بسم الله الرحمن الرحيم
بعد الموضوع الأول (سهرة شبابية1) حبيت أبدأ معاكم الجزء التاني في موضوع آخر..

في البداية حابة أقول إن أكتر اتنين حبيت النقاش معاهم -(المدمرة و الامل المشرق)-
مع العلم إن آراء الجميع كانت حلوة وتدل على إننا بنفكر تفكير كبار ومش لسه صغيرين
زي مابيقولوا ..



-[ عفوا .. احنا مش متوفرين حاليا ! ]-

بعد إذنك .. إنت مثقف؟
ياترى اتهورت مرة وفكرت أو قريت كتاب؟
بتجيب معلوماتك منين؟
تعرف يعني إيه حزب؟
ويعني إيه ليبرالية وشيوعية؟
بتدخل النت علشان -لاسمح الله- تتثقف؟

لو كانت معظم إجابتك بـ(لا) ماتقلقش .. إنت طبيعي 100% ومش محتاج أي علاج أو حاجة ..
عارف ليه؟؟
الدراسات كلها أثبتت إن احنا في أسوأ حالاتنا الثقافية والعلمية في عصر التقدم والتطور
في عصر الثقافة والعلم (يعني احنا أحسن ناس) ، والدراسات كلها قالت إن:-
80% مابيقروش الجرايد .. 70%من الشباب اللي بيشوفوا التلفزيون بيكون علشان بس
قتل الوقت ، والبرامج الدينية على مرتبة البرامج المهملة من الشباب بنسبة64% (مسلمين بجد)

والدراسات قالت كمان إن الشباب العربي بيدخلوا النت عشان بس مواقع الشات والأغاني والكورة
والبلوتوث والموبايلات والمواقع العلمية -لا سمح الله- مش بندخلها !! ..

وعلاقتنا بالكتب دلوقتي بقت 0% .. طبعا مش بقولك خليك افضل اقرأ كتب طول حياتك ، ولا خليك
زي نيوتن أو محمد حسنين هيكل -مصيبة إذا ماكنتش عارف دول كمان!!- .. لكن استفيد من وقتك
وطور أمتك ، واعرف [[إنت عايش ليه وعايز إيه؟]] ..

احنا فعلا بقينا أمة نايمة مش بيهمها أي حاجة ودماغنا فاضية ومافيش حاجة عايشين ليها وعايشين
عشان بس ربنا خلقنا!
وكل اللي نعرفه في حياته هوه الممثل الفلاني هيمثل في فيلم كذا والمغنية الفلانية لبست اللبس
الفاضح في الفيديو كليب ولاعب الكورة دخل هدف امبارح في نفسه ، لكن ديننا!!
مش مهم ، كفاية علينا الوضوء والصلاة والشهادتين وكده هندخل الجنة ...

أظن ده الوقت اللي المفروض إننا ننتبه العالم وصل لإيه وبيتقدم إزاي ، علشان احنا عمرنا
ماهنتقدم واحنا على الحال ..


وبانتظار رأيكم في نفسكم وفي الشباب العربي ووضعه الحالي ...