::*(أكتب مواصفات معلميك)*::

[sosetta]

الموضوع حلو وينفع نلعب شويه فيه
مشكور اخوي ادوجاوا وهذه مواصفات مدرساتي
معلمة الرياضيات:
طيوبه وحبوبه ومتفهمه لكن مشكلتها تتكلم بسرعه بس بعد ما رحنا الادارة وشكينا عليها صارت أبطأ شويه لكن لسه سريعه

معلمة الكيمياء:
صوتها وااااااااااااطي رغم انها تبذل كل جهدها من ناحية الصوت لكنه واطي
ونظراتها تخوف واذا ما شاركت معها تنظر فيك نظره معناها "ما تبغي تشاركي هاه؟طيب أنا أوريكي في الدرجات"
وتشيل في قلبها على أي حركة لكن اذا شاركت معها تنسى كل اللي فات

معلمة الأحياء:
الأخت عايشة بأمريكا طول عمرها وجايتنا وهرجها مكسر وما ترضى تشرح لنا شيء
تجلس طول الحصه تدور بين الطاولات ولازم غصبا عنك تجاوبي على أسئلتي
يعني هي تبغانا احنا نشرح الدرس وبالنسبه للواجبات ما في زيها ما تعطينا واجب أبدا

معلمة الفيزياء:
هذه مخلوق آخر انسانة طيبة بشكل مو طبيعي ما تتعب نفسها في التهزيء
وتشرح درسها وكله كتابة عالسبوره لدرجة انا وصحبتي نجلس نتكلم طول الحصه وهي ما تدري عننا
لا ومره كنا نتكلم بالحصه وهي مي عارفه من فين الصوت احنا نتكلم ونضحك وهي جالسه توقف البنات وتسكتهم بلأخير رمت الطبشورة وقالت :يا بنات الصوت هذا من فين جاي؟

معلمة العربي:
هاااااااااااااااديه تحفظ نص الكتاب وتجي تلقيه عندنا

معلمة التوحيد:
طيووووووووووووووبه وحبوووووووووووووبه بشكل مو طبيعي
طول الحصه وهي تقول: طيب يا حبيباتي..... خلاص يا بطلاتي .....زين يا حلوات....
والابتسامة ما تفارق وجهها ابدا وتعاملنا كأطفال
معلمة الحديث:
طيووووووووووبه هي كمان لكن مو زي معلمة التوحيد وهي تعاملنا على اساس اننا كبار
معلمة الفقه:
لله في الله ما اطيقها
طول الوقت تسخر من اجوبتنا مهما سوينا تجلس تضحك وتتريق وتروح ترجع تعيد نفس الاجابه اللي قلناها انسانه غريبه والله

[Aboora Chan]

موضوع حلوو

والردود روووعه خخخخ تضحك

الله يعطييك العافيه اخووي على الموضووع

وانا ببدا

بسم الله


مدرسهـ القرآآن
..مسكينه تعبت من كثر ما تقول احفظوا بالبيت بس حبووبه وطيييبه وماا عمري شفتها معصبه ماشاء الله ..


مدرساات الدين
3 مدرسات
1- تهبببببل ماشاء الله مررهـ حبووبه ومااتعصب ابد بااارده وأخلاااق ماشاء الله
2- مرررره حبووبهـ وتهبببل
3- هذي المدرسه تعجبني لهجتها مرره واواات اضحك على طرييقتها بس مررررره حبووبه وتحبني مرره بس مسكيينه تتعب نفسها وهي تسكنا
باختصاار كلهم يهبلووون ماشاء الله


مدرسهـ التآآريخ
حبووووبهـ وتهبببل وطريقه شرحها حلوه تفهمك الدرس غصب يعني ما يحتااج تشيلين هم الدرس وشييييك ماشاء الله دوووم مرتبه


مدرسهـ الجغرآآفيآ
حبووووووبهـ وتهبببل ماشاء الله تحترم الطاالبه واذا ما عرفت البنت تجااوب تحاول تقربلها تقول لازم تعرفين ما تقووم غيرها .. تعجبني طريقه شرحها ماشاء الله تفهمك غصب


مدرسهـ العربي
حبووبهـ بعد بس حصصها غالبا في الشرح يجيني النووم لكن في الحل نتنشط


مدرسهـ الانجليزي
مااااعمري شفت مدرسه مثلهاا مااافي أحد يحبها تحب تهااوش وتسوي انها شخصييه بس في الشرح ابد مااانفهم >< اكره حصصها واتمنى انها تغييب مااعمري كرهت مخلووق مثل كرهي لها استغفر الله .. وأخذت مني حسناااات من كثر ما اتكلم فيها استغفر الله


