عسلامة النّاس الكلّ (سأحكي بلهجة بلدي ههه و أتحدّاكم تفهموها)

موضوع روعة و الأروع صاحبته "شكرا احم 2"

بالنّسبة لفطورنا اليوم (أو بالأحرى أمس " مازال المغرب عندنا لم يحن بعد ")
بدينا بالتمر " كيف النّاس الكلّ " ثمّ شويّة مخارق على زلابية على محشي (الحلو مفيد يعطينا الطّاقة)
بعد ...صحيّن الشّربة مع عصيرة قارص "يعمل 6 و 60 كيف!!!!" و احنا نتفرجوا عالتلفزة و بعد ذلك قمنا نصليوا المغرب .

بعد الصلاة نعاودو نرجعوا للطاولة باش ناكلو الطبق الرئيسي اللي كان مصلي لحم لكن ناكلوا شويّة خاطر déjà البطن مليانة .. و في الأخير ناكلو ال dessert أي الغلال و هي عبارة عن "دلاّع" و "بطّيخ" و "هندي" و "فقّوس" و ربّما أيضا "كرموس"
اللي يعجبني في رمضان هو هاك الجو العائلي المميز كل حد يبدا يحكي على حاجة و هكّاكة نتعلموا برشة حوايج .
بعد الماكلة مشيت مع بابا للمسجد لاداء صلاة التراويح و هذا الوقت هو اسعد اوقاتي في رمضان ..... صلينا بسورة الكهف بما انها ليلة جمعة و كانت الصلاة طويلة لدرجة انّي تعبت من الوقوف لكن بأجرو عند الله . و وقت رجعنا قام بابا بشراء بعض التحلية و هي العجة الحلوة "البلبلوني" . هي بنينة أما كانت للأسف باردة .

بعد التحلية مشيت انا و اختي للحاسوب و قعدنا نشوفو شفمّا جديد في المنتدى ( بالطبع مسومس ) و نشارك في بعض المواضيع انا و اختي ما نرقدوش قبل السحور اولا ما يجيناش نوم و ثانيا نحبوا السهرية في الليل اما وقت يجي رمضان في الدراسة نوليوا نرقدوا .
رمضان في وقت الدراسة في تونس متعب الدوام متاعنا يكون من الثامنة صباحا ====> الرابعة مساء مع فترة راحة بساعة اما هذه السنة مرتاحين ما فماش قراية في رمضان.
سامحوني طولت عليكم بالثرثرة متاعي وين وصلنا ؟؟

ااااه للسحور ...في عايلتنا نتسحروا على الماكلة التي فيها النّشويّات و السبب هو ان السكريات تهضم بسرعة فتنفذ طاقة الصائم سريعا اما النّشويّات فتهضم ببطء . لكن في السحور نشربوا برشة ماء ( اه لو كنا في مكة لتسحرنا على ماء زمزم اللهم لا تحرمنا من زيارة بيتك و اداء فريضة الحج ) . بعد صلينا الصبح حاضر و رجعنا انا و اختي لغرفتنا و لكن ما رقدنا كان مع السابعة خاطر اختي قعدت تحكيلي في قصة على كونان "من بنات أفكارها"
مشوّقة برشة اما اليوم قمت مع الساعة الثانية ظهرا على صوت هاتف اختي

انتهى ...أرجو أن تكونوا فهمتوني