هس... ولا حرف!

[أ. عمر]

هس ولا حرف
مسرحيَّة ساخرة من واقع الحياة
باللغة اللبنانيَّة العامِّيَّة


الكاتب: عمر قزيحه
سنة الكتابة: 1998 -1999

وتمَّ التعديل إلى هذا الشكل:
سنة 2009



الجزء الأول
الفصل الأول (تحكيه سارة):
اليوم يا جماعة الخير رح يكون غير شكل في حياتي كلها
من أول ما طلعت نام امبارح
وأنا حاسة حالي مبسوطة كتير
وبالوقت نفسه كنت خايفة كتير وقلقانة كمان
ما تستغربوا اليوم المسا رح يجي واحد ليخطبني
بس أنا مستغربة من وين بيعرفني ليخطبني أصلًا؟!
وبعدين يا ترى كيف رح يكون شكله؟
طويل؟ قصير؟ رفيع؟ بدين؟
لازم بدين، أحلى! الكرش وجاهة!
المهم يللا، المسا بنعرف كل شي إن شاء الله
ويا خبر اليوم بكير بفلوس اليوم المسا ببلاش!
قمت ع المطبخ متل العادة لأشتغل لي شوية
ومسكت المكنسة وطلعت الماما بوجهي فجأة
قلت لها:
_ صباح الخير يا ماما
اتطلعت فيني لحظة وفجأة صرخت بوجهي:
_ يخرب بيتك شو إنك حمارة! اليوم خطبتك وقايمة تشتغلي؟ اتركي هالمكنسة من إيدك تضربي بهالراس! روحي انبطحي نامي لك شوية يا دبة... وتمددي أد ما فيكِ!
بغض النظر عن (حمارة) و(دبة) وهالألفاظ الودية هيدي من نبع الحنان (ماما)...
رح قول بس يا سلام!
يا هيك الدنيا وحلاوتها يا بلاها!
يا ليت كل يوم يجي واحد ليخطبني!

الفصل الثاني (تحكيه أم سارة):
أنا اليوم كتير كتير مبسوطة يا جماعة
اليوم بنتي الأمورة سارة رح تخطب شاب
بقصد رح يجي شاب مع أهله ليخطبوها مني
صرصورة قلبي، آه؟ شو؟
لأ لأ، ما تسمعني عم قول صرصورة رح تحرد!
بس قولكم ليش لتحرد؟
أنا عم دلعها هيك وفوق منها بدها تحرد؟
شي حلو، والله!!
وبعدين إن بدها ما تسمع كلمتي رح فعصها
رح خليها تستحلي تكون صرصورة
رح دقها أتلة رح أنتف لها شعراتها
هلأ بدي روح فطسها من الأتل لأنها...
لأنها شو؟
شو عملت سارة؟؟
عملت شي قولكم؟
أنا ما معي خبر!
بس يللا الله يعيننا على بنات هالجيل هادا
بس شو كنت عم قول أنا؟
آه!!
أيواااااااا!!
"سرسورة" قلبي رح تصير عروس!
أديش أنا مبسوطة
قمت لأعمل تظبيطة مرتبة للبيت اتفاجأت فيها حاملة المكنسة!
عملت لها بهدلة معتبرة، الله يخرب بيتها صحيح شو هالعقل الفاضي
الواحدة بدها تخطب وحاملة مكنسة!
لا حول ولا قوة إلا بالله العلي العظيم
اليوم جات لها الشطارة على الشغل؟
الشغل؟؟
الله يخرب بيته هو التاني!
ما بيخلص بالهين!
ما لحقت أترك كل شي من إيدي وأقعد شوية
إلا وكنا صرنا عشية
ولييي شو صار لها سارة؟
تضرب شو إنها حمارة!

الفصل الثالث (تحكيه سارة):
أوووووف!!
شو هالجيل من الأمهات هدول ما بيخلوا بناتهم يعرفوا ينبسطوا شوية
بكل شي بدهم يتدخلوا؟
شو فيها يعني أنها الواحدة تلبس فستان أسود إذا جاية واحد ليخطبها؟
رح يصير معه عمى ألوان مثلًا ويبطل يشوف؟!
بعدين لما اشتريت هالفستان الماما ذات نفسها قالت لي حلو كتير وبيجنن
ودايمًا بلبسه وبطلع فيه من البيت
هلأ إذا بدي ألبسه بالبيت بصير مبينة متل الغراب الأسود
وكمان بيتشاءموا مني الناس وبيبطلوا يخطبوني؟
شو هالخرافات هيدي؟
الله يعينني على عقل أمي
حاولت أقنعها، لأ، ما لحقت حاول أساسًا...
بمجرد ما حاولت أفتح تمي لأعترض انفجرت عليي بالصريخ
وغصب عن راسي رجعت ع غرفتي لغير الفستان وألبس واحد تاني لونه بوردو
قال الماما هيك أحلى وبعجب الشاب وأهله وما بيبطلوا يخطبوني
ما بعرف ليش عم أتذكر مصارعة الثيران بإسبانيا؟!
وبعدين ما عم أفهم ليش الفستان من عين أصله إذا الواحدة جاي لها عريس، ولبست كنزة وبنطلون بتكون قليلة ذوق؟!
العمى شو كان صار بالماما لو قلت لها رح فوت بالبيجاما؟
قولكم كانت نطت من الشباك وانتحرت إن شاء... أأأ... لا سمح الله؟؟
الله يعين على الماما وعلى شباب هالجيل شو إنهم بيهتموا بالمظاهر الفاضية!
قال لازم ألبس أحلى شي عندي لأجل ما يتطلع بواحدة تانية بحياته كلها
ما بعرف والله، يللي عملوا هالفستان البوردو ما رجعوا عملوا غيرو؟؟
ولا أنا أخدت الحق الحصري أني وحدي ألبسه بالعالم العربي!
والله ما عم أفهم عقل الماما ولا عقل هيك شباب بالمرة!