مدرسهـ المكتبه
الى الان مااعندنا ^^


مدرسهـ الحاسب
الى الان ماعندناا ^.^


وبس
مدرسااتنا كلهم يهبلوون باستثنااء الانجليزي اتمنى انها تنقل


في أمان الله

[romeu]

السلام عليكم ورحمة الله و بركاته

و الله هذا الموضوع رهييييب ... واشكر العامل على هذا الموضوع :cupidarrow:

انا الان في الجامعة ( و لله الحمد ) لكن طحت في دكاتره اخس من المدرسين
المهم ....


خلاصة الكلام :

ما قد مر علي مدرس الا و طلعت في راسه شعر الشيب و هو في ريعان شبابه ::hm::

لكن انا مرت علي تجربه و ابغى من كل الي ردو يحطون نفسهم في هذا الموقف

كيف تحس نفسك لو درسك الوالد أو الوالدة ؟:rolleyes3:

هاهاهاهاهاهاها سؤال صعب .. صعب سؤال .. سؤال يراودني هاهاي :laugh8kb:

وكل عام و أنتم بخير بمناسبة عيد الفطر السعيد

[Vulgar Display]

خخخخ موضوع يعيد لي ذكريات المدرسه ..

انا الي اذكرهم وايد.. باختصار
-

مدرس الانجليزي: معقد

مدرس الرياضيات: مسكين والله

مدرس الكيمياء: شايف نفسه لأنه دكتور, و عنده مجله ب لندن

مدرس الاحياء: عادي و طبيعي, مافيه شي غريب

مدرس الفيزياء: ههههههه ضعيف الشخصيه , يتهزأ من المدرسين و الطلاب

مدرس الاقتصاد و التجاره و المحاسبه: كوماندو !!! الاخ نافخ جسمه كأنه داخل معسكر قوات خاصه.

مدرس اللغه العربيه: شاعر, لكن يخورها بعض المرات...

مدرس الاسلاميه: ابو لهب .. لا تعليق

مدرس اللغه الفرنسيه: دلوع و يدلع طلابه .. صج ما يستحي لووووووووول

المعلمين الي كانوا في مدرستي اكرههم !!
يا زين تاجر الشنطه (المدرس الخصوصي) هههه

[عاشق_كونان]

السلام عليكم


شكرا ً لك اخوي على الموضوع الرهيب :cool21:
فكره جباره ..
وراح تطلع فضايحنا .. :mad2:

على بركه الله :evil:

-------------------------------------------

أستاذ اللغه العربيه ( كـويتي )

همم .. أستاذ هادئ .. كشخه .. عطره يوصل للأداره msn-wink
طيب حبوب .. ما يرسب أحد ..


أستاذ اللغه الأنجليزيه ( مصــرااوي )

عصبي .. اذا احد غلط بالحل يقلب الدنيا عليه -_-
ما يسامح ::no:L
يحبني .. بس هم ما يبي أحد يغلط بحل الواجبات
دمه خفيف msn-wink .. مرات يخورها

أستاذ الأجتماعيات ( كــويتي )

الأستاذ هذا درسني 3 سنوات .. شنو أقول عنه ؟!
أحطه فوق راسي :yes4lo:
محترم .. طيب .. خلوق .. ما يرسب أحد
قليله الواجبات .. ما يكتب كثير
شرحه ممتاز :wub2:


أستاذ العلوم ( مصري )

الأستاذ هذا .. ما شاء الله
صح انه كبيربالعمر :O_o3:
لكن محترم .. يوصل لك المعلومه .. شرحه ممتاز
ما يحب يضيع الحصه بالسوالف
عيبه الوحيد .. كل حصه يملأ الصبوره مرتين أسأله

استاذ الرياضيات ( مصري )

أحترم نفسك وخل دفترك كامل تنجح !!
هذا نضامه .. محترم ما شاء الله عليه .. في ناس ما يعرفون شيء بالرياضيات
بس دفترهم كامل .. ومحترمين بالحصه .. كاهو ينجحهم
دمه خفيف لأبعد الحدود :showoff:
يفصل علينا بالحصه وينكت


أستاذ الألعاب ( كويتي )

