السلام عليكم ورحمة الله وبركاته
كيف حال الأعضاء المسوميين والمسوميات ^^"
عدت اليكم بموضوع جديد، وهو قصة حدثت معي احببت مشاركتكم اياها بسبب موضوع الغش اللي وضعته أختي الاكليل جزاها الله خيرا
ما حبيت اكتبه عندها كرد متأخر عشان اضمن ان الاعضاء يشوفوه عشان يستفيدوا ^^
وابدأ معكم القصة:
كنت وقتها في الصف الثالث المتوسط وكنت في أحدى الدول العربية الشقيقة
والحمد لله كنت من الطلاب المتفوقيين وفي هذي السنة أخذت الطالب المثالي بعد ولله الحمد
المهم كان علينا امتحان تاريخ
وأكره المواد اللي مرت علي في سنوات الدراسة هي مادتي التاريخ والجغرافيا <<< ما يحب الحفظ الولد ^^"
المهم جاء في السنة هذي قرار ان الاختبارات الشهرية راح تكون اول حصتين، يعني ما بتكون زي الأول كل مادة نختبرها في حصتها
فكان علينا حصة رسم، والحصة هذي كنا بنختبر فيها تاريخ
المهم جاء المدرس وطبعا هو مدرس رسم فما يهتم بالمادة الثانية، وقال: انا واثق فيكم وانتوا رجال واعرف انكم ما بتغشون فلا تخيبون ظني فيكم
وجلس الأخ مشغول بالكراس حقه مادري يرسم ولا ايش
المهم طبعا الشباب فرحوا ما شاء الله وطلعوا كتاب التاريخ وحطوه بالدرج وفتحوه وجلسوا يكتبون الاجابات
حتى الطالب الأول والثاني الله يعين سووا مثلهم (أنا كان ترتيبي الثالث ذاك الوقت)
المهم انا والله ما أقول هذا مدح في نفسي لكن أبغى احكيلكم عبرة ان (من ترك شيئا لله عوضه الله خيرا منه)
المهم انا ما غشيت ذاك اليوم رغم زي ما قلت ان من اكره المواد عندي التاريخ والجغرافيا
وذاك اليوم الله يعين على اللي حط الجدول، اختبار جغرافيا وتاريخ في نفس اليوم
وكنت سهران طول الليل اذاكر لكن والله لو ايش مافيه فايدة، انا بصعوبة اذاكر كل مادة فيهم لحالها، الحين الاثنين مع بعض؟
المهم طبعا كل الناس كانوا جالسين يكتبوووووون ويكتبووووووووون وانا الوحيد اللي جالس اتفرج على الورقة وماني عارف اكتب الا اشياء قليلة، ما قدرت احل صح الا نصف الاختبار وهذي ماهي عادتي، كنت ما اقل عن 7 من 8 في الامتحانات، يوم انزل مرة اجيب 6 من 8
طبعا الحزن كان ظاهر على وجهي، شافني واحد من اصدقائي وعرف اني حزين وماني عارف احل فهمس لي، قول بس ويش تبغى وانا راح اغششك
قلت له لا يابو الشباب الغش حرام وانا ما راح اغش
المهم انتهى الوقت وسلمنا الورق
بعدها بيومين جاء مدرس التاريخ وشافني وانا طالع من الطابور قال اسلام، عسى خير وايش صار؟
الناس كلها جايبة 7 و 7,5 و 8 من ثمانية وانت الوحييييييييد بالفصل اللي جايب 4؟؟؟؟؟!!!!!!!!
مستحيل يكون انت، انت الطالب المثالي وترتيبك الثالث ونعرف عنك الشطارة و... و....
قلت يا استاذ والله انت ما شفت اللي حصل، .....
قال ادري، كل الناس غشت صح
قلت صح
قال انا عارف، وهذا ظهر من اجابات بعض الطلاب، على العموم تعال في وقت الفسحة مرني وراح اسويلك اعادة اختبار لكن شفوي
طبعا اسقط في يدي، اساسا يوم الامتحان ما كنت مذاكر زين الحين يبغاني اتذكر المادة؟
رحت دورت على كتاب وطبعا ما قدرت اذاكر شيئ قبل الفسحة بسبب الحصص
المهم رحت واستعنت بالله
دخلت وبدأ يسألني، السؤال الأول ما عرفت اجاوب، الثاني ما عرفت أجاوب، الثالث .....
أذكر اني جاوبت على سؤال واحد بس صح، يعني اسوأ من المرة اللي راحت
قالي شوف يا اسلام، انا عارف انك شاطر، وانت الوحيد بعد اللي ما غش في الفصل عشان كذة راح اعطيك 7 من 8 زي بقية زملاءك، وانا الحين بروح للفصل وبثبت لهم اني مشيتها لهم بمزاجي واني اعرف انهم غشوا
طبعا ما صدقت نفسي وحمدت الله انه نجاني
وصدق رسول الله صلى الله عليه وسلم، حين قال: (إنك لا تدع شيئاً إتقاء لله تعالى إلا أعطاك الله عز وجل خيراً منه). رواه أحمد والبيهقي وهو حديث صحيح.
جاء المدرس الفصل وقال انا عارف ايش حصل والمهزلة اللي حصلت وجلس يلوم فينا وقال ماشاء الله عليكم
حتى بس عشان تعرفون الفضيحة، يعني حتى ما تعرفون كيف تغشون
قال انا ابغاكم تفتحون الكتاب صفحة كذا، فتحنا الكتاب، قال انا بقرأ من ورقة اجابة واحد من الطلبة اللي غشوا وابغاكم تناظرون بالكتاب، السؤال اذكر ملخص ما تعرفه عن تاريخ .......
الاجابة، تابعوا يا شباب معي من أول السطر في وسط الكتاب، الاجابة في ورقة هذا الطالب مكتوبة كالاتي: سبق ان درسنا الفترة التي مرت بالخلافة ..... والان سنتكلم عن الفترة التي تلي تلك الفترة ^^"
قال حتى يعني ما حاولت تغير؟ في واحد يكتب مقدمة زي هذي بالنص في الاجابة؟
طبعا كان موقف مضحك جدا وكل الطلبة جلسوا يضحكون
والحمد لله الله عوضني في الامتحان النهائي وجبت درجة عالية بعد، عوضت علي وطلعت الترتيب الثاني بعد ^^
وأتمنى انكم تعتبرون من القصة وانها تكون عجبتكم
وانتظر اراءكم وردودكم
دمتم بحفظ الله ورعايته -flowers0" class="inlineimg" />
المفضلات