وشي
صغيرة مره كأنها بذرة عجبتني فصورتها ميكرو ^_^
هنا يقالي حركات
منارة مدري برج قديم بالفرعا
وهذا بعرور يركبون فوقه << برا
غروب
موو هالصورة بتعجبك دققي فيها وبتعرفين ليه XD
غروب من نوع آخر
على فكرة تراني مالعبت بالألوان مدري ليه الغروب هناك بكل جهة يختلف
هنا وحنا كاشتين إلا تمطر علينا
وطيران رفعنا الشراع وظلينا طول ماهي تمطر واقفين ماسكين الشراع فوقنا
نجي الآن لصور التلفريك
أبها فيها 4 خطوط تلفريك طبعا أكبرها وأفضلها خط السودة وخط الحبلة
ركبت السودة وكنت مأملة أني بنزل فيها لقرية رجال ألمع التراثية وكنت مرة متحمسة لها لكن ويا لخيبة الأمل ما رحنا للقرية التراثية لأنها شوي بعيدة و الوقت ماكفانا فرجعنا بالتلفريك مره ثانية
بالصورة اللي تحت بتشوفون زي خط متعرج هذا مثل الدرج بانينه السكان قديما عشان يطلعون وينزلون من السودة إلى الوادي والعكس .. ماشاء الله عليهم والله اللي مامشيت عليه XD
القرية اللي تحت و يوصل لها بالتلفريك ( قرية عادية مو قرية رجال ألمع )
هذي من مطلات متنوعة وأغلبها من مطل السودة
وهي مطلات مرتفعة على الجبال تطلع لها بالسيارة بس يبي لكم تتمسكون لا تتشقلبون ولاكم بشنطة السيارة XD
هنا ماشاء الله عليهم أغلب بيوت السكان على جبال زي هيييك
رقيت بالفرعا جبل لين انقطع نفسي حينها عرفت أن صحتي مدحدره الله يخلف
وفوق عجبني بيت لونه مميز عن البقية فخذت له صورة بالعزل اللوني ^_^
مدحوا لنا ناس المطعم الدوار بفندق قصر السلام
فرحنا له
ماشاء الله زحمممة عليه بالسرا جالسين نصف ساعة ننتظر تفضى لنا طاولة
وهو عبارة عن بوفيه مفتوح خذ صحنك وعب لين تنفقع
بس صراحة ما أعجبني مره حسيته عادي مقارنة بسعرهم
صحيح أكلهم حليو بس تعرفون البوفيه يجي بارد مو مثل لما يكون فرش من الفرن لبطنك
عشاي
طبعا أعذروني على عدم وضوح صورة الميدان لأني عجزت التقط صورة سنعة في مكان إضاءته خافته ويدور
هذا يسمونه ميدان العدل اللي مقابل الامارة
سالفته الله يسلمكم القصاص يسوونه هنا
يعني قطع الرقاب هووون XD
الله يكفينا وياكم شره
وأحيانا بعد العرضات يسوونها هنا
وهالصورة هي الضربة القاضية
اتحدى وحدة فيكم تصور مثلها
حسيت أني قرانديزر وأنا أصورها XD
ميكرو لحشرة تدنن XD
واحنا بطريق الرجعة للرياض الحبيبة انفقع علينا الكفر
وغيرناه عند بنشر وركبنا الاستبنه
وشوي واحنا ماشين إلا وتنفقع الاستبنه يحوووووول
وهذي صورته حتى الكفر ماسلم من كامرتي
الحمد لله إنها عدت على خير ووصلنا سالمين
تعلموا منها درس أنكم ماتمسكون خط سفر إلا مشيكين على كل ابو شي خصوصا بعد سفرة مثل أبها مابقى فيها جبل ولا شجرة ماطمرتوها بالسيارة
اضطرينا نوقف قافلة سياراتنا لمدة ساعتين لعيون الكفر
ختاما << أخيرااا مابغيتي تخلصين
شكرا للجميع على متابعة الموضوع للأخير
اتمنى اعجبتكم الصور واستمتعتوا بالموضوع
أبها البهية غييير << سحبت على لقب جدة
لما أقبلنا راجعين على الرياض واستنشقت الهواء الحار العليل بغى يجيني تسمم وقرحة
لكن مع هذا كلة فديت تراب الرياض بسمومها وحرها وشمسها تسوى الدنيا كلها ^_^
وصيفنا مع أهلنا أحلـىىىىى
المفضلات