مليييييييييييييق !! ممل !! يقهر !!
يقط علينا الكره ويدخل المكتب
ما أحبهـ -_- .. شايف نفسه :worried2:

أستاذ الديكور ( مصري )

نياهاهاهاها ::hm::::hm::::hm::
حصته ما تتفوت !!
دمه خفيف .. يضحك .. صج الأستاذ هذا حالهـ ثانيه :showoff:
لكن عيبه اذا عصب .. يقلب الدنيا علينا :oo7dt:

أستاذ الكهرباء ( سـوووري )

امم .. محترم :yes4lo:
همه الأول والأخير الدرس
لازم نكتب ونحل .. خصته تعور الراس :eek4wd:

أستاذ الرسم ( كويتي )

كويتي .. محترم
يعاملنا كأننا نم أهله .. ما يضرب الا اذا كان غلطان
يخلينا نشتغل ع السيلكون والفلين
فررفووووش .. حصتهـ حلوه

أستاذ الأسـلاميهـ ( كويتي )

:;::;::;:

صح انه شديد ويانا .. ويقهر اذا ضرب !!
طقه مو طبيعي
وكل يوم اسأله وأمتحان قصير :mad2:
بس يبي مصلحتنا ..
لاااااا تعليييييييييييييييييييق !!!! icon-mosidea


شكرا ً مره أخرى ^^

[K A I T A]

ههههـ ,, والله موضوع راائع .. ^-^
ما أقدر أوصف عدل الحين لأن هايبرا " شخصيتي المفضلة " خسرت بالتصويت ..><
بسم الله نبدأ :
.
.
اللغة العربية .. " مصرية "
أمم .. طيبة و حنونة ^^.. تسعى لمصلحتنا ..
لـكن اذا تأخرنا يا وييلنا ..
و كللة تعترف بحبها لنـا ,, و اعترفت لـي مرة ^^"
" لحظة احرااج " و الصراحة محترمة و راائعة ^^
.
.
أمم الEnglish
أتوقع فلسطينية ..
مم .. زينة و طيبة ^^.. لكن مرات ..
اهاا ^^.. ما راح أقول ,, بس تكون زلة لسان ما اعتقد مقصودة ,,
و خووش أبلة .. و اتفهم
.
.
ال Math
راااااائعة ^^.. حنونة .. و توووونس
و كانت معلمة أخوي .. بس طلع من مدرستي ^^..
و اهيا نفسها صارت تدرسني لهاللحظة ^^..
أكيد الكل يتسائل شلون اهيا و أخوها بمدرسة وحدة ؟@@
مدرسة فيها جهة بنات و جهة أولاد ..
نرجع للرياضيات المعلمة تسعى لـمصلحتنا و أحبها ..

أمم ,, الألعاب ...>_<... PE
معلمتي الألعاب الحمدلله طيبة و حنونة ^^..
و كلة تلعبنا " سلة "
بس .. افتقدت معلمتي في العام الماضي ..
توفت في حادث مروري >_< الله يرحمها .. آميييين ,,
و نفس الشي حصل مع معلمة الرياضيات و السنين القديمة ..
كنت بخامس " أولى متوسط " الله يرحمها توفت بالمرض الخبيث ..!! أسأل الله السلامة ,,
الله يرحم كل موتى المسلمييين آآمييييين ..

و الرسم ..
لا تعليييييق><

و ال science
الحمدلله زيينة ^^..
و تفهم .. بس الدرس ما يساااعد >< ..
" الذرة " << ههه .. شندرس فييه ؟! بروحه ما ينشاف ^^"
الحمدلله على كل حال

الDrama " كويتية " و من أهلي بعد ^^..
راااائعة ^^..
و درسها ممتع

أممم ..
الاسلامية ..
همم .. عادة الحصة تكون مملة .. و لكن المعلمة " زينة "

القرآن .. ( سعودية .. )
مـا شاء الله عليها .. رائعة ^^..
أحترمها ,, و أحبها

التوحيد .. ( فلسطينية )
دمها خفيييييييف ..
و رااائعة .. بس ...

الكمبيوتر ..
مم .. حصة عادية و المعلمة زينة ..
و أحب الحصة عشان بالFree Time
أشبك في المنتدى ^^..