الفصل الرابع (تحكيه أم سارة):
أكيد أكيد لو هالعيلة يللي جاية تخطب سارة لابنهم عرفوا أديش هي هبولة كانوا بطلوا يجوا
بنتي رح تخليني أوقع بالسكتة القلبية!
من امبارح عم تنق بدها تلبس الكنزة والبنطلون
قال شو؟ هيك بتبين حلوة وكلاس!
أه بلا كلاس بلا بطيخ!
واحدة جاية شاب ليشوفها ويخطبها لازم تلبس أحلى شي عندها لتخليه ما يتطلع على واحدة تانية غيرها بحياته كلها
وبعد ما قنعتها تلبس أحلى فستان عندها
جاية لتلبس الفستان الأسود
ما بعرف إن مفكرة حالها غراب مثلًا؟!
الله يعينني ويسترني من شي جلطة قلبية من ورا هبلنتها!

الفصل الخامس (تحكيه فادية أخت سارة):
اليوم بصراحة مش عارفة شو عم يصير
كل يللي فهمته أنه بدو يجي واحد (ياخد) أختي سارة
الحمد لله هيك بتبطل غلاظتها فوق راسي كل يوم!
بس لوين بدو ياخدها يا ترى وشو رح يعمل فيها؟
وليش البابا فتح لهم البابا وقعد يرحب فيهم وهم بدهم ياخدوا سارة؟!
شو الظاهر سارة مش بنته الحقيقية وكان مخبي علينا!!
أو أنها هالغليظة هلكته من تقلة دمها ومنو مصدق على حاله حدا ياخدها ويريحه منها!
كان نفسي أقعد معهم بالصالون لأعرف شو عم يحكوا بالضبط
بس الماما ما رح تخليني أكيد
قمت من محلي فسألني أخي فريد:
_ لوين رايحة يا فادية؟
قلت له:
_ رايحة أشرب كتير عطشانة
رحت ع المطبخ ومديت إيدي للبراد
وما لقيت إلا الماما ورايي عم تصرخ وهي معصبة:
_ هس... ولا حرف!!
شهقت من الرعب والمفاجأة، ودرت أتطلع فيها وأنا عم حط إيدي على قلبي الصغير المسكين يللي خاف، وقلت لها:
_ خوفتِـــ...
قاطعتني في غلظة:
_ هس... ولا حرف!!
حسيت حالي متضايقة
شو هيدا يا جماعة؟
أمهات آخر زمن!!
قلت لها:
_ بس أنا ما حكيـ...
مسكتني من أذني وصرخت فيها مباشرة:
_ هس... ولا حرف!!
وراحت مرة تانية للصالون!!
الله يثبت علينا العقل والدين!!

الفصل السادس (يحكيه أحمد، الأخ الأكبر):
يا فرحتك يا أحمد!!
أخيرًا أختك رح تنخطب وتحل عنك!!
منافستك في الدلال رح تروح من وجهك
يا هيك الأخبار الطيبة يا بلاها!!
بس الماما ضحكتني ضحك وهي عم تتعامل مع الأمر وكأنه معركة
أو كأنه رئيس الجمهورية جاية بنفسه لياخذ أختي!!
ممنوع حدا من الأولاد (الصغار) يتحرك أو يعمل حركة
حتى أختي الصغيرة فادية لما راحت تشرب تركت الماما الصالون ولحقتها تبهدلها
شفت إخواتي كلهم مش راضيين على يللي عم يصير
وحسيت بالشفقة عليهم فقلت لهم ببساطة:
_ شو يا ولاد، حابين تتفرجوا على التلفزيون؟؟
تطلعوا لي كلهم بنظرات الانبهار وهن عم يهتفوا:
_ أكييييد!!
ولسا ما خلص هال(أكيد) هيدي إلا والماما صارت عنا بالغرفة وصرخت:
_ هس.. ولا حرف!!
ورجعت للصالون
وقمت أنا كمان لأروح لغرفة الجلوس
ما لقيت إلا إخواتي وقفوا معي فأشرت لهم بإيدي ليرجعوا
وقلت لهم بكل ترفع وكبرياء:
_ أنا رح أحضر التلفزيون لوحدي، يحق للشاعـ... للأخ الأكبر ما لا يحق لغيره!!
ورحت لغرفة الجلوس وأضأت التلفاز وبكل بساطة
هيدي هي نعمة أنك تكون أخ أكبر!!

