حصريا [[[ ديوانية عيد الفطر المبارك ]]] دردشة – مواقف – قصص - كل ما يتعلق بمظاهر العيد عند الأعضاء ^^

[worodale5aa]

كيف حالكم .. من العايدين والفايزين يارب

وتقبل الله منا ومنكم صالح الاعمال

........
كيف تقضي يوم العيد ؟
ما هو شعورك في صلاة العيد ؟
ما هي طريقتك في معايدة أبويك ... أقاربك ... أصدقائك ؟
هل مرّت عليك مواقف خارجة عن المألوف في العيد ^^

كلامي بيكون بالعامية عشان اخد راحتي

تسمح لي ابدا احكي من ليلة العيد ؟

طبعا الفرح كان غامرنا وسهرنا الى الساعة وحدة .. عادة ننام بدري من 10 لكن أمي الله يخليها تقصر ثياب اخواني .. وانا مانمت لان مكينة الخياطة فوق راسي.. الكل طبعا كوى ملابسه واخواني كوو اشمغتهم وغترهم واخواتي لباسهم .. وانا كويت لبسي .. وكل شوية اطلع الاكسسوارات فرحانة بيها ( كانها اول مرة تلبس ) .. ولمن لفيت البيت صار شكله غير
.. عندنا عادة أن رمضان نغطي الكنب والاثاث بشراشف ( الا اذا جانا احد طبعا ).. ولمن يجي العيدد نشيلها حتى نحس بتغيير الجو .. هدي عادة ناس من اهل مكة

المهم كنت خابفة مالحق اصلي الفجر او صلاة المشهد .. لان الساعة صارت اثنين .. ولازم اصحى خمسة الفجر ..بس قلت يابنت استخدمي طريقة النوم العميق ( نوم مركز) من كتاب قرأته ويكون كل شي تمام ..

بالفعل صحيت الساعة خمسة وربع والحمد لله شبعانة نوم .. وقمت اجهز حالي وخلصوا صلاة الفجر خمسة ونص وقلت يالله السجادة فين وزعقت على اللي في البيت قوموا اصحوا صلاة الفجر والعيد .. وكنت احسبها بعد الاشراق على طول .. يعني حيكون ستة وربع .. وكان أخويا اللي اصغر مني قد لحق الفجر جماعة وجا يقول هيا .. قلت مانبغى نروح كلنا مع بعض حنتأخر .. كل نفر(مجموعة) يروحوا مع بعض وخلاص . . وانتا تعال معايه ..
اخويا حبيبي هذا اموت عليه ماشاء الله .. دي السنة دخل الجامعة وماشاء الله عليه قرب يختم القران حفظ .. كان كشخة ذاك اليوم الله يحميه .." يالله اقولك تعال نروح ".. كانت الساعة صارت ستة .. والباقين اللي ياخذ دش واللي مدري كيف ..
في الاخير قلنا نسبقهم ... ورحنا مشي مانبغى سيارة والا ما حنلحق وتصير زحمة .. طبعا الصلاة قريبة في برحة وفارشين عليها سجاجيد بس اخدت سجادتي احتياطا وهو كمان ..

من نزلت من العمارة كان في اثنين بيجيوا يسلموا عليه بس كاني ام اللقافة جيت وراه فطولوا على مصلى العيد.. ( طولوا يعني كملوا مشي بدون مايلتفوا)

لمن وصلت كان تكبير العيد يهزني ... مااحس بفرحة العيد الا لمن اسمعه ..- وامس شغلته من جوالي بصوت مؤذن الحرم اسوي جو- .. والناس تمشي فرحانة .. والاطفال مكشخين قدامي يا سلام ..

جلست وكانت السماعات قدامي بشوية .. وشغلت مسجل الجوال يسجل الاحداث هههه
طبعا عارفين ان بعد الصلاة توزع الجوائز من الكريم الرحمن .. لمن افتكرت الحديث دمعت عيني وقتها .. الناس كانت تصلي تراويح رمضان في المسجد وانا اعمالي كانت قليلة وصليت في البيت بس .. يارب نكون وفقنا لقيام ليلة القدر وربي يتقبلها منا جميع وباقي رمضان .. يا بخت الناس اليوم جوايزهم كبيرة .. الله يرحم حالنا

من اكثر الاشياء اللي قعدت اتاملها .. العمال الهنود كانوا جايين مع سجادهم .. سبحان الله .. الناس المكشخة والناس اللي مقامهم عالي .. والناس الفقراء والمتوسطين الدخل .. كلهم مجتمعين لله ..( يحاسبهم ربي على تقواهم ).. كلهم يومتها فرحانين وكلهم سعيدين بالفطر (للصائم فرحتان فرحة عند فطره وفرحة عند لقاء ربه)