بالنسبة للضرب ..
فـما عندنا ^^
..
ألف شكر عالموضوع الراائع ..
.
.
kaito san

[عاشق_كونان]

" الذرة " << ههه .. شندرس فييه ؟! بروحه ما ينشاف ^^"
الحمدلله على كل حال

هههههههه
خوش تعليق
بس اخوي كونان اديجاوا ^^ "
ما تلاحظ مدرسينك دايما ً يطقون " يضربون " !!
ما تشتكي عليهم -_-

[korapika]

بسم الله الرحمن الرحيم
الف شكر علي الموضوع الخطيرر
نبدا :
مدرس اللغة العربية
مايدري عن شي ويخلي الطلاب يطلعون برع ويردون علي كيفيهم
مدرس التاريخ
طيب وكشخة وحصتة كلة سوالف وغشمرة والجميل فية ان مايرسب الطلاب
مدرس الجغرافيا
ايضا طيب وحبوب وسوالف وغشمرة وضحك في الحصة <<<<< شيطان كلة يسولف في الحصة خخخخخخخ
مدرس الرياضيات
عصبي لدرجة الضرب بالخيزارنة لكن ولامرة جرب يضرني <<<<< خخخخخ شايفني هادي ومزيون ومستانس منة
مدرس الفلسفة
حصتة كلة رقاد نص الصف لافين الغترة علي وجوهم وقاطين راسهم في الطاولة <<<< غرفة نوم مو مدرسة خخخخخخ
يعطيك الف عافية علي الموضوع المهضوم خخخخ
><

[Th€ bè$t]

السلاام عليكم

ما شاءالله الاكثرية ذم

شكرا لك أخي ع السؤال

بالنسبة لي :

معلمة العرب : معلمة ممتازة جدا ، لها الشكر الجزيل ،،

معلمة الريض : معلمة محترمة جدا وطيبة ، تتعب كثيرا ولكن تواجه صعوبة في ايصال المعلومة للطلبة بالشكل المناسب.

> ولذلك البديل عنها استاذ الريض : مدرس مميز جدا وشرحه رائعه ومحترم .

معلمة الأجا : طيبة جدا ، حتى ولو أن شرحها يكاد يكون قراءة للدرس ، ومع ذلك تسعى لرفع مستوى الطالبات قدر المستطاع

معلمة [ السفر " أعمال وكالات السفريات " ، المحا " محاسبة - accounting " ، ادر " ict busniess " ] : معلمة ممتازة جدا وماعليها كلام ، ومستوى الطالبات معاها رائع جدا

معلمة الادر "introduction to office management " : طيبة ، بس ماتعرف تشرح عدل ، ومع الاسف تكرهني بلا سبب !!

معلمة الدين : انسانه طيبه وشرحها ممتاز جدا

معلمة اللغه الانجليزية : انسانه شريرة ، تحتقر الطالبات وبشدة ، حتى انها ترمي الاهانات في وجوه بعض الطالبات ذوي الاحتياجات الخاصة ، وماتعرف تشرح ، وتفضل ،، الله يسامحها بس

اما للمواد الاثرائية >>
سيق " المرور والسياقه - نظري " : الحصه لايتم شرح فيها ، مجرد سوالف ولعب وضحك وهيك ولذلك المعلمه محبوبه >> دام ماكو درس الكل يحبها

زرع " زراعه " : المعلمة طيبه بس عصبيه شوي ، في حصتها تكرفنا شوي ، بس تعودنا وصار الامر ممتع وياها >> دائما تخلينا نسقي الزرع ونحمصل اصيصات وهيك

واخيرا مركز الابداع :
" اضاءات ايمانية " : المشرفة عليه مدرسه تربيه اسلاميه ، طيبه جدا ، كانت تعطينا محاضرات عن الصلاه ، وشهر رمضان و و ، كانت طيبة .

الجيد في الأمر ، ان جميع مدرساتي من البحرين ، ولا احد من برا ، لأننا نعاني مشكله في فهم كلام البعض من الدول الأخرى

طبعا هذا بالنسبه للفصل السابق ؛؛

غدا بدايه الفصل الجديد ،، سأكتب التفاصيل بعد اسبوع > بعدما اتعرف على المعلمات الجدد

تحياتي ..

[Miss.Holmes]

تسلم اخويه ع الطرح ^^

أستاذة التدبير:طيبه مب عصبيه حتى هي نعتبر حصتها حصة فراغ:laugh2:

جي اتش .. تدرين ألغوها من كمن سنة عنا هالحصة >< ,,

حتى الفنيه ألغوها عنا ^^

====================

انا بقول الأبلات المشهورات فـ المدرسة ...