الفصل السابع (تحكيه نورا، الأخت الصغرى):
أنا كتير مقهورة وزعلانة!!
أختي اليوم جاية واحد ياخدها وما بعرف شو رح يعمل فيها
يمكن يقتلها ويرمي جثتها بأول برميل زبالة يشوفه!!
وأخي رايح يحضر التلفزيون لأنه الكبير بيحق له ونحن لاء
كنت رح أبكي لما وصلني صوت التلفزيون وركب العناد في رأسي
وقمت من محلي لازم روح أحضر التلفزيون
آه بدي أحضر التلفزيون شو ما صار يصير
وفجأة سمعنا صوت ركض وبعدها صوت أخي عم يصرخ :
_ آآآآآآآآآآآآآآي
وقبل ما نفهم شيء كانت الماما ساحبة أخي من أذنيه لترميه بيننا وهي عم تصرخ:
_ هس.. ولا حرف.. عنا ناس!!
ما فينا ضبطنا حالنا وقعدنا نضحك فصرخت بوجهنا:
_ هس.. ولا حرف.. استحوا على دمكم.. عنا ناس!!
حطينا إيدينا على أفواهنا لنكتم الضحكات هيدي
والماما عم تتطلع فينا وكأنها رح تأكلنا بلا ملح
وما صدقنا كيف أنها تركتنا ورجعت للصالون
الحمد لله!!

الفصل الثامن (تحكيه سارة):
وصل العريس يا سارة!
قالتها الماما وحسيت حالي رح أوقع بالأرض
ما بعرف شو صابني بس خفت أني ما أعجبه ويقول ما بدو ياني
هلأ ممكن هو ما يعجبني بتصير وطبيعية، بس أنه يصير العكس مصيبة!
طبعًا أنا واثقة بحلاوتي فائقة المألوف، بس يمكن هو ما يكون مذوق كتير!
دخلت الصالون مع أهلي وقعدنا وأنا عاملة حالي عم أتطلع للأرض بينما كنت عم أتطلع فيه هو
مش ميشان شي أكيد بس لشوف إن كان عم يتطلع فيني و(نظرات انبهار في عينيه متل ما أكدت لي الماما لما بدو يشوف فستاني البوردو هادا) ولا لاء
بس ميشان هيك ما أكتر
وإذا بدكم الصراحة ما حسيته اتطلع فيني بالمرة
ولا لفت انتباهه هالفستان البوردو يللي جبرتني الماما ألبس له ياه
كل الوقت عم يتطلع بالحيط وجامد متل الصنم!!
لحتى افتكرت أنه عم يطلع من عينيه أشعة لايزر يخترق فيها الحيط
ويشوف السرداب والكنز الخفي وراه!!
والماما كانت عصبية شوية وكل ما سمعت حركة تترك الصالون وتروح تعيط على إخواتي
وكل ما نسمع صوتها عم تعيط عليهم كان هو يبطل يعمل صنم!
لأ ويقعد يضحك ويضحك بطريقة عجيبة
بس ما كان فيني وجه له اللوم لأني أنا نفسي أحيانًا بيكون جاية على بالي أضحك
وبالأخير سمعنا صوت التلفزيون عالي عم يصدح بالبيت
وجن جنون الماما وراحت متل القذيفة لتصرخ على أخي وتطفي له التلفزيون وتسكته هو وإخواتي
ورجعت بعدها ع الصالون وقعدت مبتسمة
ولا كأنه صار أي شي كان!
قولكم هالجماعة يللي عندنا بتجي لهم حالات عمى وطرش فجائية؟؟
وهنا عمل حاله أبوه للشاب أنه عم يسعل ليلفت انتباهنا وقال:
_ وهيدا هو حال ابني ووضعه، يا ترى رح يكون لنا الشرف أنكم توافقوا عليه؟
اعتدل الشاب، ونظرات اللهفة مبينة واضحة بعينيه
وحسيت أنه البابا بدو يحكي
بس الماما – متل العادة – سبقته وقالت:
_ أنا بشوف أنه...
وبهاللحظة اقتحم إخواتي كلهم الصالون فجأة
بهتت الماما، وبهتنا كلنا للحقيقة من هالحركة
وتلون وجه الماما بألف لون من الغضب
ودارت نحوهم لتصرخ عليهم
بس قبل ما تفتح فمها بحرف صرخوا كلهم بوجهها:
_ هس ولا حرف... استحي على دمك يا ماما... عنا ناس!!

[أ. عمر]

الجزء الثاني
الفصل التاسع (يحكيه الأولاد):
نحن ولاد شطار وبنسمع الكلمة
شفنا الماما اللي لازم نطيعها كل ما حدا حكي بتسكته
وبتقول له هس ولا حرف استحي على دمك عنا ناس
ميشان هيك أول ما حكيت هي قمنا وسكتناها
وما بس هيك قلنا لها كمان تستحي على دمها لأن عنا ناس!!
أكيد رح تنبسط منا كتير الماما لأنا طلعنا ولاد شاطرين وعاقلين!!

