السلام عليكم ورحمة الله وبركاته

موضوع قيم أشكرك أخي على كتابته

أود أن أضع تجربتي المتواضعة في إختيار التخصص لعلها تفيدكم

في آخر سنة لي فالثانوية اكتشفت انه عندي موهبة في تصميم الأزياء

فكنت وايد متعلقة في فكرة إني أتخصص في دراسة تصميم الأزياء

...ولكن

لاتوجد جامعة في منطقتنا يوجد فيها هذا التخصص

فقررت إني أأجل دراسة تصميم الأزياء إلى إشعار آخر

هممممم ... كنت ساعتها محتااااااارة شو أختار من التخصصات شفت إنه مايعيبني شي إلا اللغة الإنجليزية .... بس قلت لغة عادي أقدر أتعلمها حتى فمعاهدة يعني أحسن لو أتخصص شي ما أقدر أحصلة خارج الجامعة

هممممم .... بعد تفكير وتمحيص للتخصصات قلت أنا أحب الرسم وهندسة معمارية فيها رسم وتتطلب
درجة معينة في امتحان اللغة الإنجليزية والحمدالله يبتها

بس المشكلة الكبييييييييرة إنه فالهندسة لازم أدرس مواد علمية مثل ماتعرفون وأنا بنت أدبي يعني متخرجة من الثانوية قسم أدبي فماينفع

وين وين يافلانة وين ممكن تحصلين شي يناسب قدراتج وفنفس الوقت تحبينه ؟؟

مثل ماتعرفون الواحد حتى لو كان يحب الشي بشكل كبير بس ما يغامر فيه وهو يعرف إنه مايقدر عليه

فأنا أحب الهندسة المعمارية ويعجبني شغلهم وااااااااايد لين الحين بس قدراتي ماتسمح

..... طبعاً كان كل هذا وأنا فالتأسيسي السنة الأولى فالجامعة

لين السنة الثانية كنت مش محددة التخصص

الواحد لازم مايتسرع فاختيار التخصص ويتأنى يستشير ويستخير عشان مايندم عقب

انزين ... بعدين قلت خلاص لازم أحدد التخصص بس مايعيبني شي غير الإنجليزي

وقسم الإنجليزي يدرسون فيه

أدب إنجليزي
لغويات عامة
Tesol
وترجمة
......

أول شي الأدب كان يعيبني بس يوم خذت مدخل من مداخل الكلية كنا ندرس فيه رواية قديمة جداً فكانت
اللغة صعبة فيوم يطلب من الأستاذ إنا نكتب تقرير أو نحلل المادة كنت أعااااااااااااني لدرجة إني أصيح
بس الحمدالله عديت . المهم من ذلك المساق كرهت الأدب قلت هو كله عن العصور القديمة فأكيد بيكون مثله ... والشي الثاني اللي كرهني فيه هو إنه القصص تحتوي على أشياء تخالف العقيدة

ما أريد أكرهكم فيه يمكن أنا ما أنفع فيه بس غيري ينفع

المهم ماشي عيبني أكثر من الترجمة بس كنت مترددة وااااايد قبل ما أدخلها

ماكنت أعرف عنها أي شي

نصيحة قبل ماتختارون التخصص إسئلوا عنه شو اللي بتدرسونه ووين ممكن تشتغلون عقب

المهم خذت الخطة الدراسية وتفحصتها زين

وشفت المساقات حلوه راقتلي

قلت يالله ... بستخير بعدين بروح أقدم طلب التخصص والحمدالله الله سهل

على فكرة ماكنت واايد منجذبة للترجمة بس يوم شفت إنه الأمور تيسرت قلت الله أعلم باللي أصلح لي وتوكلت على الله والحمدالله الحين أدرس هذا التخصص وبعد كل مساق أحبه أكثر وأكثر وشفت فعلاً إنه هو الأنسب لقدراتي إن شاء الله أتخرج بامتياااز وأبيض الويه

واللي يشجعني يوم أواجه صعوبات هو هدفي الأساسي

وهو تصحيح صورة الإسلام في العالم وأبدأ من نفسي

بصراحة تحديد الهدف يجعل الأمور واضحة أمامك وبعدين يخليكم تنسون التعب والصعوبات اللي تواجهونها

هممممم .. على فكرة تصميم الأزياء بعده فبالي أحاول أنمي قدراتي فيه وإن شاء الله أحصل فرصة أدرسه

سامحوني طولت عليكم وبعد لأني كتبت بالعامي


الله يوفق الجميع

وفي حال اتذكرت شي يمكن ينفعكم بضيفه

إختكم فالله
لمسات التلي