ابله الجغرافيا : أنا أنا .. تتكلم طول الوقت عن عمرها ^^" .. وحرام بس يعني وايد اجذب ! ..

ابله العربي : تتكلم مثل حليمه بولند >< استغفر الله .. نحنه نص الحصة نضحك ع كلامها ..

ابله الإنجليزي : مقربه جدا جدا مني .. مثل اختي الكبيرة .. بس هذا وايد مأثر عليها وعليه >< برع الحصة يعني -_-"

ابله الدين : طيييييبه فديتها والله .. سوالف و وااااااايد تطنز ..

ابله المكتبة .. عاديه ><

وفيـه ابلات مصلحجيات ويحطن للبنات الدرجات بالقلب هب بالمجهود >< ,,

ابله الرياضه .. رعببببب ! .. والله تخوف ,, عشان كله تفتيش ,, بس ما عليه نحبها

ابله الحاسوب .. تقربلي .. يعني طيبه ^^..

المديرة : ما نشوفها وايد ,.,

الوكيله : سواااالف ..

الأخصائية : حق الرحلااات .. تماااام سيروا عندها لو تبون .. بس ذل والله -_-"

يالله موافجين خير ^^

[سـراب]

موضوع روعة

كونان إيديجاوا .. الضرب اتذكره في ايام المتوسطة بس .. الله يعينك

........

مدرس اللغة العربية ,, درسونا ثنين واحد **** والثاني
الأول --> وصخ نظاراته للأولاد وصخه .. حقير .. ويُشاع انه يفعل الفاحشة بـ طلاب المدرسة ,, ربما يكون الكلام خطأ ولكن نظاراته للطلاب تثبت صحت الإشاعات .. الطريقة المثالية للتعامل معاه .. هو ان تنظر له بنظرات وصخه كما يفعل هو وتصارخ عليه وتعامله على انه اجنبي مو على انه مدرس .

الثاني --> لا شرح ولا يفهّم ومدرس هاامل .. ودائماً دائماً يتهاوش مع إدارة التعليم وإدارة المدرسة .. والوكيل يقول لنا "هذا المدرس له سوابق"
لكنه فـلـه يعطينا الـ20 درجة بدون مشاركات ولا إختبارات

مدرس الـE --->
الي يشوفه يقول انه حق مخدرات .. حشيش .. عصابات ,, مجرم هالمدرس .. لكن .. ما يرسب اي واحد من قبيلته -وانا من قبيلته -

مدرس الرياضيات --->
يعني شرح شوي تفهم منه .. لكن الـ20 تحطها في جيبك ,, اما الثلاثين -الإختبار النهائي- فـ العوض على الله

مدرس الفقه --->
مدرس يُلقب بـ "زنديق" استغفرالله .. هذا المدرس درس ثلاث اجيال متتالية درس خوالي الكباار .. خالي يقول انه هم الي سموه بـ زنديق .. لانه كان دايم يتكلم عن الزنادقه ؛؛ مدرس **** واكرهة لكن شرحه جميل

مدرس التوحيد --->
مدرس يشتغل بـ 4 وظايف غير التدريس .. ما ادري كيف جات هذي
مدرس صوته ضعيف .. والآن يحضر للماجيستير

مدرس الحديث والقرآن --->
مدرس مخرف كبير في السن .. ياما وياما اقرا عنده في القرآن لكن الأن حاط لي في الشهادة 31 من 50 .. والله خرف هالمدرس

مدرس الكيمياء --->
مدرس يشرح لنفسه فقط .. حتى الممتازين والمتفوقين ما يفهمون عليه .. عانيت معه معاناة شديدة .. الله لا يوفقه .. اكرهة هو ووجهة

مدرس الفيزياء --->
مدرس شرحه تمااام التمااام .. لكني اكرهة

مدرس الأحياء --->
اطيب إنسان على وجه الأرض .. طيب ورهيب وشرحه تمام .. الله يوفقه في دنيته وآخرته

مدرس التاريخ والوطنية --->
مدرس مثقف جداً جداً جداً .. وإذا قال شيء غصب تقتنع منه حتى لو هذا الشيء كفري .. لكن عيبه انه بدوي ,, لو انه ماهو بدوي كان وصل فووق فووق
الله يوفقه ويجزاه الف خير