الفصل العاشر (يحكيه العريس):
هيهاهاهاهاهاهاهاهاهههاهاااااااااااااااا
شو أنا جاية أخطب بنت عادية ولا بنت رئيس الجمهورية لحتى أمها آخدة كل هالاحتياطات العسكرية كأنها شي جنرال بالبيت الأبيض؟!
أول ما لمحت بنتها رايحة للمطبخ لحقتها لتعيط عليها
وكل شوية بتطلع لتعيط على هالأولاد المساكين
بصراحة ما فيني تمالكت حالي من الضحك أبدًا لما شفت هالأولاد فاتوا وسكتوها!!
والمسكينة انصدمت وصابتها الصاعقة بالأول وما عادت تعرف تحكي شي لكم ثانية
وبعدين وقفت وصرخت بصوت متل يللي مات ابنه إدام عينيه:
_ يخرب بيتككككككممم! شو أنتوا حمير ولا أيش؟! عم تسكتوا أمكم!
قالت لها بنتها الصغيرة:
_ عيب يا ماما، المامات المهذبين ما بيقولوا لولادهم حمير!!
وهون هجمت أمهم عليهم وبديت فيهم خبط وضرب وهم عم يركضوا إدامها هربانين وهي لاحقتهم عم تولول...
وأنا ما عاد فيني هدي حالي
صرت أضرب إيدي ببعضهم وأضحك وأضحك بأعلى صوت
وفجأة انتبهت أن البنت يللي جاية أخطبها عم تتطلع فيني ووجهها محتقن من الغضب لأني عم بضحك على أمها
مباشرة وقفت الضحك ولكزت البابا بطرف إيدي
كنا وصلنا اللحظة الحاسمة وكان عم يطلبني للبنت...
بقصد كان عم يطلب لي البنت
أكيد هي موافقة، وين رح تلاقي أحسن مني يعني؟!
هيك الماما قالت لي قبل ما نطلع من البيت
فكرت أرجع أسألها لتأكد لي هالحكي إدامهم
ليسمعوا منيح ويعرفوا أنهم ما رح يلاقوا أحسن مني أكيد
بس ما سألتها لأني بعرف أنه المامات المهذبين ما بيكذبوا على ولادهم أبدًا
ومامتي أنا (لحد هلأ) مهذبة
الله يستر من الجاية يا رب!
بس هلأ المهم موعد الخطبة يعني
وهون فاتت حماتي (المرتقبة) ع الصالون مرة تانية

الفصل الحادي عشر (تحكيه أم سارة):
شو هالمسخرة هيدي؟!
ولاد أد فص التوم عم يسكتوا أمهم وإدام الناس كمان!!
أيام آخر زمان صحيح!
بس ما قصرت فيهم أبدًا وعملت لهم أتلة مرتبة
رجعت للصالون وأنا عم بغصب حالي ع الابتسام وقول:
_ معليش هم هيك الأولاد آخر أيام، أد ما ربيناهم، بيفضلوا مش واعيين، شو بدنا نعمل؟!
ومتل العادة انفتح الموضوع عن الأولاد وهموم الأولاد ومشاكل الأولاد ومدارس الأولاد وعلامات الأولاد ومن هالحكي المعتاد
بس شو القصة مع هالشاب هيدا قاعد لاوي بوزه ومش عاجبه؟
لما الأولاد قللوا تهذيبهم قعد يضحك لهم ولما عم نحكي عليهم عبس وزعل؟!
أنا رح فرجيك إن صرت حماتك
إن ماني مطالعتلك هالموقف من عيونك!
ويا ما رح تشوف!

الفصل الثاني عشر (تحكيه أم العريس):
الله يمضي هالليلة على خير يا رب
وكأننا رايحين نخطب بنت رئيس الجمهورية وما معنا خبر
كلها (شقفة) بنت لا جات ولا راحت!
والمشكلة لما انفتح موضوع الأولاد كنا ع لحظة رح نتخيل أنه ولاد هالمرأة من فصيلة سوبرمان شخصيًا!
مش ناقصها غير تقول لنا أنهم جايين من المريخ وتخلص!
وأكتر شي خلاني أتعجب أنها خبطت بإيدها على راسها وهي عم تقول:
_ ييييي!! نسيت إبريق الشاي ع النار، قومي يا سارة صبي الشاي للضيوف!!
أنا أول مرة بسمع أنه الناس بتضيف شاي للي جايين يخطبوا بناتهم
وبعدين منها هيدي المشكلة يعني
اللي بيحير هو أي وقت حطت إبريق الشاي ع النار؟!
صار لنا ساعتين ونص وهي عم تفتح مواضيع وتصف حكي بلا طعمة بنوب
يعني أكيد الشاي غلي وتبخر، وتبخر معه الإبريق وفرن الغاز ذات نفسه كمان!
وما لقينا إلا سارة راجعة وهي عم تتطلع بأمها محتارة