كبر الامام .. وطلعت الساعة ستة وخمسة وثلاثين دقيقة .. يعني بعد ربع ساعة من الاشراق ! .. كبر الست تكبيرات ومع كل تكبيرة قلبي يقشعر فرح وتعظيم ... ودخل في صلاته

بعد الصلاة بدت الخطبة .. ومع اني مااحب الاسلوب المتبع في الخطب عادة .. لكن موضوعه عجبني كثير ومبسط وفيه تأملات .. كان يقول ديننا يجمع بين الثنائيات .. مايخلي المسلم يطغى عليه جانب .. مثال.. لو صديقك مات عليه ولده وانت جتك مناسبة سعيدة.. ايش تسوي ؟ انت موضوع بين امرين متناقضين هل تفرح ام تحزن ؟
يقول .. لازم تعزيه بحيث تواسيه وتبين انك متأثر له بالحد اللي تؤدي الحق اللي عليك .. وهو لازم يهنيك ويبين الفرح بالحد اللي يحسسك انه معك ويؤدي الحق اللي عليه..( في الاسلام نحن لا نحزن فنيأس ولا نفرح فنشطط) جملته اعجبتني كثير .. ثم قال هذا حالنا نفرح بالعيد ولكن لابد نفتكر اخواننا اللي يعانوا في العراق والدول الاسلامية الاخرى ..

على آخر الخطبة بدات مااستوعب شي .. قمت ادق على صحباتي .. يارب الخط مو مشغول بس .. دقيت على وحدة الا هي في الطايف ... وهنيتها وسالتها متى ترجع عشان نتزاور ..والثانية دقيت عليها سالتني انتي فين .. قلت انا لساني ماخرجت من المصلى .. قالت وانا كمان .. واتفقنا نتقابل بس مني عارفة كيف القاها لاننا متغطيات .. قلت اوقفي عند عمود الانارة .. وبعد الخطبة لقيتها هناك ...

كيف عرفتنيني وانا متغطية .. قلت اعرف طولك وهيئتك ..
ورجعنا للبيت مشي بعد مالفينا الحي ورجعنا من طريق ثاني .. وهرجنا نص ساعة في الطريق .. رغم البيت بس خمس دقايق من المصلى
ماشاء الله عليها احبها هدي الادمية .. هي درست بعد الثانوية في معهد علوم قراني وبعدها دخلت كلية المعلمات قسم رياضيات .. حكتني عن كم شيخ درسوها وانا اسمع لهم صدمتني عنهم .. تقول الشيخ موسى الشريف او محمد موسى الشريف المشهور ماذكر اسمه بالضبط واللي يعطي محاضرات في القنوات .. تقول انه كابتن طيار ! لمن سألوه قال ان اللي يهتم بكلام الله ربي يفتح عليه ابواب الدنيا والرزق ! ( بالفعل هو مختص بعلوم القران والقراءات السبع واشياء زيها وربي فاتح عليه من خيره ! ) يارب وفقني احفظ واهتم بكتابك ..
وحكتني عن الشيخ علي العمري اللي في الفترة الماضية ظهر في الاعلام ومعروف باسلوبه الرائع ماشاء الله .. وهو درس اخويا الثاني اللي توظف دي السنة ... يقول الدين يسر لا تشددو على الناس الا في الواجبات والفروض .. اللي عايش وشايف حوله جو الملتزمين ممكن يفهم الوضع ..

المهم رجعت البيت وماخدت مفاتيحي للاسف ودقيت الجرس .. فتح لي اخويا الصغير .. فين رحتي .. نروح مع بعض وترجعي متاخرة ؟ ههههه
قلت له كنت مع صحبتي .. ودخلت اتجهز .. شوية مكياج عشان طالعين لخالتي الكبيرة في مكة زي العادة كل سنة تفطر العائلة عندها .. واخدت شنطتي الكبيرة شلت شوكولاته اعيد عليهم بها ومكياجي ( مرة في السنة نستخدمها وخلاص) .. واهم شي كمرتي ...

قولوا ليش شلت الكميرا؟؟

خطأ اللي يقول أصور الاهل .. ماش اصور حريم انا .. بس اطفال ومناظر (اخاف تنسحب من الكمبيوتر لان عندي وندوز .. لو ماكنتوش ممكن )
.. لكن السبب الرئيسي اني اخدت لكميرا عشان أصور موكب الملك اللي كل سنة نلقاه في طريق مكة - جدة ، شي روعة ..
شوية جات امي تعايدني ( كل سنة وانتي طيبة ماما ) وادتني علبة فيريرو روشيه .. الله !!! اموت انا في الشوكولاته احلى عيدية ..