مدرس الجغرافياء --->
مدرس فله يحب الله حب ماهو طبيعي .. لو انه كان في زمن الرسول كان صار من كبار الصحابة .. ما تتصورون قد ايش يحب الله
ويحب السعودية .. يتكلم عن قوة السعودية ويخليها امريكا بقوتها ,, ويتكلم عن المنتخب كأنه البرازيل ,,, مجنوون هالإنسان
لكني اكرهة


,,,,

انتهيت من الوصف الرائع للمدرسين الـ****

شكراً لصاحب الموضوع

[XconnanX]

الحمد لله

انا ما عندي استاذ اشتكي منه الا واحد

هو استاذ العلوم <<<< وععععععععـ

استاذ العلوم <<<< والله ما يستحق وصف الاستاذ

انا باوصفه وصف مختصر .. :

... فيه حبتين خال <<

وحده بين الجبهتين والثانيه كبيره في خده الايسر

ونحييييييييييف <<<< ما شفت انحف منه ...

ويبي يقلد الاساتذه الباقيين بس مو عاارف

وكمان مسوي نفسه مثقف <<< !!!!

والشرح يقف 10 دقايق بس يتكلم ويجلس الين اخر الحصه ..!

والاختبارات يجيبها كلها اختياري <<< بس مي سهله !! ما تدري كيف مطلعها من الكتاب

وما يضرب ...

لاكني اكرهه ...

[اكاي شوتشي]

معلم الجغرافيا والتاريخ: يحب ان يظرب الطلاب كل يوم يجي يقول وين الواجب
معلم القرآن : طيب لكنه يحب ان يضرب الفصل وانا اكرهه
معلم الحديث : طيب ولكنه يحب الاستهزاء بـ الطلاب لكني احبه
معلم القواعد : طيب لا يفعل شيء إلا النوم :>
معلم الانجليزي فقط يعطي الواجبات ولا يفتش عنها

وجميع المعلمين متخلفين


وشكراً اخي على الموضوع

[دم قتل رعب=ذل]

..

بصراحة الردود أغرقتني في دوامة من الضحك ^ ^

أما عن معلماتي ..

معلمتا الدين :

الـأولى ..

ملتزمة ماشاء الله عليها ودايماً تذكرنا بالسنن و و و ودمها خفيف مــــرة والله في حصتها أمووووت من الضحك...
....
لكنها تفهم غلط .. مثلاً بنت سرحانة وتعاينها .. يعني البنت في عالم ثاااني الأستاذة تحسبها معجبة فيها وتقوم تنصحها عن الإعجاب وتسوي لها حــوسة .. أما إذا كانت بنت معجبة صدق -وهي أصلاً ماتفرق ولاتدري من الأصل- تناديها على جنب <<مثل الأولة بس ردة الفعل غير ترجع البنت وهي غــافلة صياح هههههه أستغفر الله .

الثـانــية ..

مثقفة و توقف البنات عند حدهم ...ماتستحي في الشرح عن أي درس... أما البنات اللي قليلات أدب .. يسألونها عن أشياء مالها داعي وهي تحسبهم صدق موفاهمين !
وإذا طلعت نص الفصل يضحكون .. سخافة مالقوا إلاذا السوالف ..

معلمة اللغة الإنجليزية :

طفوليـة وبريئة لآخــــــــر حد دايماً حركاتها مثل اللي في الأنمي ^ ^

ما أعرف أوصفها صراحة لكن البنات الله لا يبلانا دايماً أشوف حرف N على الطاولات وعلى يدينهم .. - بس اللي معجبات فيها وياكثرهن ..- أنا أحبها وهي تحبني مررة بس مو إعجاب
موب يعني أقعد أعاينها وأقلدها وأكتب حرفها ... هذي أحسها غابة في السخافة ...

معلمة التاريخ:

تحفظ الكتاب وتجي تلقيه علينا نصاً !

لكن بعض الأحيان تزيد في الأحداث من راسها مثلاً المعتصم بالله يوم المرأة اللي قالت : وامعتصماه تقول إنه قتل من كان سبب في قهر المرأة مع إنه بس فتح عمورية ماقتل الرجال اللي اعتدى عليها !

خخخخخ

تمطر علينا درجات << خرافية كذب يعني بس تقول اللي بتجاوب على هذا السؤال بعطيها 5 درجات و البنات ماتبقى وحدة إلا رافعة يدها أما أنا وخوياتي قدنا خابصينها ههههه من ذاك السؤال المحرج آآخ ههههههههه .........
المهم إنها أستاذة محترمة وطيبة .