الفصل الثالث عشر (تحكيه أم سارة):
حبيت أستفرد بهالشاب بكم سؤال بلا ما تكون سارة موجودة
قلت لها إني نسيت إبريق الشاي ع النار لتروح تشوفه
طلعت سارة من الصالون واستدرت أنا نحو الشاب لأسأله
وإسا ما فتحت تمي بحرف لقيتها راجعة عم تقول (تضرب شو إنها هبولة):
_ بس ما في شي ع النار يا ماما
يخرب بيتك صحيح!
كل هالأد ملهوفة على القعدة مع المستر حضرة جنابه لتوصلي للمطبخ بنص ثانية وترجعي؟!
أطلقت لي ضحكة هيك كيف ما كان وأنا عم قول لها:
_ أكيد إخواتك طفوا النار تحته روحي اعملي واحد غيره
طلعت سارة من هون ودرت أنا أسأل الشاب:
_ هو أنت كيف نظرتك للرجال أنه يعامل المرأة؟!
رد عليي في (ذكاء) عجيب:
_ متل ما البابا بيعامل الماما
الله لا يعطيك العافية إن شاء الله!
ما أنا سألتك هالسؤال لحتى كيف ما كان جوابك قوم ضدك وعارض لك كلامك وسفه لك رأيك
تمالكت حالي بصعوبة وسألته مرة تانية:
_ وكيف أبوك بيعامل أمك؟!
أشار بإيدو ناحية ما قاعد أبوه، ورد ب(تناحة) منها مسبوقة:
_ أحوا البابا إدامك، اسأليه، ما بحب أتدخل بخصوصيات العالم أنا!
تدخل أبوه هون ليسألني باستغراب:
_ وليش هالأسئلة هيدي؟
رديت بسرعة بديهة:
_ حابة أعرف إن كان من النوع اللي بيقسى ع المرأة، ولا كيف بعاملها أو إن...
حسيت هون أنه تبريري ما رح يقنعهم، فأسرعت أقطع كلامي وغير الموضوع، وأنا عم أهتف بحماسة (كأني اكتشفت سر القنبلة النووية):
_ بس أنا مستغربة صحيح أنه (صهري) باعتبار ما سيكون، وما تطلع ببنتي ولا مرة، يعني هي مرتبة حالها ولابسة هالفستان يللي مخليها تبين حورية لمين؟ يعني مش عيب ما تتطلع لها وتبين أديش مبسوط فيها؟

الفصل الرابع عشر (من العريس طبعًا):
شو هالقصة مع هالنسوان يا عمي؟
مين بدنا نصدق ولا مين؟
الماما قالت لي ما لازم أتطلع بالبنت يللي بدنا نخطبها لأنه عيب
وأمها عم تقول لي هلأ لازم أتطلع بالبنت يللي بدي أخطبها لأنه عيب ما أتطلع فيها
شو الحل قولكم؟ آه؟؟
بنعمل مسابقة أسئلة وأجوبة وبنحط تلات وسائل مساعدة لنعرف مين عم يحكي الصحيح؟!
بعدين البنت إن ما لبست الفستان ما بتبين حورية، ولا كل البنات بس يلبسوا الفستان بيتحولوا لحوريات ونحن ما بنعرف؟!
شو هالقصة مع هالنسوان يا عمي!!
الفصل الخامس عشر (تحكيه أم سارة):
ما رد عليي هالسطولة لما سألته ليش ما عم يتطلع بسارة!
هلأ أكيد بعد ما يروحوا بدها تشمت فيني وتقول لي أنه كان معها حق ولو لبست الفستان الأسود ما كان بعد عينيه عنها
الظاهر من هلأ وبدك تعمل لي وجع راس يا صهر النحس!
فاتت سارة حاملة صينية عليها فناجين الشاي، وما لقيت حالي إلا عم بغمز بعيني وقول بلهجة كلها تأكيد:
_ أكيد بكرا سارة بعد كتب الكتاب لما بيحق له يشوفها رح تفرجيه من جمالها شي كتير
وبديت سارة تقدم الشاي للضيوف
لحد ما وصلت لوالد هالعريس الطبلية
وهون صار أمر غريب
غريب وعجيب لدرجة مش طبيعية
بالمرة!

[Jomoon]

السلامـ عليكمـ ورحمة الله وبركاته~

جميل جدًا
الله يعين أمثال سارة على أمهاتهم
مشوقة جدًا المسرحية وما توقعت لها تكملة
حلو أنك كملتها
أنتظر الباقي بشوق

ربي يبارك فيك يارب
على هذا الجمال
زادك ربي من فضله
في حفظ المولى،،
~

[أ. عمر]

السلامـ عليكمـ ورحمة الله وبركاته~

جميل جدًا
الله يعين أمثال سارة على أمهاتهم
مشوقة جدًا المسرحية وما توقعت لها تكملة
حلو أنك كملتها
أنتظر الباقي بشوق

ربي يبارك فيك يارب
على هذا الجمال
زادك ربي من فضله
في حفظ المولى،،
~

وعليكم السلام ورحمة الله وبركاته
دامت الابتسامة أولًا، وبعض الأهل في القرى كانوا يتعاملون مع الخطبة كأنها معركة حربية بتعقيدهم على أولادهم
ثم نرجو أن يتوقف إغلاق المنتدى المستمر كي لا نتأخر كل مرة كثيرًا في وضع التكملة
بارك الله بكم ولكم

[أ. عمر]

الجزء الثالث
الفصل السادس عشر (يحكيه العريس):
قال بكرا بعد كتب الكتاب رح يعجبني جمالها لسارة!
أكيد أمها شايفتها بشعة بتقرف!
وعقليتها _ لهالأم المتحجرة _ من الجيل القديم اللي بيقول إن البنت ما بتحلى إلا لما بتنخطب وبينكتب كتابها!
بس كيف رح تفرجيني من جمالها شي كتير يعني؟!
إن شاء الله بدها تعمل متل يللي بنسمع عنهم دايمًا؟
وتقوم تلبس تنورة مشققة مبينة رجليها منها
وتحط لي من هالسخافات بقلب عينيها لتبين متل الجناني؟!
أكيد بدها تعمل هيك وتطلع متل يللي آكلة بوكس بنص تمها
ووجهها مزرق كأنها كانت غرقانة بنص البحر وطلعوها بعد ما ماتت ورجعت عاشت...
وعينيها رح تنفجر وتبحلق وتحدق كأنها شي جنية جاية من جهنم لتصيبنا بالسكتة القلبية...
والله لفك رقبتك يا سارة إن بتعملي هيك شي...
لأ، لفك رقبتك إن بتفكري تعملي هيك شي...
أو لأ، لأ، لأ يا عمي...
أعوذ بالله ما رح خليها تعملها بنوووووب.

