السلام عليكن ياحبيبات ⁦❤️⁩
عيدنا هذا العام مختلف محتاج مجهود مضاعف من الأمهات لخلق جو فرحة للأطفال والأسرة بالبيت في ظروف الحظر جددي نيتك وتعالو نحاول نخطط لإقامة شعيرة العيد ونحقق سنة الفرح بالمتاح بشكل مميز مبهج 😍😍

🍭 ممكن نعمل جلسة مقترحات مع الولاد نقدر نعمل ايه احتفالا بالعيد ونديهم فرصة يفكرو ويختارو أنا عملت الجلسة دي مع ولادي وطلعنا بالآتي :

🎈هنصلي الفجر جماعة ونفطر على تمر ( سنة ) بعدها نكبر تكبيرات العيد ونصلي صلاة العيد وندوق الكعك اللي هنعمله مع بعض قبل العيد .

🎈ويبدأو يدورا على العيدية المستخبية في مكان ما في البيت 😉

🎈 نشغل أناشيد العيد ونلبس لبس العيد ونقعد بيه طول اليوم ☺️⁩

🎈 هنكلم اهلنا نعيد عليهم وبعدها نعمل مكالمة جماعية مثلا لأصحابنا هنا نكبر معاهم ونعمل مسابقة فوازير وتسالي 🎉🎉

🎈 نتغدى مع بعض وبعدها نلعب بالبالونات ونربطها في رجلينا وكل واحد يحاول يفرقع بالون التاني البالون المتفرقع جواه رسالة ( زي : احضن بابا ، اتشقلب ٣ مرات ، زغزغ اختك ، قول حاجة بتحبها في أخوك ، طلباتك أوامر اختار حد واطلب منه حاجة بس في المعقول 😀 ... نوعو بقى في الرسائل ) أو حلوى يفرح بيها بعد ما بالونه فرقع لو طفل صغير
ممكن كمان نلعب المشي على الركب أو أطراف الأصابع ونحدد منين لفين ونتسابق وألعاب حركية ومسابقات كتير ممكن نعملها.. نلعب بفقاعات الصابون

🎈ما تنسيش هدية العيد ياخدوها بعد صلاة العصر مثلا ممكن تلعبو لعبة ابحث عن الهدية (عن طريق ورقة مكتوب عليها تعليمات ، زي امشي كذا خطوة ، لف يمين ، اطلع فوق انزل تحت عدي من تحت الترابيزة روح من مكان لمكان هتلاقي هديتك 🥳

🎈ممكن كمان نجهز هدايا بسيطة لتاني وتالت يوم تفرحهم وما يحسوش إن العيد خلص

🎈🎈🎈🎈🎈🎈🎈🎈🎈🎈

🍬 في أفكار كمان زي إننا نتخيل إننا بنزور بعض ازورهم في غرفتهم وأعيد عليهم وهما يزوروني ويعيدو عليا وهتبقى لعبة لطيفة .

🍬 لو متاح نشيل زينة رمضان قبل يوم العيد ونحط بدالها زينة خاصة بالعيد

🍬 نملى البيت بالونات بس بلاش نطيرها من الشباك ( ضرر على البيئة ) احنا نفرح بيها ونفرقعها مع نفسنا كدة أحسن 😀

🍬 ما فيش مانع نجيب ملايات جديدة ونغير شوية في ديكور البيت أو ترتيب العفش.

🍬 ممكن نعمل شهادات تقدير للولاد اللي صامو وكمان شكر على السلوكيات الطيبة وأعمال الخير اللي قاموا بيها خلال الشهر المبارك أو بطاقات فيها كل الأشياء الإيجابية اللي عملوها تشجيعا ليهم على الاستمرار .

🍬 نفرح كتير إننا وصلنا للعيد احنا وأهلنا وأحبابنا سالمين حتى لو بيننا مسافات الحمد لله على العافية⁦ ❤️⁩

🎉🎉🎉🎉🎉🎉🎉🎉🎉🎉🎉

🍬 ما فيش مانع تعملي كارت لطيف لزوجك فيه كلمتين حلوين بمناسبة العيد السعيد ⁦❤️⁩⁦❤️⁩

🎁 فكرة إن الولاد يعملو كروت تهنئة لأصحابهم بمناسبة العيد كمان جميلة أوي ممكن يبعتوها بالبريد أو يبعتو رسائل صوتية عن طريق الواتس آب مثلا

وكل عام وعيدكم مبارك سعيد
🎈🎈🎈🎈🎈🎈🎈🎈🎈🎈🎈🎈

منقول بتصرف يسير
منقول من رسائل الواتس
وعن تجربة انا وصحباتى مره عملنا فى العيد يوم ترفيهي للولاد ممكن يتعمل فى العيلة فى مكان زى سطح البيت أو الرووف أو الحديقة وجبنا بلالين صغيرة خالص مليناها ميه وبقينا نفرقعها نرميها على بعض أو حرب الوان عباره عن نشأ والوان طعام بودر من العطار وكمان نرش على بعض بالاسبراى شوية ألعاب جماعية الافكار كتير ابحث وبإذن الله تلاقى حاجة كويسه
وكل عام وانتم بكل خير