أستاذة العلوم :

عصبية.. لا حازمة يعني وقت الجد تصير وحش ^^

وبعدين عادية ^^

أنا وخوياتي دايم مانجي المعمل إلا متأخرين عشان تطلعنا برا ^ ^

ذلحين أقدر أسمع صوتها وهي تقول : برااااااا هههههههه
لكن في النهاية معاد صارت تطلعنا من يشارك معها غيرنا أنا وخوياتي وأشواق وسوير بس ..

يعني هي بحاجتنا خخخخخ لكنها تبقى في النهاية طينتها طيبة مهيب خبيثة مثل بعض المدرسات.........!

نسيت أقول إنها دايماً تهرّج يعني بس تبي تضحكنا مع إنها مايناسبها الدم الخفيف ..
هي إذا كانت قاصدةانها تضحكنا يصير مايضحك أبداً .. أما إذا كانت عفوية تجي حلوة منها ^^


لي رجعة ...

شكراً على الموضوع المُضحك .

: )

[N E J I]

في الحقيقة موضوع شد انتباهي وحلووو كثيررر ..

اول شي اقول المدرسين لا اعرف عنهم الكثير .. لاني جديد على المدرسة ..

والسبب الثاني النووووم ...

غريبة احنا ماعندنا ضرب والشي الي مطير عقلي معقوله بنات عندهم رياضة !!

نبدا بسم الله ,,

مدرس النحو و المطالعة : خلوق ومحترم ويعصب اذا ما احد جاوب وكثير الصمت وغااامض ^^

مدرس الرياضيات : شاب صغير السن يعامل الطلاب كأنهم اصدقائه وشوي ومتكبر ..

مدرس التوحيد : صوووته يشق طبلة الاذن يعني النوم مستحيلللل .. وسمين ..

مدرس الفقة و التفسير : مطوع و اسمر و لاتعليق

مدرس الحديث : مطوع وكثيررررر الفلسفه ونشيط ..

مدرس المكتبة : سمين كانه والد تشوجي ... في انمي ناروتو ..

مدرس الاحياء : ثوبه قصير وضيق واسمر ولحيه خفيفه ..

مدرس الكيمياء : ما اعرف الا انه ماله شخصية والفصل كانه حرااااج ..

مدرس الفيزياء : شخصية قوية ومطوع ..

مدرس الانجليزي : يشبه عبسي سمين ويلبس ثوب ضيق .. !! وماله شخصية

مدرس الجغرافيا : مايشرح كثير ويعطينا اسالة الاختبارات ^^

مدرس التاريخ والوطنية : يسمونه بابا فرحان ..

مدرس الرياضة : مزاج سيئ ويحب النشاط ..

_________________________

ما ادري اذا فيه احد ماذكرته ؟؟

اشكرك اخوي ع الموضوع الروووعة .. وسلام

[コナン]

موضوع أكثر من رائع والردود مضحكة

____________________________





مدرس القرآن غيب ونظر : شديد وعصبي لكن طيب يحب المتميزين أحبه



مدرس التوحيد : يفهم ويوصل المعلومة إلى المخ بس الدرجات بالعدل

يحب ينكت أحبه



مدرس الفقه والحديث : يحبني علشان أسوي له دروس باور بوينت ويعطيني شوي درجات زيادة أحبه

مدرس الرياضة : يحب ينكت مافي واحد ما يلعب عصبييييييييي ويحب النشاط والتجديد ما أطيقه

مدرس العربي : يحبني لأني ذكي بس يحب يبهدلني قدام الطلاب علشاني ما أجيب الواجبات أول بأول

مدرس التاريخ : يفهم بس المشكلة أنه يجيب معلومات من برا الكتاب أحبه شوي

مدرس العوم : لالا عاد خلاص ما أقدر أنتقد يفهمك غصبن عنك ويحب يستهزئ بالطلاب أحبببه

مدرس الإنجليزي : طيب بس يحب يصرخ على الطلاب ويحبني ونص حصته يستهزئ بالطلاب بس حصته أحلى حصه وأحببببه

مدرس الرياضيات : عصبي في كل شي في الدرجات في الواجبات ويدلع بعض الطلاب ما أطيقه

مدرس الفنية : هادي بس إذا عصب يشبه جين <في كونان > ما في رحمة ما ينقصني أحبه شوي