الفصل السابع عشر (يحكيه أبو العريس):
يا مقلب القلوب ثبت قلوبنا على دينك يا الله
كانت سارة واصلة لعندي وحملت فنجان الشاي لتحطه ع الطاولة إدامي
وما لقيت إلا ابني وقف فجأة وصرخ بوجهها مباشرة بصوت رهيب:
_ أوعــــىىىىىىى تعمليهاااااااااااا ولة!!
نطت سارة من محلها من هول المفاجأة وهي عم تشهق من الرعب
وانسكب كل كوب الشاي اللي كان بإيدها ع وجهي ورقبتي
قمت متل المجانين عم نط يمين وشمال
وأنا حاسس حالي صرت فروج مشوي تقريبًا
ورحت أتطلع بوجه ابني بغضب، وأنا حاسس حالي بدي آكله بلا ملح
وسارة وأمها وأبوها ومرتي كلهم صاروا يتطلعوا فيه وكأنه شي واحد بتجي له بلاهات عجيبة بلا ما يحس على حاله!
واحمر وجه ابني وقعد يتطلع بالأرض وحبيت أنقذه من هالإحراج فصرخت:
_ آآآه، الشاي بيحرق...
ردت عليي أم سارة:
_ أكيد بدو يحرق، ليش اسمه شاي لكان؟ ولا أنت فاكره بوظة مثلًا ومنا عارفين!
الله يصبرني على هالبلوى يا رب
إجابة يعني بتخلي الواحد لو معه مسدس يطلعه ويفضيه كله براسها
بلا ما يحس بالذنب!
قلت لها وأنا معصب منيح:
_ ما في محل لغسل وجهي ورقبتي فيه؟
انتبهت (العبقرية) لحالها هون وطلبت من سارة (تتأكد) أنه في طريق للمغسلة
ع أساس في حواجز عسكرية بتطالب بالهوية عندهم ببيتهم لتتأكد أنه في طريق للمغسلة يعني!
كلهم كم شقفة مفعوص مقبورين بغرفهم بعد البهدلة يللي أكلوها من أمهم من شوية
وقامت سارة ورجعت لتقول لي أني أتفضل
وليش قامت وهي عارفة أنه ما في حدا ما بعرف!
المهم أني اتفضلت لغسل بالمي الباردة من هالبلوى الحارقة هيدي
بس حسابي معك بعدين يا هبولة ع هالجاعور هيدا
أنا بفرجيك ولا...
أنت انتظر عليي شوية...
بس لما بنرجع ع البيت!!

الفصل الثامن عشر (تحكيه سارة):
شو هالمصيبة السنسكريتية هيدي؟!
ما لقيت إلا هالولد نط عليي وصرخ فيني ميشان ما ضيف أبوه شاي
أكيد أبوه معه سكري، وابنه خاف عليه أنه يتأذى من شرب الشاي
بس ضروري (يجعر) هيك؟
وبعدين أنا (ولة)؟؟
يضرب شو إنه طبل بلا ذوق!
رحت للمطبخ وعملت للأب كباية تانية ما فيها سكر
ورجعت قدمت له ياها ليشربها بدل يللي تحمم فيها هالمعتر
وأول ما شرب منها نقطة بين عليه الاشمئزاز وسألني:
_ بس يا بنتي ما في سكر؟ الكباية ما...
قاطعته بحزم:
_ السكر ما بيسوى لك يا عم!
لوي بوزه باعتراض واضح بس ما حكي ولا كلمة
وبقي حامل كوب الشاي ما رجعه للطاولة ولا شرب منه ولا رشفة زيادة
وسألتني الماما محتارة:
_ ليش ما بيسوا له السكر يا سارة؟
رديت عليها في (تأكيد):
_ لأنه معه سكري!
تطلع الكل فيني بدهشة، وهالمسكين سألني وهو مصعوق:
_ شو... شو عرفك؟ قبل ما أوصل بشوية لهون اتصل فيني رفيقي من مركز التحاليل وقال لي معي شوية سكري!!
تطلع فيني ابنه بانبهار شديد (أخيرًا تحرك الصنم والحمد لله)، وهو عم يتمتم بتقدير واضح:
_ أكيد بدها تعرف، شو اسمها رح تكون خطيبتي لكان؟ بس بجد مستغرب كيف عرفتِ هالشي؟
يا سلام شو إنك أجدب أنت وأبوك!!
كيف عرفت يعني؟
منو من جاعورك ميشان ما ضيف أبوك شاي؟
كنت رح قول له هالحكي بس أبوه سبقني وهو عم يقول بحزم:
_ بس النسبة معي خفيفة كتير، وقال لي رفيقي فيني أستعمل السكر بس أقل من الأول، فيا ريت تروحي تجيبي لي سكر
قمت متأففة وأنا عم بكبت السباب بصعوبة
يعني فيه يشرب الشاي بسكر وقام ابنه عم يجعر فيني ميشان ما ضيفه شاي؟؟
ضروري هالبهدلة يعني؟!
لما انكب الشاي لحق منه شوية لأصابعي كمان
حسيتهم احترقوا بس نحن البنات قوايا، نحن جدعات بحق وحقيق!!
منو متل هالشباب مايعين وفورًا بدي الزلمة يولول وصار بدو يغسل!
حملت هالسكر
وفجأة سمعت صوت تأوه قوي كتير
وبعد ثانيتين تقريبًا طلعت صرخة عنيفة
ورهيبة