ورحت سلمت على اخويا الصغير ( دوبي افتكرت ماهنيتهم بالعيد ) وسلمت على اخواتي .. وعلى ابويا اللي كنت زعلانة امس معاه بحكاية رز ولحم بالحمص .. بس قلنا انسي اليوم عيد

ورحت اسلم على اخويا اللي بعدي .. مررة احبه بس علاقته معانا بعد ماانسحر مدري صايرة كيف قليلة ، وكمان شغله مبعده عنا ما ينشاف الا يوم الجمعة .. الله يرفع عنا وعنه .. لمن سلمت عليه فرح كثير وانا برضو .. كاني شفت تحسن بعدما رقيت له ..

المهم يالله في سيارتين نبغى نطلع .. مو في الجيب زي العادة

ركبت في سيارة اخويا الله يبارك له فيها .. وجهزت الكميرا ... ومشينا

في الطريق اخويا الصغير : ايش رايك اصور بجوالي؟ اقولك روح .. تصوير الجوال مو حلو الكميرا احسن .. ولا اقول صور وانا اصور ونشوف ..
شغلت جنبي الجوال ينشد اناشيد العيد حقت المجد والا شفنا الطريق اللي جنبنا فضي ... يا سلام موكب الملك حيمر دحين .. جات سيارة شرطة .. وضغطت زر التصوير .. والا شوية نشوف السيارات اللي تسبق الموكب .. وبعدها سيارت كتيرة فخمة بالتظليل عشان تضلل عن السيارة المهمة .. و سيارة مطافي ومروحية من فوقنا ..حركتتات.. وبعد الموكب كانت سيارات شرطة كثيرة ثم فضي الطريق مرة تانية ..
وقفت الكميرا وجلست اتفرج على المقطع .. والا مااشوف الا موكب ثاني يمر ! يووو من هدول .. شكلهم امراء.. مايمديني اصورهم كمان ..
قال اخويا .. يمكن كمان الامراء اللي من برا وجو زيارة للمملكة..
خمسة دقايق الا سيارات شرطة وموكب ثالث !! ... خسارة ليتني كنت مشغله الكميرا ... يالله المهم نلحق على الفطور ..


شوية الا موكب رابع وشرطة !
ياهوو ايش صاير .؟؟ اليوم مواكب عالمية ؟!


المهم قربنا من مكة وحدود الحرم ... وشايفة السيارات في محطات الشارع الثاني محبوسة حتى تروح المواكب ..
جينا نبغى ناخذ الكوبري ( الجسر) اللي يودينا الحي في اليسار الا لقيناه مقفل ! طبعا عشان الموكب !
فطولنا الطريق لين وصلنا دوار الجرة وكانت الدنيا زحمة لانهم مقفلين الطريق للمواكب .. بس الدورية مشت السيارات حتى تقدرنا نلف .. وطبعا وصلنا الحمد لله بالسلامة وفطرنا مع اهلنا حبايبنا
هذا اول يوم انتهى


بالنسبة للمعايدة انا زعلانة لان كل الرسايل اللي رسلتها ما وصلت لاحد .. الله يخلف علينا بدل الاتصالات الخربانة .. خدمات مو كويسة يوم العيد ..

ثاني يوم في العيد كان الاتفاق في استراحة اولاد خالي الله يرحمه ..في الليل بعد ما يجتمعوا عندنا .. والطريق من مكة لجدة طويل .. والعشا عندهم .. فيه زيارات كالمعتاد عندنا بعدها رحنا الاستراحة ... اكثر شي قهرني واستفزني .. صوت الشباب وهم يلعبوا الطايرة .. ماشاء الله يابختهم .. انا احب الحماس دا وكنت قاعدة مع زوجة ولد خالي .. ( بيني وبينكم ماحب كل حكاوي الحريم احب الحماس واللعب ) المهم مع كل صيحة اسمعها من جهتهم افز ابغـــى العـــــب !!.. كان بيننا وبينهم جدار .. قلت لو انهم يلعبوا معانا والجدار بدل الشبكة حاكون مبسوطة على الاخر !! مو مشكلة كلهم فريق وانا لحالي اهم شي انبسط زي زمان .. لكن الكشف ممنوع ..

بعدها جت بنت خالي وهي كبيرة ومتزوجة جابت الوان رسم وجيه .. يالله مين يبغى .. الوجه بعشرة !! (مزح طبعا) وقعدوا (البزورة) بالدور وكل ماخلص واحد صورته واشكالهم تفطس هههههه ليت اقدر اوريكم اياها

دي اهم الاحداث فيما سبق ولسه ماخلص عيدنا لو صار جديد مثير قلت لكم

آسفة على الاطالة .. لكن حتى ما اعيد نفس الكلام لصحباتي .. هم يقرؤوا الموضوع ^^


شكرا لصاحب الموضوع .. موضوعك جدا كووول وحلو الواحد يعبر عن فرحته