[Jomoon]

أهلًا أستاذ :"),

قهرني لما صرخ انسلخ أبوه!
وش هالعائلة
حسيته كنه حقيقي!!
ربي يبارك فيك أستاذ
متشوقة للقادم

~

[أ. عمر]

أهلًا أستاذ :"),

قهرني لما صرخ انسلخ أبوه!
وش هالعائلة
حسيته كنه حقيقي!!
ربي يبارك فيك أستاذ
متشوقة للقادم

~

قليل من الأحداث استوحيته من الواقع فعليًا

[أ. عمر]

الجزء الرابع
الفصل التاسع عشر (تحكيه أم العريس):
الحقيقة أن ابني تصرف بحماقة مش معقولة
بس أنا ما همي أعرف ليش وقف يجعر بوجهها
أكيد تخيلها بشي موقف فصرخ بهالطريقة هيدي
بس هالزلمة هادا حسابه معي هال(...)
ملحوظة: تم حذف الكلمة هنا، احترامًا لخصوصية المرأة في سباب زوجها!
البنت اللي رايحين نخطبها عارفة أنو معو سكري وأنا لاء!!
هلأ رح أفرجيه لما نرجع عالبيت
وإذا ما خليته (يبق) كل شي من تمو هيدا ويعترف!!
انتبهت أنه في حالة سكون بالصالون
أخيرًا ما في مواضيع مفتوحة؟؟
فرصة ذهبية لنخلص هالجلسة اللي طولت وما عادت تخلص
لكزت ابني بكوعي والظاهر أنه فهمني
فمد إيدو ليلكز أبوه
وإجا ضارب كوعه بحرف الكنبة اللي قاعد عليها
فتأوه بصوت مسموع من الوجع المفاجئ
وباللحظة التالية رد إيدو بكل قوته و...
طراااااااخ بخاصرة زوجي وكأنه عم يلعب فيه مصارعة!!
ونط هالمسكين وهو عم يصرخ:
_ آآآآآآآآآآي!!
ومع نطته انسكب هالشاي مرة تانية على وجهه ورقبته
وما عاد فيه يحتمل فدار صوب ابنه وهو عم (يزعوط):
_ ولك شو باك أنت اليوم؟؟ آه!! صابك العمى ولا الجنون!! فهمني ليتك ما تفهم رأسك من رجليك!!
تطلعت فيه بغضب وانتبه لحاله فأسرع يبتسم في بلاهة وهو عم يقول للجماعة:
_ هيدا لأني اتديقت لأن الكنباية تلوتت شاي، ولأنه...
حس هون أنه ما حدا رح يصدق هالتبريرات الفاضية، فتابع كلامه (متذاكيًا):
_ وكمان خاصرتي أنا بتوجعني!
وباللحظة التالية مباشرة انفتح موضوع جديد بهالجلسة
عن الخاصرة ووجعها وعلاجاتها!!


الفصل العشرون (ويحكيه العريس):
اللهم لا حول ولا قوة إلا بك يا الله
شو باه البابا اليوم كل ما كب على حاله نقطتين شاي بيقوم يصرخ ويولول!!
لو كنت عارفه هيك كنت أخدت الماما بس معي لأنه رح يجرصنا!!
وبعدين أي وقت رح نخلص من تقلة الدم هيدي!!
كل ما حدا حكي كلمة لازم ينفتح عليها موضوع طويل عريض؟؟
شو المشكلة لو الناس حكيت بالخطوبة وإن فيه موافقة ولا لاء بالأول؟؟
خلينا نعرف إذا فيه موافقة ونحدد الموعد وبعدين يحكوا اللي بدهم إياه
بس قاعدين هيك 3 ساعات عم يحكوا عن...
عن كل شي حكيوا
عن السياسة
والاقتصاد
والجبل
والبحر
والسهل
والساحل
والداخل
والخارج
والأمور الاجتماعية
والأولاد
والمعلمين
والنظار
والمديرين
ومعلمين أيام زمان
والمسلسلات
ووجع الخاصرة
والأطباء
والمستشفيات
والعمليات الجراحية
مو ناقصهم غير يحكوا لسا
إلا عن تربة المريخ الحمراء
وشبهها بعصير التوت
وعن سطح القمر المظلم
وشبهه بقلوب اللصوص السودا!!
يا رب بقى نخلص من هالمشكلة هيدي!!


الفصل الحادي والعشرون (يحكيه والد العريس):
وأخيرًا يا جماعة بدي التعب على وجه المرأة
مش مرتي الله وكيلكن أنا عم أحكي على المرأة اللي بدي أخطب ابنتها و...
شو ليش عم تتطلعوا فيني هيك آه؟؟
قصدي بدي أخطب ابنتها لابني يعني
واعتدلت قائلًا بصوت كله حكمة ووقار:
_ ولما كانت سنة الحياة الزواج والاستمرارية، ولما كان الزواج قسمة ونصيب، أحببنا نسأل إن كانت قسمة ابنتكم الكريمة على ابنـ...
كنت عم أقول هالكلمتين وأنا عم أدير لأشوف ابني
والأخير كان...
كان في سابع نومة ولا على باله الدنيا كلها!!
راحت أمه تهزه بقوة ففتح عينيه متمتمًا في بلاهة:
_ شو في يا ماما، ما بتخلوا حدا ينام؟
قالت له أمه في غضب:
_ ولك قوم، جاية تنام إدام خطيبتك؟؟
رد الولد وكأنه جاية من المريخ بصحيح:
_ ليش أنا خاطب يا ماما، حدا بيجيب الدب ع كرمه!!
وقفت أمها لسارة هون عم تصرخ هي وزوجها وسارة كمان
وأنا ومرتي معهم
كلنا صرخنا بصوت واحد بوجه هالمسطول:
_ دب !؟!!!!!!!!!؟؟!!!!!!؟
فاق ابني من نومته تمامًا مع هالصرخة واستدار يتطلع فينا، وهو عم يهتف بحماسة:
_ خلص موضوعكم اللي كنتوا عم تحكوا فيه عن المريخ الأحمر!!
وأضاف في لهفة واضحة:
_ شو أي يوم رح نكتب الكتاب إن شاء الله!!
وشعرت برغبة أني أبكي وأخبط الأرض بإيدي ورجلي!!
اللهم أنت المستعان!


الفصل الثاني والعشرون (تحكيه سارة):
كنت دومًا بتمنى لو أني صبي لأرتاح من شغل البيت
بس بعد هالجلسة العجيبة قلت الحمد لله أني بنت عقلي بيوزن بلد مش متل عقل الصبيان
(الله يجيركم يا بنات من عقول الصبيان أديش هي صعبة وغريبة)!!
رغم أني طلعت لأنام متأخرة بس ما قدرت أغفى
وأنا عم أتذكر أحداث ليلة الخطبة العجيبة هيدي
فقمت وطلعت أوقف عالبلكونة وأتطلع للنجوم
وصرت أتمنى لو كنت نجمة بهالسما عم أشوف الأرض كلها
وأنا مرتاحة ما عندي لا دروس ولا وظائف ولا مسح وكنس وغسيل وكوي
وفجأة صرت أسمع همهمات خافتة
وتوترت كتير
شو معقولة رجع الشاب لهون ليخطفني؟؟
يا سلام عليي أدا أنا حلوة يا عمي!
بديت دموعي تكرج من التأثر على جمالي الفائق وحلايي الساحق وتأثيري الماحق!!
ما لحق يشوفني إلا كم دقيقة، وما اتحمل أني أرفضه، قال لحاله يا بخطفها يا بنتحر!!
دخلت للمطبخ وحملت أول سكينة لقيتها ومشيت على أطراف أصابعي و...
الهمهمات طالعة من غرفتي أنا!!
لحق يعرف غرفتي كمان؟؟
دخلت وأنا أستعد للقتال
واتفاجأت بمنظر أخي أحمد قاعد ع هالأرض وحواليه إخواتي كلهم
وهو مادد إيديه عم يتمتم بدعاء ما قدرت أسمعه
بس ميزت منه اسمي العظيم (سارة) عم يتردد أكتر من مرة
وإخواته بيردوا وراه بأخفض صوت عندهم:
_ آمين آمين
حسيت بالتأثر الكبير
الله لا يحرمني ياكم يا أحلى إخوة في العالم
صحيح كنتوا بتتغالظوا عليي كتير بس هلأ أحسست بقيمتكم
رميت هالسكينة تحت الفرشة وقلت لهم بصوت متهجد من التأثر:
_ أناااااااا هناااااااااااا
شهق الأولاد واستداروا كلهم ناحيتي مش مصدقين
وصرخت فيني فادية:
_ يعني الرجال اللي كان بدو ياخدك المسا ما أخدك؟؟
وصاحت نورا:
_ ونحن لما جينا غرفتك وما لقيناك قلنا أكيد أخدك ومشي.
وهتف أربعتهم في صوت واحد:
_ طلع منو آخدك.. الله ياخدك إن شاء الله!!
إيعاعاعاعااااااااااااااااااااااااااااااااااااااااا اااااااااا

[Jomoon]

المقطع الأخير مدهش
أما العريس لما نام معه حق ثرثرتهم الكثيرة
بس ما يسويها أحد!

ربي يبارك فيك
انتهت ولا في بعد جزء؟

~

[أ. عمر]

المقطع الأخير مدهش
أما العريس لما نام معه حق ثرثرتهم الكثيرة
بس ما يسويها أحد!

ربي يبارك فيك
انتهت ولا في بعد جزء؟

~

نوم العريس مشهد أعتقد أنني رأيته في مجلس خطبة حضرته يومًا ما مما يقارب ربع قرن مضى
لكن ليس بهذا الشكل، كاد يغفو متعبًا من عمله وليس من الثرثرة، غير أن المشهد انطبع في ذهني فسجلته بطريقة ساخرة
انتهت الحكاية هنا، ولنا حكاية خطبة أخرى ساخرة إن شاء الله، قريبًا...